A-TESALONIKA 5
5
1Alioze ha kutwala ku tungonde ni miaka, mandumbu, kuchatambile kusoneka nichimwe kuli yenu. 2Mumu yenwene nunanyingika pundu, tangwa lia Mwene chocho muliza ngwe mwiji ha ufuku. 3Mumu muze mamba ngwo, Sambukila, kutwama kawape, hohene kwenyeka muchitulumuka hali ayo ngwe kufumbajala hali pwo yoze uli ni ufumba; no kechi komboka nichimwe. 4Alioze yenu, mandumbu, kunushi mu milima, tangwa lize likanuwane ngwe mwiji. 5Mumu yenu eswe nuli akwa pangu, akwa mwalwa: hi tuli akwa ufuku ko, chipwe akwa milima, ka. 6Chocho kevwe kanda tuya tulo ngwe akwo, alioze tulénu, tukeyelenu. 7Mumu waze akuya tulo, kakuya tulo ha ufuku; ni waze akuzengewa, kakuzengewa ha ufuku. 8Alioze yetu, se tuli akwa mwalwa, tukeyelenu, tukazale chipwiko cha utale cha Ufulielo ni zango; ni ha ngalau, tuzale kutalatala cha ulamwino. 9Mumu Zambi katuselele ku atenu, alioze tukazuke ulamwino kuli Mwene wetu Yesu Kristu, 10yoze watufwilile, hanga chipwe tunalaula, chipwe tuli mu tulo, tukatwame ni mwono hamwe nenyi. 11Kashika lishinjilenu umwe ni mukwo, likolesenu umwe ni umwe, chizechene ngwe nwakulinga.
12Tunaliumbu kuli yenu, mandumbu, nukanyingike waze akukilikita hakachi kenu, ni waze akunwendesa muli Mwene, ni waze akunukanyamisa; 13nukaalemese kuhiana chikolo mu zango, mumu ha milimo yo. Pwenu ni sambukila hakachi kenu. 14Alioze tunaliumbu kuli yenu, mandumbu, nukakanyamise yilumbuke, sangulwisenu akwa ulenda ku mbunge, kolesenu akwa kulela, lihumikizenu ni eswe. 15Kanyamenu niumwe kanda afwetesa kuli mukwo yipi ha yipi; alioze kaulenu yipema matangwa eswe, umwe kuli mukwo, ni kuli eswe. 16Wahililenu matangwa eswe. 17Lembenu, nikulitwamina nichimwe. 18Ha yuma yeswe Sakwilenu; mumu chino we upale wa Zambi muli Kristu Yesu hali yenu. 19Kanda nujima Spiritu. 20Kanda nupwisa wamokomoko uprofeto; 21alioze esekenu yuma yeswe; kakaminyenu ku yize yinapeme. 22Súlenu ku milali yeswe ya ungulungulu.
23Haliapwila Zambi ya sambukila iye mwene akanusele ku usandu liakulu; akafunge maspiritu jenu ni alma jenu ni mijimba yenu ya muwundu, yikapwe kuyishi chitela ha kuheta cha Mwene wetu Yesu Kristu. 24Mukwa kunutambika wamwenemwene, iye kumakachilinga.
25Mandumbu, lembenu hali yetu.
26Menekenu mandumbu eswe ni mbeju yisandu.
27Ngunanushinji kuli Mwene akatange mukanda uno kuli mandumbu eswe asandu.
28Vumbi lia Mwene Yesu Kristu lipwe ni yenu.
Currently Selected:
A-TESALONIKA 5: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
