Boharni ad Johanes 17
17
Gelman le gor Babilon, le bihin sungsou ma le longu hendre balen manondrdolo.
1Malabo homo asu Angelo manondrdilmou, lus ber gold i da le nemesu, i vong me ndro io, i bai: Am ogo, io beg bosilieni le ndro uo gord ad Ndorlaben le ndro bihin sungsou, logna aden i da le ndran dsoln. 2Su King ber boan su gin bo longu sungsou le ndro i, su ber gor masi su gin hinen i dagara lie. 3I gin rui meluo, gin dulieni io le marboga. Io ilndri hom bihin ndre hors ramen ngarn momen dsoln, ngarn le boii Jehova i gin hondre le mandrn hors balen manondrdolo ad hors ma nusuen masongul i do da ri. 4Salo ad bihin i ramen ge, i gin nouni mandrn le memrad ber gold, ber bad i da hinganen ma le neldun suh, bondran ber gold i da le nemen i beb le longu momen. 5Su gin hondre ngarn le bombulen: Babilon manden, uo nanen asu bihin sungsou, uo nanen le longu hendre e hendre momen ber boan. 6Io gin ilndri bihin ogo i beb le ndrai asu lao helian ma le ndrai asu lao ad Jesu. Meluo i ieb be io gin ilndri i.
7Malabo hom Angelo i vong me ndro io: Desa meluam i ieb? Io beg boharni ndro uo longu le bihin ogo ma le hors bihin i lugdo im ri, le hors balen manondrdolo ma nusuen masongul. 8Hors ogo uo da gin ilndri, aga longu ber goru malabo i do da bui. Heb eluen bui muren i mbsig lie, be i gobad le lundiengai, muren Ndorlaben i gbieni i gane. Muren meluasu ndramed ber boan na ge ieb, ngarsu i da le buk ad Ndorlaben bugane, be su ilndri longu ogo, goru i gin me, malabo i do da bui, bersi muren i gmeher lie. 9I hian ge, ar homo i hanguruen longu ogoro monen ge. Balen manondrdolo aga i vonei bahali manondrdolo, aga lognan ad bihin. 10I vonei, su King manondrdilmou, su malimou asu su gin meher goru, su gin los gane. Homo asu i do da malabo, homo de gin meher masou. Be i gmeher, i do da le boan heb murai ge. 11Hors uo da ilndri, aga longu i da gin meher goru, i do da masou malabo, i meher muren, be su manondrdilmou gin me gane i homo asu la born ndro su manondrdilmou, i glos le moan manden. 12Nusuen masongul, uo da gin ilndri i, aga i vonei King mosangul, su de gin daui mburer asu le ndro su masou. Su ndoa dege su King ber boan, su de gin daui mburer asu le ndro su masou. Su ndoa dege su King ber boan, su la born ndro longu i da gin meher goru. 13Hanguruen asu bersi ge, su bo mburer longu aden ge, i da gin meher goru. 14Su ogo, su bo iil le ndro Ndurmeh ad Jehova, Ndurmeh ir ndounen su, Ndurmeh, aga Ndorlaben asu ndorlaben masi, i King asu King masi, su da sobani i le bahun, aga su lao dandendegei aden, i gin loh su goru, su aden ndangen.
15Muren i vong me ndro io: Ndran uo da gin ilndri, aga lognan ad bihin sungsou, i vonei gor ber hai, ber rai, ber ndolou ma ber gub, gor masi ber boan. 16Su masongul, aga nusuen ad longu, bihin i lugdo im ri, ndresu i mah le ad bihin sungsou, su gob bahun le ndro i, su gbehena memrad aden, su gien sengen aden, muren su gbieni i le moan, moan i dilmui sengen aden sumburdi. 17Jehova i gin daui hanguruen ogo le bergolsu, su ghinen i dege ogoro: Hanu su mugueni bihin, su hengen ndoui asu le ndro longu, i da gin meher goru, Jehova ha lengi, longu masi na gmeher dege bohon gin bai: 18Bihin uo da gin ilndri, aga i vonei gor mandromai i da gin ndounen su King masi ber gor, i ndorlaben asu.
Currently Selected:
Boharni ad Johanes 17: LLENT
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society 1956
