Rom 13

Su Kristen delengasu le Gaverment.

1Homo ma homo i delengan le nongen asu ndorlaben ber gor, Jehova i gin daui su le gor, su gobgulue su ndramed, ndangen Jehova gin daui su. 2Ar homo i bo iil le ndro su ndorlaben ber gor, i bo iil le ndro Jehova. Su da bo iil dagara, Jehova i surien longu asu. 3Su do dogi monen ge, su de noh su labenen bui, su ge, su da bo longu momen. Gob mburer hian ge, boen uo de noh su Ndorlaben, ma gord asu bui, su gabmugueni uo le longu adem hian. 4Su ndorlaben ber gor, su da bogulue su ndramed, su da bo mburer ad Jehova, beg sobani uo, be uo da bo longu momen, ha noh ndoui asu, mordo borla i da le nemen molhe bui. I da bo mburer ad Jehova, i da surien longu momen asu ndramed momen le gord asu. 5Delengam le nongen asu Ndorlaben, aga hian ge, muren uo de noh hebsa bui, uo ghinen i ge, dege ngasem i da le bergolm gin bai. 6Mu gu hengen le ndro su le moni ademu, beg surien heb mburer asu hian, su da hinen i le gor, ndangen, su dege lao ad Jehova.

7-8Hengen le ndro su longu asu: Taks le ndro su ndorlaben dege i monen, moni le ndro su labenen, dege i da monen, noh su, su da ndorlaben ber gor, gabmugueni su gle hian, be su gin sobani uo gle memrad asu, hengen mul le ndro su roud, golmugisden homo ma homo, ar homo i golnisden homo, i da gin hinen nongen ad Jehova boen. 9Nongen ad Jehova: Mbue sungsou, mbue rii homo, mbue behena, mbue hangungerou, ma nongen ad Jehova masigane, i da le heb nongen hendre ogo: Golmgisden ndramed i da baghege ndro uo, dege uo voamiso mandrm. 10Golnisden ad homo i de bo momen de la ndro ndramed, i da baghege bui, ar homo golnisden su, i da hinen nongen ad Jehova masigane.

11Hian ghinen longu ogo masigane, hanguruen rang, i da gin me, aga rang hian ge, edne mu da medir ge, rang i da baghege Ndorlaben i beg rumburdi du, i dege mahanu bui. 12Lobing baghege gina boen, rang houen beg mehere, hian iou gbieni longu masi momen ber ndrogmoan, iou beg ibdi longu ber rang. 13Hian iou ha dogi monen ge, dege su dogi lorang. Iou gbieni gous adu manden, iou gbieni sungsou, e longu momen, iou gbieni iil e bahun. 14Ehe, iou beg ibdi bern ad Ndorlaben Jesu Kristo, iou da beg hanguruen longu le mandru ber boan gle monen ge, debosan hangungerou ir ndounen du.

Currently Selected:

Rom 13: LLENT

Highlight

Copy