1 A-KORINDU 13
13
1Chipwe munguhanjika ni limi lia atu ni angelo, alioze chishi zango, mungupwa ngwe ngunga yakuhanjika nge-nge-nge, hanji mikosa ya kunjatangila. 2Chipwe mungupwa nikuprofeteza, chipwe mungunyingika yijimbikilo yeswe, ni yinyingi yeswe; chipwe mungupwa ni Ufulielo weswe, chocho munguhasa kututulula milundu, alioze kachi chishi zango, ngunapu wamokomoko. 3Chipwe mungupangila yikumba yami yeswe mukulisa yiswale, chipwe mungukunjika mujimba wami akawoche, alioze kachi chishi zango, chafumbukile nichimwe.
4Zango uhomboloji likwete, utu likwete; zango kulishi kupwa ni lufwachinda; zango kulishi kulisangala, kulishi kulifuza. 5Kulishi kulinga ngwe kuchatele, kulishi kufupa yuma yenyi mwene, kulishi kutenuka nikawashi; kulishi kushinginyeka yipi; 6kulishi kuwahilila mu uhenge, alioze kuliakuwahilila mu umwenemwene; 7kuliakufuka yuma yeswe, kuliakufuliela yuma yeswe, kuliakutalatala yuma yeswe, kuliakunyongonona mu yuma yeswe.
8Zango kulishi kuhwa nilimwe tangwa: alioze chipwe uprofeto, kumakauhwisa; chipwe malimi kumakahwa; chipwe yinyingi, kumakayihwisa. 9Mumu tunanyingika ha chihanda, tunaprofeteza ha chihanda; 10alioze muze chize chingunu hicheza, chize chinapu ha chihanda muchikahwa. 11Muze napwile mwana, nahanjikile ngwe mwana, nevwile ngwe mwana, nanyongene ngwe mwana: alioze haliapwila se hinapwa lunga, hinambila yuma ya wanuke. 12Mumu haliapwila twakumona mu katalilo ngwe chijimbikilo; alioze ha tangwa lize meso ni meso; haliapwila ngunanyingika ha chihanda; alioze ha tangwa lize mungukanyingika liakulu, chizechene ngwe nawa hanangunyingika liakulu. 13Alioze haliapwila yinasala Ufulielo, kutalatala, zango, yino yitatu; ni che chahiana cha ku yino, zango.
Currently Selected:
1 A-KORINDU 13: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
