Boharni ad Johanes 22
22
Longu masi i houen mamali ge.
1Muren i gin bosilieni me ndro io ndran haga, ndran mamaren ge. Ndran ogo i hian manden, i muh le lundiegor. 2Le mandrgos ndran le horo ma le horo gei hian, i da hinen su ndramed mamaren su do da. Mbuen asu masongul e ruo vara si bersi, vari si bersi. Lougei ber gei ogo i hinen su ndramed ber gor masi mamaren horuan ge. 3Heb longu momen i do da ri bui. Logna ad Jehova, ma logna ad Ndurmeh i do dari. Su lao dandendegei aden su gob mburer le ndro i. 4Su gilndri bormarn, ma ngarn ad Ndorlaben i da le bombulsu. 5Heb ndrogmoan i do dari bui heb sul bugane, Jehova, Ndorlaben asu, aga i sul, su masi su King manden ge le gor ogo bing si e rang si sidegesi.
Heb nongen le born.
6Muren i vong me ndro io: Nongen ogo i monen, i ndangen ge. Jehova, Ndorlaben asu Provet gin rendegien Angelo aden, i beg boharni le ndro su lao dandendegei aden longu hendre e hendre i da beg meher heb eluen bui muren. 7E lele, io gmeher roud. I ge, i horuan mamaren ge, i da bogulue nongen ogo ad Provet, i da le buk ogo gle hian ge. 8Io Johanes, io ge gin hirong i, io ge gin ilndri i. Be io gin hirong longu ogo masigane, be io gin ilndri, io gin los baghege le ndegen ad Angelo, beg bo lodu le ndro i. 9Angelo i vong me ndro io, i bai: Mbue hinen i, io hom lao dandendegei ad Ndorlaben dege uo, io homo asu ndere. Io homo asu Provet, io homo asu, su da bogulue nongen ber buk ogo. Gob lodu le ndro Jehova ge.
10Muren i vong me ndro io: Mbue gorni boharni le Buk ogo, heb eluen bui muren longu masi na gmehere. 11I da gin bo longu momen ge i gob momen sidegesi. I da gin bo longu hian ge i gob hian bersi ma bersilie, i da helian rosan ge i gobgulue meluan gle rosan bersi ma bersilie. 12E lele, io gmeher roud, ma surien la born ndro io, io beg surien mburer ad homo ma homo, dege i gin hinen i, i hian de i momen. 13Io ber nandugian, io ber muren lie, io hanu le longu masigane, io muren, heb longu i da muren me ordo bugane. 14Su horuan, su mamaren ge, su gin surhi salo asu gina rosan ge. Dansu ien sengen ber gei, i da hinen su ndramed mamaren i girgai le babi, gle gor lundielang. 15Su mui, su ndremda beld, su ndremda sungsou, su ndremda daiandramed, su da gin dohor ndre su beld su da gin dungi su ndramed, dagara su masi su da gin bahilou, voasuiso bahilou ge. Su masi gorbo su da le marbohon gor, de meher le lundien bui, su da le gor ndrogmoan.
16Io Jesus, gin rendegien Angelo ordo, i gobharni le ndro mu longu ogo masigane, le ndro su ber lodu ad Jesu masi. Io ngondrn ber gei ad David, io biri ber lang i da hinganen madourang.
17Meluan, ma nambulen ad Jesu i bai: Am ogo! Ar homo i hirong i, i vong i bai: Am ogo! Ar homo goln i mar le ndran i gmeher, ar homo bergoln i gunuen hi bui, su ghengen le ndro i ndran i da mamaren ge gle gous. 18Io vong le ndro homo ma homo, i da hirong nongen ber Buk ogo: Ar homo de homo i daui heb nongen le Buk ogo la born, Jehova i rendegien longu momen le ndro i, i da gin bosoui le Buk ogo. 19Ar homo de homo i hedi heb longu, heb nongen i da le Buk ogo giao, i gohoni i, Jehova i hedi memrad aden giao, i da beg hengen le ndro homo. I da hanguruen momen le ndro Ndorlaben, i de danen ien sengen ber gei bui, i da hinen su ndramed mamaren. 20I ge, i da gin boharni nongen ogo, i vong i bai: Ehe, io gmeher roud. Amen, gmehere Ndorlaben Jesu. 21Golnisden ad Ndorlaben Jesu Kristo i da ge ndro su lao aden helian masi! Amen.
Currently Selected:
Boharni ad Johanes 22: LLENT
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society 1956
