Rom 16

Heb nongen le asu lao ad Jesu holel.

1Io ha lengi, mu hanguruen bison adu ngarn Vebe, i da bo mburer ad Jehova le gor Kengrea, 2ha somui le aden, dege bern asu lao helian, osbani i le mburer aden le longu hendre e hendre, i gin sobani du dagara lie le mburer adu, dagara i gin sobani io. 3Io beani nongen hian le ndro Prisila, sor Akwila, sor gin bo mburer ad Jesu Kristo bersi ndro io. 4Sor gin hengen mandrsor me ndro io le sobani io, io mugueni sor, dagara su Kristen masi asu Haiden su gabmugueni sor. 5Io beani nongen hian le ndro su lao ad Jesu ber lodu i da le um aden. Io beani nongen hian le ndro Epenetius, i da gin boro ndoui ad Jesu hanu le asu masi ber Asia. 6Io beani nongen hian le ndro Maria, i da gin bo mburer manden le ndro mu. 7Io beani nongen hian le ndro Andronikus sor Junias, sor da le kalabus la born ndro io, sor asu Juda ge. Su Apostel ber Jerusalem su mugueni sor, sor gin boro ndoui ad Jesu Kristo hanu, io muren. 8Io beani nongen hian le ndro Ampliatus, io golnisden i. 9Io beani nongen hian le ndro Urbanus i da gin sobani du le mburer ad Kristo, dagara le ndro Stagis. 10Dagara le ndro Apeles, i hom lao ad Jesu Kristo hohunan. Io beani nongen hian le ndro su ndern su da le um ad Aristobulus. 11Ma le ndro Herodion, homo asu Juda, le ndro su ber um ad Narsisus, su ad Ndorlaben ge. 12Le ndro Tripena, sor Triposa, sor da bo mburer hian ge gle ndoui ad Ndorlaben. Io beani nongen hian le ndro Persis, hom bihilou ad Ndorlaben, i da gin bo mburer hian ge. 13Dagara le ndro Ruvus, Ndorlaben gin eloh i, ma le ndro nanen, i nano dagara lie. 14Le ndro Asinkritus, le ndro Vlegon, le ndro Hermes, le ndro Patrobas, le ndro Hermas, ma le ndro su ndern su da le um asu. 15Io beani nongen hian le ndro Vilologus e Julias, le ndro Nereus sor bison, le ndro Olimpas, ma le ndro su lao helian, su da le um asu. 16Ghanguruen hian homo le homo, gabmugueni su. Su lao ad Jesu ber gor masi su beani nongen hian le ndro mu.

Mbue su somui le su misionare bahilou.

17Mu ndere hian, io ha soling ndro mu, orgulue meluamu le asu holel, su da daui iil le dogromu, le henunuen asu, i dege henunuen adu bui, mbue hirong nongen asu. 18Su ndramed dege ogoro su de bo mburer ad Ndorlaben Kristo bui, su hanguruen mandrsu ge, ndrnesu ge, be su bosoui nongen mamali le ndro su lao ad Jesu. 19Ngarnongen le bern ademu hian gin hilou le ndro su gor masi. Io ha mugmug ge, be io da hanguruen mu. Io ha lengi, mu bogulue meluamu le longu masi momen, mu ghanguruen longu hian ge le bergolmu. 20Jehova, i da lug mandri i gob iil le ndro Satan, ir ndounen i, danmu herdaui i le borndegemu roud. Golnisden ad Ndorlaben Jesu Kristo i da ge ndro mu.

Su gous ad Paulus beani nongen hian le ndro su Kristen ber Rom.

21Timotius i da gin bo mburer la born ndro io, dagara Lusius, Jason, e Sosipater, su asu Juda, su beani nongen hian le ndro mu. 22Io Tertius, io da gin hondre nongen ogo io beani nongen hian le ndro mu lie. 23Dagara Gaius io da le um aden sidesi, i sobani su lao ad Jesu masi ber gor, Erastus ma kuskus ber gor ma ndere Kuartus sor da beani nongen hian le ndro mu. 24Golnisden ad Ndorlaben Jesu Kristo i da ge ndro mu masi! Amen.

25I ge, i da ndoa le hengen ndoui aden le ndro mu dege io da gin bohernou le ndro mu le longu ad Jesu Kristo, i gin boharni me ndro io longu ber lang, mahanu i da gin gorni i, i gin nhui i. 26Malabo i gin boharni me ndro io dege su Provet su gin hondre dugian gle ndoui ad Jehova, i do da sidegesi. Nongen le longu ber lang gin hilou le ndro su gor masi, Ndorlaben i ha lengi i delengasu le nongen aden ge. 27Iou da mugueni Jehova, i da danen longu masigane, iou da mugueni i le ad Jesu Kristo bing si e rang si sidegesi! Amen.

Currently Selected:

Rom 16: LLENT

Highlight

Copy