1 A-KORINDU 14
14
1Kaulenu zango; hindu fupenu chikolo ha yawana ya uspiritu, alioze Shinaho nukaprofeteze. 2Mumu yoze mahanjika mu limi, keshi kuhanjika kuli atu alioze kuli Zambi; mumu niumwe mevwa; alioze muli Spiritu mahanjika yijimbikilo. 3Alioze yoze maprofeteza, mahanjika kuli atu maliji a kukolesa, a kushinjila, a kusangulwisa. 4Yoze mahanjika mu limi malikolesa mwene; alioze yoze maprofeteza makolesa chikungulwila. 5Achi, ngunazange yenu eswe nukahanjike mu malimi, alioze Shinaho nukaprofeteze: yoze maprofeteza iye munene wahiana yoze mahanjika mu malimi shina malumbununa, hanga chikungulwila akatambule maliji a kukolesa.
6Alioze haliapwila, mandumbu, kachi mungwiza kuli yenu nikuhanjika mu malimi, kuchi munufumbuka? Shina munguhanjika kuli yenu chipwe ni usolwelo, hanji ni yinyingi, hanji ni uprofeto, hanji ni longeso? 7Chipwe yuma yize kuyishi mwono, nyi yinahanjika, chipwe lundembo, hanji kalialia, nyi kuyishi kuhana kulipwila cha maliji, ngwe kuchi manyingika chize memba ha lundembo hanji ha kalialia? 8Mumu kachi chitavwi muchihana liji lize kulialumbunukine, iya malulika ha jita? 9Chocho ni yenu nawa, ngwe kuchi manyingika chize munuhanjika shina munuhanjika ni maliji ashi kulumbunuka? Mumu munuhanjika mu tetela. 10Kwali hanji maliji eka ni eka, mba eswe ni ulumbunwiso wo. 11Kachi Chanyingikine ulumbunwiso wa liji mungupwa kuli yoze mahanjika ngwe kandaka, ni yoze mahanjika mapwa ngwe kandaka kuli yami. 12Chocho ni yenu nawa, se nwakufupa chikolo ha yawana ya uspiritu, fupenu hanga nukahiane kukolesa chikungulwila.
13Kashika yoze mahanjika mu limi, alembe hanga akahase kulilumbununa. 14Mumu kachi mungulemba mu limi, Spiritu yami muyilemba, alioze kunyonga chami muchiseka. 15Mba kuchi? Mungulemba ni Spiritu, mungulemba ni kunyonga nawa: mungwimba uhaliso ni Spiritu, mungwimba uhaliso ni kunyonga nawa. 16Nyi ka, kachi mufumanyisa ni Spiritu, ngwe kuchi yoze kanyingikine mamba ngwenyi, Amene, ha kusakwila che? Se kanyingikineko chize unambe. 17Mumu musakwila kanawa chamwenemwene, alioze mukwo kwamukoleseleko. 18Ngunasakwila kuli Zambi, nakuhanjika mu malimi kuhiana yenu eswe: 19chipwe chocho, mu chikungulwila ngunazange Shinaho kuhanjika maliji atano ni mana jami, hanga ngufumbe akwo nawa, hi kuhanjika ko kumi lia tununu twa maliji mu limi lia kandaka.
20Mandumbu, kanda nupwa ana mu kunyonga chenu: hindu mu uhuka pwenu ana-akemba, alioze mu kunyonga pwenu makulwana. 21Mu shimbi chinasonewa ngwo, Mungukahanjika kuli atu ano ni akwa malimi eka ni mivumbo ya atu eka; chipwe chocho kechi kapanjika kuli yami, chocho anambe Mwene. 22Kashika malimi kanapu chilayi, hi kuli akwa kufuliela ko, alioze kuli waze keshi kufuliela; alioze uprofeto kuushi kutwala kuli waze keshi kufuliela alioze kuli waze akufuliela. 23Kashika nyi chikungulwila cheswe muchikunguluka muma mumuwika ni eswe mahanjika mu malimi, nyi manjila atu aze kanyingikine, waze keshi kufuliela, kechi kwamba ngwo, Nunazaluka, nyi? 24Alioze kachi eswe maprofeteza, nyi manjila yoze keshi kufuliela, hanji yoze kanyingikine, mamukumisa kuli eswe, mamupatwila kuli eswe. 25Yuma ya kuhengama ya mu mbunge yenyi muyisoloka: chocho makafulamana ha meso jenyi, makawayila Zambi, mambulula ngwenyi, Zambi hwali hakachi kenu pundu.
26Mba kuchi, mandumbu? Muze munukunguluka, mweswe wa kuli yenu mwaso ali nawo, longeso ali nalio, usolwelo ali nawo, limi ali nalio, ulumbunwiso ali nawo. Alinge yuma yeswe mukukolesa. 27Kachi umwe mahanjika mu limi, akapwe aali, hanji atatu, ahanjike umwe ni umwe; mba umwe alumbunune. 28Alioze kachi mukwa kulumbununa wakuhi, ahole mu chikungulwila; ahanjike kuli iye mwene ni kuli Zambi. 29Aprofeta ahanjike aali, hanji atatu; akwo apatwile. 30Nyi kachi masolola usolwelo kuli umwe unatwamako, mutangu ahole. 31Mumu yenu eswe nunahase kuprofeteza umwe ni umwe, hanga eswe alilongese, hanga eswe aashinjile. 32Maspiritu ja aprofeta kakuzeyela kuli aprofeta. 33Mumu Zambi hi Zambi ya Chizungozungo ko, alioze ya sambukila.
Chizechene ngwe mu yikungulwila yeswe ya asandu. 34Mapwo ahole mu yikungulwila, mumu kaatayijileko kuhanjika, alioze azeyele chizechene ngwe yinambe shimbi nawa. 35Kachi mazanga kulilongesa chuma chimwe, kachi akahule akwo-malunga ku mazuwo jo: mumu sonyi hali pwo kuhanjika mu chikungulwila. 36Kuma, liji lia Zambi liakatukile kuli yenu, nyi? Shina liahetele kuli yenu wika?
37Kachi umwe malishinginyeka kupwa profeta, hanji mukwa uspiritu, akatayize yuma yize ngunasoneka kuli yenu, je shimbi ja Mwene. 38Alioze kachi umwe malajala, akalajale. 39Kashika, mandumbu jami, fupenu chikolo nukaprofeteze, kanda nukakanjisa kuhanjika mu malimi. 40Alioze akalinge yuma yeswe nikulita ni kululika.
Currently Selected:
1 A-KORINDU 14: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
