Boharni ad Johanes 6
6
Nongen le longu ma gelman i na gmeher.
1Muren io gin ilndri Ndurmeh i sindrdi vas i da le buk, boen io gin hirong homo asu mahamou i vong dege ngasen barr, i bai: Am ogo! 2Malabo io ilndri hors beren, homo i im ri hors, bonara i da le nemen. Su gin daui salion gle borbalen, boen i dogi, i bo bahun, i ndounen su.
3Be Ndurmeh gin rumburdi vas si lie, io hirong homo asu mahamou, i vong, i bai: Am ogo! 4Malabo hors ramen i dege moan gin mbsig, homo i da ndre hors, i ndoa le hedi benu ber boan giao, i hinen i, su ndramed su bo iil, homo bo bahun le ndro homo, mordo manden ge i da le nemen.
5Boen Ndurmeh i sindrdi vas si ber buk lie. Homo asu mahamou i vong, i bai: Am ogo! Malabo io gin ilndri hors rogdan i me dala. Homo i ndre hors skel si i da le nemen. 6Io gin hirong ngasen ad homo, i da le molengasu mahamou i vong, i bai: Heb gan gle moni si, lus madolo beb le gorn gle moni si. Mbue gob momen gle ndrelgei ma gle ndrunvain asu.
7Muren Ndurmeh i rumburdi vas si ber buk lie, io hirong homo asu mahamou i vong, i bai: Am ogo! 8Io gin ilndri hors si i heb beren, homo i da ndre hors ngarn aden i dege ogoro: Ginmad. E lele, gor ndrogmoan ir ndrbon, i ogo i ndoa le daii su ndramed ber boan sehendr asu. Su ndramed ber boan su ginmad le bahun, le song, le iab, ma le longu momen ber lonhou.
9Boen Ndurmeh i sindrdi vas ber buk si lie. Malabo io ilndri le behendra geao ad Jehova meluasu ber boan, su ber gor boan gin daii su le nongen ad Jehova, su da gin boharni le ndro su ndramed ri, su lao ad Ndorlaben ndangen. 10Su ogo su loh le ngasen ndoun, su bai: O Ndorlaben, uo da helian ndangen, gehere uo beg surien ndrai adu, gehere uo beg bo gord le ndro su, su ber gor boan? 11Su gin hengen le ndro homo ma homo asu salo beren, boen su vong le ndro su, su ha belengeni heb mandehege, be su ndere, su dandon le boan, su la born ndro su, be su ga med le nemesu ndramed momen ber boan.
12Muren io gin ilndri, Ndurmeh, i rumburdi vas i da le buk lie. Malabo boan i nunueie manden ge. Mernal gina ndrogum sumburdi. I dege salo rogdan, mbul gina ndrai gane. 13Su biri ber lang su los le boan dege mbuegei i los le boan be hai manden i ngoh. 14Lang gin vob, gin hilou gane, su bahali ma su reda gin bieni logna asu. 15Su King ber boan, su ndurhian, su ndorlaben asu polisboi, su ndorlaben ma su labenen ber gor, dagara su lao dandendegei asu su gohoni le lundiengai su da le bad, 16su loh ndro su bahali, ma le ndro bad: Hian ndrodhi du, gohoni du, debosan iou ilndri bormarn aden ge, i da lugdo im logna ad King. I gorni du, debosan gus ad Ndurmeh i gmeher ndro du. 17Rang manden ad Ndorlaben gin meher, aga rang ber gord aden, ber gus aden ge. Sie i da horuan le gor?
Currently Selected:
Boharni ad Johanes 6: LLENT
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society 1956
