Boharni ad Johanes 21
21
Gor houen ma Jerusalem houen.
1Muren io gin ilndri lang houen e boan houen. Lang e boan ber goru gin los, gina sumburdi, ma ndas i do da le logna aden bui. 2Io ilndri gor helian, Jerusalem houen, i da gin meher, i gin voh le boan goru i da le lang, i da ndro Jehova ge, su gin nouni gor ogo gle mamali ge, dege su ha nouni nambulen ad hom gamel. 3Io gin hirong ngasen manden le lang, i vong, i bai: E lele, logna ad Jehova i da le molengasu ndramed, i da ge ndro su, su aden ge. Ehe, Jehova i da le molengasu, 4i esbui ndurmarsu giao. Su de somad bui, ndengiasu bui, longu momen bugane, su de reng bui, su de loholo bui, longu ber goru gineao gane. 5Malabo i ge, i da lugdo im logna aden i vong, i bai: E lele, io hinen longu masigane gle houen. Muren i vong me ndro io: E hondre, nongen ogo, i monen ndangen. 6Muren i vong me ndro io lie: Io gin hinen i boen, io ie, io ber nandugian, io ber muren dagara lie. Io beg hengen le ndro i goln i mar gle ndran, gle ndran hian mamaren ge, io ghengen le ndro i gle gous, heb surien bui. 7Ar homo ir ndounen longu momen, i hilou, i ngab, i ibdi memrad ber lang masi, io Jehova Ndorlaben aden ge, i ge, i nduro. 8Su ge, su de gin boro ndoui ber lang heb hian bui, su da heb rosan bui, su daiandramed, su ndremda sungsou, su ndremda beld, su da dungi su ndramed, su ndremda bahilou, logna asu i da le moan manden su ga med bersilie, be su do dari.
9Muren homo asu Angelo manondrdilmou, lus manondrdolo i da le nemesu, gus ad Jehova i do dari, i meher ndro io, i vong, i bai: Am ogo, io beg bosilieni le ndro uo ndurbihin, aga nambulen ad Ndurmeh. 10Muren i gin rui meluo, i hilou ndre bahali mandromai, i bosilieni me ndro io gor helian aga Jerusalem, i da gin meher le lang, i voh le boan. 11Engerang ad Jehova i do da ri, aga nounou aden. Enger sul mandromai, i dege bad i da hinganen, i dege iasbis. 12Gou manden ber bad i lugmuni gor, babi masongul e ruo i do da ri. Su Angelo masongul e rumou su da bogulue babi ogo, su gin hondre ngarsu ber um masongul e ruo asu Israel. 13Babi madolo i da le rai, babi madolo i da le hai, babi madolo i da le gub, babi madolo i da le ndolou. 14Su gin mengseni gou ber gor le bad masongul e ruo, bad mandromai, ngarsu Apostel masongul e rumou i do da le bad, aga Apostel ad Ndurmeh.
15Angelo i da gin vong me ndro io i hedi ndes ber gold, i beg dohongeni gou ma babi ber gor. 16Gou ber ndolou i eluen dege gou ber gub dogoro gou ber hai, ma ber rai i eluen dege gou ber ndolou, be i gin dohongeni, e lele, i gin dohongeni mails masobu e malimengad. I eluen dagara, le horo ma le horo, ma le belengan dagara lie. 17Muren i gin dohongeni gou ber gor: I vonei bram masanged e hangul e hahu, aga bram asu ndramed ma asu Angelo. 18Su gin mengseni gou ber gor ber Jaspis, su gin mengseni gor ogo le gold, gold ogo i dege glas, homo danen lele masigane i da lundie. 19Bad manden gou i medir ri su gin mengseni ber bad hian mamali ge bad si hanu aga bad Jaspis, bad maruo aga bad Savir, bad madolo aga bad Kalsedon, bad mahahu aga bad Smaragd. 20Bad malima aga bad Sardoniks, bad manono aga bad Karneol, bad manondrdolo aga bad Krisolit, bad manondruo aga bad Beril, bad manondrsi aga bad Topas, bad masongul aga bad Krisopras, bad masongul e si aga Hiasint, bad masongul e ruo aga bad Tmetist. 21Babi masongul e ruo ber gor ogo, babi si e si i neldun suh mandromai, sal ber gor i ber gold, i dege glas hian mamali ge. 22Io de gin ilndri um ad Jehova le lundiegor bui, Ndorlaben asu, i da ndoa le longu masigane, i ge, i um asu dagara Ndurmeh ad Jehova. 23Mernal i da le gor bui, vara bugane engerang ad Jehova i hinganen le ndro su. Ndurmeh aga i sul asu. 24Su gor masi su hivane le sul ogo, su King ber gor masi su huri longu asu hian mamali le lundiegor. 25Su de vadi babi ber gor ogo bui, i deh bing si e rang si. 26-27Memrad ber gor masi na gmeher le lundie. Heb longu momen, heb longu segdan de danen meher ri bui. Su da gin dohor ndro su beld. su da gin bahilou de dansu meher ri bugane. Su ge, Ndorlaben gin hondre su le buk ad Ndurmeh, i da mamaren ge, su gmeher ri.
Currently Selected:
Boharni ad Johanes 21: LLENT
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society 1956
