Rom 14

Heb nongen le gan ma le bandri.

1Osbani su, su da heb ndoa bui, mbue bo iil le ndro su, le longu hendre e hendre i da le bergoln, i da le hanguruen aden. 2Homo i danen gien longu hendre e hendre, i da heb ndoa bui, i danen ien sengen ber lonhou, i bieni soro. 3Ar homo i danen ien longu masigane, mbue hanguruen momen le aden, i da helian ndro i le gien longu hendre e hendre. Ar homo i da bandri le longu hendre a hendre i de gdieni ndern bui i da ien longu masigane, i hom lao ad Jehova lie. Jehova gin somui le aden. 4Uo hi derbe, uo da beg dieni hom lao ad Ndorlaben? I ad Ndorlaben ge, i da gdieni i dege i ha lengi, Ndorlaben aden i da ndoa ge le hengen le ndro ndoui aden, i de glos bui, ir dogi monen ge. 5Su holel su da hanguruen bing holel, su bandri leri, le ndro homo, bing si dege rang si, aga hanguruen ad homo ma homo ge, i ghanguruen dege i ha lengi. 6Be homo i da bandri le bing holel, i bandri le ndro Ndorlaben, ar homo i da hanguruen bing si dege rang si, i da hanguruen dagara, beg bo mburer ad Ndorlaben. Ar homo i da gian gan masigane, i da hinen i le ndro Ndorlaben, sidesi i bamugueni Jehova le gan anen. Ar homo i da bandri le gan si, i da bandri le ndro Ndorlaben, i mugueni Ndorlaben le bandri aden. 7Iou masi ber boan, mandru i adu bui, be iou da mamaren, mandru i adu bui, be iou na gmed. 8Be iou da mamaren, iou horuan le ndro Ndorlaben, be iou na gmed, iou na gmed le ndro Ndorlaben, iou da mamaren, de iou na gmed, iou ad Ndorlaben ge sidesi. 9Kristo i ginmad, boen i mamaren lie, i Ndorlaben asu su da mamaren, ma asu, su da ginmad. 10Uo hi derbe, uo da beg dieni nderm? Ma uo hi derbe, uo da hanguruen momen le ad nderm? Iou masigane, gmeher le logna gord ad Jehova. 11Dege homo gin hondre: Ndorlaben i bai: Ndangen, le ndoui ordo, ngondrnegesu masi su godurhu me ndro io, geresu masi su gabmugueni Jehova. 12Homo ma homo adu, i da gmeher ndro Ndorlaben Jehova, i ge, i gob gord le longu adu masi, iou da gin hinen i. 13Mbue dieni homo de homo, aga i hian ge, be homo i irgai monen ge, ndern i de bo gros de la ndro du bui gle dogi adu momen. 14Io dono gle ndoui ad Ndorlaben Jesu, longu masi ber boan i da rosan ge, heb longu i da segdan bui. 15Be bergoln ad nderm i da gosusngo le gan si, uo da ien, uo da golnisden nderm bui, be uo de bieni i bui. Mbue gob momen le ndro nderm, le gan aem, Kristo i ginmad le ndro i. 16Irgai monen ge, debosan su boii mu, su gboii memrad ademu ber lang. 17Gor ad Jehova, aga gan ber boan bui, gor ad Jehova aga mugmug ge, aga benu ge, aga longu hian monen ge ad Meluan Helian. 18Ar homo i da bo mburer monen le ndro Kristo, Jehova i mugueni i, su ndramed voasuiso aden. 19Iou beg hanguruen longu hendre e hendre hian ge, i da danen sobani meluasu ndramed, iou beg hanguruen benu le ndro su. 20Mbue ndumbue mburer ad Jehova le bergoln ad homo de homo, be uo da hanguruen gan si i da rosan, ma gan si i da segdan. Longu masi rosan, i momen ge le ndro homo, i da hanguruen gan i hinen i momen. 21Aga i hian be uo de gien heb soro bui, be uo de gilmui heb ndrunvain bui, be uo gbieni longu hendre e hendre nderm i mbuerem uo ghinen i. 22Hanguruen aden le longu hendre e hendre i da ndro uo monen, hian hanguruen i le bormarn ad Jehova. Aga i hian ge, be ngasen i da le bergoln ad homo, i de gdieni hanguruen, e mburer aden bui. 23Ar homo i da gien longu hendre, ma i da hanguruen le bergoln, i monen bui, ngasen i da le meluan gin dieni i, aga momen ge, be homo i da hanguruen le longu hendre. I heb monen bui, boen i ghinen i.

Currently Selected:

Rom 14: LLENT

Highlight

Copy