Rom 8

Mburer ad Meluan Helian le bergolsu lao ad Jesu.

1De dansu dieni su bugane, su ad Jesu Kristo. 2Nongen le Meluan i da hinen du mamaren ge gle ndoui ad Jesu Kristo, i gin rumburdi du gle longu momen, iou de gmad bui. 3Longu hendre ogo nongen ad Mose de danen hinen i bui, mandrn, aga sengen i da gin bo iil le ndro i sidesi, longu hendre ogo Jehova ge, i gin hinen i. I da gin bo gord le ndro longu momen i da le sengen asu ndramed i gin ndounen i. I gin rendegien ndurn, i aden ge, i da gin idbi sengen asu ndramed momen. 4Nongen ad Mose i ha lengi surian le longu momen asu ndramed, Ndorlaben i gin daui Jesu, aga surian le longu momen. I vonei me ndro du, iou da dogi gle ndoui ad Meluan ge, iou da bieni longu momen le sengen adu. 5Su ndramed ge ber sengen, su da hangungerou sidesi momen ge. Su ndramed ber ad Meluan, su hangungerou longu ad Meluan ge. 6Su da hangungerou longu le sengen asu, su na gmed. Su da hanguruen longu le meluan, su mamaren ge, mandri ad Jehova i da ge ndro su. 7Ar homo hangungerou sengen aden ge, i bo iil le ndro Jehova, i de delengan le nongen ad Jehova bui, i ndoa le hirong nongen aden bugane. 8Jehova i mbueren su, su da hangungerou longu ber boan, longu le sengen asu. Mu ge, mu do da hanguruen sengen ademu bui, mu da hanguruen longu le Meluan ge, Meluan ad Jehova i da le bergolmu. 9Ar Meluan ad Kristo i da le bergoln ad hom ndramed bui, i hom lao ad Jesu bugane. 10Be Kristo i da le bergolmu, sengen ademu na gmed le longu aden momen, meluamu ge i da mamaren le mburer ad Jesu Kristo. 11Meluan aden ge i da gin hingeni Jesu le ngad, i da le bergolmu, i ghinen i dege i gin hinen le ndro Kristo, i da gin hingeni i le ngad, i hingeni mandrmu molhe i da ginmad goru lie, mu mamaren ge gle meluan ogo, i da le bergolmu.

12Mu ndere hian, iou da bo mburer dege hanguruen adu ber sengen bui, heb ndoui ber sengen adu bugane. 13Be mu da hanguruen longu ber sengen mu na gmed ndangen, ar mu daii hangungerou momen le sengen gle ndoui ad Meluan mu da horuan mamaren ge. 14Su masigane meluan ad Jehova i da rui su, su mbunana ad Jehova. 15Meluan i da le bergolmu, aga Meluan ad hom lao dandendegei bui, i da noh longu hendre e hendre, meluamu aga meluan asu ndursu, dandu bosoui Abba, Bo Domo. 16Meluan ogo, dagara meluadu i da boharni bersi, iou mbunana ad Jehova. 17Be iou ndurn, iou da hilou, iou ngab le ibdi memrad, memrad ad Jehova, le memrad ad Kristo. Be iou da ibdi ngendian aden, iou gibdi engerang aden le gor lundielang lie.

18Io hanguruen longu hendre: Ngendian ber rang ogo i da vonei heb gle engerang ad Ndorlaben bui, i da beg boharni me ndro du. 19Longu masi ber boan bergolsu i da gunuen hi bui gle engarang asu ndur Jehova, be Ndorlaben i beg boharni. 20Su gin ndounen longu masi ber boan, dege i, i da ha lengi dagara. Longu masi ir belengeni i rang hian ber muren. 21Bersi muren, Ndorlaben i rumburli su le longu masi momen, boen longu masigane ber boan, i dege su mbunana ad Jehova, su hian ge, su mamaren. Engerang i da ndro su masigane. 22Longu masi ber boan i da ngundr malabo le ngendian, i da belengeni rang be i da gmeher gle houen. 23Su ge bui, iou masi dagara lie, iou da ngundr le bergoldu be iou da belengeni le rang i da beg meher ndro du, be iou da ngab memrad ber lang, dege su ndurn su ghinen i, boen mandru gina horuan ge. Meluan Helian i da le bergoldu aga memrad ber lang. 24Ndorlaben gin rumburdi du, mandru ir belengeni le rang, be i da mamaren ge. Ar longu hendre gin meher gane, iou da belengen leri bui, i da gin mehere. 25Be io da belengen longu hendre i da gin meher masou, iou da belengeni bing si e rang si hian ge. 26Meluan Helian i meher ndro du, i sobani du, iou da heb ndoa bui. Dandu lodu heb monen bui, Meluan i ge, i da sobani du, i da soling le ndro Ndorlaben. 27Jehova, i danen bergoldu, i danen nongen ad Meluan Helian, i da ha soling le ndro Jehova sidegesi le asu lao ad Jehova Helian dege Jehova i ha lengi.

28Dandu, longu hendre su da golnisden Jehova longu masigane ber boan i da gob hian ge le ndro su, Ndorlaben gin loh su, su aden ge. 29I danen su ber gor i ha lengi i, su sameluan ad ndurn, su dege i ge, i ndurn hanu le asu masi, asu ndern mabosanged. 30Su ge, i gin loh su, i gin hinen su monen ge, i gin hinen bergolsu monen, i daui le ndro su engerang aden.

31Malabo i hi derbe, ar Jehova i da ndro du, sie gob iil me ndro du? 32I da gin hengen me ndro du Ndurn i homo ge, i ginmad le ndro du masigane, i hengen me ndro du longu masi lie. 33Sie i beg bo gord le ndro su lao ad Jehova? Jehova i gorbo, i da sobani su, i da rumburdi su le gord asu. 34Sie i beg dieni su lao ad Jesu? Jesu Kristo gorbo i da ginmad, bugane, i da gin ndne lie le ngad aden. I lug le nemen sengen ad Jehova, i soling le ndro Damen, i osbani su lao aden. 35Sie i beg hedi giao golnisden ad Kristo i da le bergoldu? Ngendian, rang momen, mundrul, iou de bieni Kristo bui, be su hingismad adu, be salo adu bui, be su beg daii du. 36Dege homo gin hondre: Su da daii du bing si e rang si, io da gin boro ndoui le ngarm, iou dege meh su da daii su. 37Longu ogo masigane de danen ndounen du bui, iou ge, io undounen longu masi ogo gle ndoui ad Ndorlaben adu, i da golnisden du. 38Io dono i hian ge, be iou nagmed, be iou mamaren, golnisden ad Jehova i da le bergoldu. Su Angelo, de su ndramed ber boan, longu hendre e hendre ber range, de ber muren, ndoui asu ndorlaben ber boan, 39gor lundielang de gor ad beld Satan, de longu hendre e hendre ber boan de ber lang, i danen hedi giao golnisden ad Ndorlaben adu Jesu Kristo i da le bergoldu bugane.

Currently Selected:

Rom 8: LLENT

Highlight

Copy