Rom 9

Hanguruen ad Jehova le ndro su Juda ber range. Paulus i reng le bergolsu Juda ndoun.

1Kristo i da le bergolo, malabo io beg vong heb nongen monen ge, ndangen io de bahilou gleri bui, io beg bai heb nongen, dege i da le bergolo gle ndoui ad Meluan Helian: 2Bergolo i ngendi manden, ndrno i gosusngo le longu hendre ogo. 3Io ha lengi Kristo i gbieni io be io dono sobani su ndere, su loun ordo ber boan, be io dono bolumiasu leri. 4Su asu Jsrael, Jehova i loh su le lao aden ge, i gin daui nongen aden Helian le ndro su, i gin daui engerang aden le ndro su, i gin hengen lodu hian le ndro su, i da beg hengen le ndro su dege i gin bai goru. 5Su lao ad Jehova ber goru su damen asu, Mesias i gin meher le molengasu, i Ndorlaben le longu masigane, io bamugueni i bing si e rang si sidegesi. Amen.

Longu ad Jehova le ndro su Juda monen ge.

6Io de dono vong bui, nongen masi ad Jehova le ndro su Juda gina le ndro su molhege, su masi ber Israel, su Israel ndangen bui. 7-8Su masi, su da gin meher le mandrn ad Abraham su ndur Abraham bui. Su ndur Isaak ge, su mbunana ad Abraham. 9Dege su gin hondre dugian: Bersi le rang ogo io beg mul, boen ndurn ad Sara na gmehere. 10Dege ogoro le ndro Rebeka lie, nambulen homo ge, aga Isaak i damen adu. 11Su ndurn de gin meher le boan masou su de gin bo longu momen masou, su de hian bui, su de momen bugane. 12Jehova i gin bai le ndro Rebeka le asor marmou dege i da hanguruen i hian ge, i bai: Ndurbisenden, i ndorlaben, ndur hanu i lao aden ge. 13Dege homo i gin hondre goru: Goloisden Jakob, gus ordo le ndro Esau.

14Malabo i hi derbe? Jehova i da heb monen bui le hanguruen aden? Bugane, 15i gin bai le ndro Mose, Io ha somui le ad homo dege io ha lengi, io ha ibdi gahaloseli le ndro homo de homo dege io ha lengi. 16I sobani du bui le mburer adu, i sobani du le golnisden aden. 17Nongen Helian i da vong le ndro Varao: Uo da gin meher le boan, io beg bosilieni le ndro uo ndoui ordo, su gor masi ber boan su gabmugueni io. 18Longu ogoro, Jehova golnisden homo de homo, be i ha leng golnisden i, i da bieni homo ma homo, dege i ha leng bieni i. 19Malabo su holel beg vong me ndro io, su bai: Be longu i dege ogoro, Jehova de danen boii homo bui, sie i danen bo longu hendre, be Jehova i mbueren i ghinen i. 20Ehe, uo ndramed ber boan uo sie? Uo do beg gord le ndro Jehova le hanguruen aden? Longu hendre hom ndramed gin mengseni, i danen vong le ndro ndremda marbahar, desa uo gin berden io dege ogoro? 21Ndremda lus i ndoa le mengseni lus hendre ber gei heie hian ge, su mugueni i, ma i danen berden lus hendre ber gei heie heb hian bui, dege i ha lengi, de bui?

22Malabo hi derbe, be Jehova i ha leng belengen su eluen ndrnen i da mah le longu asu momen, aga mburer aden ge, i danen boharni gus aden ma ndoui aden, dege i ha lengi. 23Be i ibdi gahaloseli le ndro su, nemen i da gin mengseni su, be i beg daui le ndro su memrad aden ma engerang aden, aga mburer aden ge de bui? 24Iou dege lus, ogo ndremda marbahar gin mengseni i, su holel asu Juda ma su holel asu Haiden lie. 25Dege i vong le buk ad Provet Hosea: Io ha bosoui su, su lao ordo, mahanu su lao ordo bui, io golnisden su, mahanu golnisden ordo i da ndro su bui. 26Longu na gmehere le logna Jehova i da gin bai le ndro su: Mu lao ordo bui, Ndorlaben i bosoui su mbunana ad Jehova i da mamaren ge. 27Jesaia i loh, i bai le asu Israel: Be su ndur Israel su mabosanged dege ndoruon ber leng, io beg rumburdi su holel ge. 28Ndorlaben i ghinen longu masigane dege i gin bai, longu hendre e hendre na gmehere. 29Jesaia i gin boharni goru, be Jehova i de gin bogulue du bui, iou dege su ber Sodom, iou gina momen dege su ber Gomora.

Mburer asu Israel ge, be Jehova gin bieni su.

30Malabo i hi derbe, su Haiden, su de gin gahi memrad ber lang bui, Jehova gin somui le asu, su da mamaren, su da monen ge, su da gin boro ndoui ad Ndorlaben. 31Su Israel su da beg hinen nongen ad Jehova dege i ha lengi su ghinen i, su de gin ibdi memrad ber lang bui. 32Desa, su dege ogoro? Su de gin boro ndoui ad Ndorlaben bugane, su beg bo mburer ge ma su gin hanguruen, Jehova beg hengen me ndro su memrad ber lang, le surien mburer asu. Be su da le sal ndegesu gin los le bad. 33Dege homo gin hondre: E lele, io ilgi bad manden le sal ber bahali Sion, ndrnesu i mah le bad ogo, ar homo i boro ndoui le bad ogo, i de somad bui.

Currently Selected:

Rom 9: LLENT

Highlight

Copy