Rom 15

Su ndoa sobani su, su heb ndoa bui.

1Iou da ndoa gle longu ber lang le sobani su ndere su heb ndoa bui, iou belengen su, mbue de hanguruen hian le adu. 2Homo ma homo adu i osbani ndern le mandrn ma le meluan. 3Dege Kristo i gin hinen i, i de gin hanguruen mandrn bui, dege homo gin hondre: Nongen asu momen, su da gin boii uo, gin rii io. 4-5Longu masigane su da gin hondre goru, su gin hondre, beg henunuen du leri. Ndorlaben i ha lengi, iou da ndoa gle Nongen Helian, i da beg rederhi du, boen iou ndoa ge le longu masi, i da beg meher muren. Ndorlaben Jehova na ghengen mu, mu da hanguruen monen bersi, dege Jesu Kristo gin henunuen mu. I da rederhi du, i da hengen ndoui me ndro du. 6Boen iou da boharni masigane bersi: Jehova, i damen ad Ndorlaben Jesu Kristo, iou gabmugueni i leri.

7Ha somui homo ma homo, dege Kristo i gin somui le ademu, i rui mu le engerang ad Jehova. 8Io hanguruen dege ogoro: Kristo i hom lao le ndro su Juda, i beg hinen longu masigane, dege Jehova gin bai le ndro su damen ber goru: 9Su Haiden su gabmugueni Jehova le gahaloseli aden, dege homo gin hondre: Io beg bamugueni uo le molengasu Haiden, io beg bamugueni ngarm le gagaile. 10Homo gin hondre: Mu Haiden, gu mugmug bersi, le ndro su lao aden. 11Dagara homo gin hondre: Mu Haiden masi, gabmugueni Ndorlaben, ndangen su gor masigane su gabmugueni i. 12Boen Jesaia i bai: Ngondrn ber gei ad Isai na gmehere i gedne, i Ndorlaben asu Haiden. Su Haiden su belengeni aden. 13Iou da belengeni Jehova, i ge, i daui le bergolmu mugmug ge, le ndro mu, mu da gin boro ndoui aden, i ilgi mandri gle ndro mu, boen memrad ademu ber gor lundielang i bulhe, mu da belengeni i gle ndoui ad Meluan Helian.

Heb nongen le mburer ad Paulus.

14Mu ndere hian, io dono i, mu da irgai monen ge, danmu le longu masi ber lang. Danmu henunuen homo ma homo le longu hian ge. 15Be io da gin nondre le ndro mu longu hendre e hendre monen ge, io ha leng, mu ghanguruen longu hendre e hendre hian monen ge, dege Jehova i da gin hengen i me ndro io le golnisden aden. 16Io hom lao ad Jesu Kristo, Ndorlaben gin rendegien io, io gob mburer le molengasu Haiden, io da gob mburer le ndro su, dege su ndremda dohor le memrad ber lang. Io beg ilgi le ndro Ndorlaben su Haiden masi, su dege longu dohor helian, rosan ge gle ndoui ad Meluan Helian. 17Io mugueni mburer ordo i da hinen i le ndro Jehova gle ndoui ad Jesu Kristo. 18Io de dono mugueni mburer ordo molhe io da gin hinen i le ndoui ordo bui, io beg mugueni mburer ad Kristo ge, io da gin hinen i gle ndoui aden ge beg rui su Haiden gle hian, su delengasu le nongen ad Ndorlaben. Io da gin bosoui nongen, io da gin hinen mburer. 19Io da gin bo gelman e longu ndoun gle ndoui ad Meluan Helian, io da gin bohernou longu le Jesu Kristo ber lang le ndro su Jerusalem, boen io gin dogi le gor hoger e hoger, io gina le ndro su Ilirikum lie, io da gin bohernou le ndro su longu ber lang, 20su gin hirong heb le Jesu Kristo masou, io mbuere bo mburer le gor hoger e hoger, be su gin hirong nongen le Jesu hanu. 21Io gin hinen i dege su gin hondre goru, su gilndri i, hanu su da gin hirong heb le nongen aden masou. Su gu dansu i heb ngarnongen le Jesu gin meher le ndro su masou.

22Eluen io beg meher ndro mu, sidesi mburer ordo hosi io, io de dono dogi bui. 23Malabo mburer ordo le gor ogo boen, bergolo gunuen hi bui, beg ilndri mu. 24Be io ha leng dogi le gor asu Spania, io beg meher le gor ademu lie. Io beg ilndri mu, boen su holel ademu su la born ndro io le sal be io da le gor ademu boen. 25-26Malabo io da le sal le gor Jerusalem, le mburer asu lao ad Jesu. Su ber gor Masedonia, ma su ber gor Grek, su gin daui moni asu le goure, su beg hengen le ndro su lao ad Jesu ber gor Jerusalem, heb moni asu bui. 27Ehe, su gin hanguruen dagara, ma hanguruen asu i hian monen ge, be su Haiden gin ibdi memrad ber gor lundielang, su osbani su ndern gle memrad ber boan lie. 28Be mburer ogo boen, be io gin daui moni le nemesu, io ha leng dogi le gor ademu Rom ma le ndro su Spania lie. 29Io dono longu hendre, be io gmeher ndro mu, memrad ad Kristo ber lang la born ndro io, io ghengen le ndro mu. 30Mu ndere hian, io ha soling ndro mu gle ndoui ad Ndorlaben Jesu Kristo, gle ndoui ad golnisden ademu, meluan Helian gin ilgi le bergolmu, hian osbani io gle raring ademu, soling ndro Jehova gle mburer ordo, 31debosan su Juda su ndounen io, su de gin boro ndoui ad Jesu Kristo bui, boen io da hian ge le gor Jerusalem. 32Bersi muren, be Jehova ha lengi, io dgogi le ndro mu, boen rang hian i da ndro du. 33Jehova i lug mandri ge, i da ge ndro mu masi! Amen.

Currently Selected:

Rom 15: LLENT

Highlight

Copy