Judas 1
1
Heb nongen hanu.
1Io Judas, hom lao dandendegei ad Jesu Kristo, io ndern ad Jakobus, io beani nongen hian le ndro su, Ndorlaben gin loh su, Jehova i Damen adu, golnisden su, i bogulue su, i ghengen su le ndro Jesu Kristo. 2Gahaloseli aden, mandri e golnisden aden i da ge ndro mu gle bulhe.
Mbue somui le asu misionare bahilou.
3Mu ndere hian, io ha leng hondre le ndro mu le memrad adu masi ber lang. Heb ngasen i da le bergolo, i vong, io ghondre le ndro mu, io ge ndemani mu, mu ibdi bahun ad Ndorlaben, dege su lao aden helian masi su ghinen i, aga Jehova i ha lengi. 4Su ndramed holel su gin meher le ndro mu, su gohoni bern asu, su gina momen ge, gord ir belengen su, aga su ndramed dege ogoro: Su gin bieni Jehova, su gin belueni golnisden ad Jehova le longu asu momen, su hangaini Ndorlaben adu, Jesu Kristo.
5Io ha leng, mu hanguruen leri, longu hendre e hendre mu masi danmu: Ndorlaben i gin rumburdi su Israel le nemesu Egipten, aga ndangen, su gina les le marboga, su ginmad, su de gin boro ndoui ad Ndorlaben bui. 6I gin hosi su Angelo su da gin bieni gor asu, su da gin bo longu momen, i gin daui su le gor ndrogmoan, su belengeni gord ad Ndorlaben. 7Su ndramed ber gor ademu su dege ber Sodom e Gomora, su bo longu momen dege su ber gor Sodom, su hangungerou sengen asu ndramed ge, gord ir belengen su, dege i gin meher ndro su Sodom. Su gina momen ge le moan manden.
8Su ndremda inhini ogo su bo momen le sengen asu dege su ber goru, de delengasu le nongen ad hom Ndorlaben bui, su boii ndoui ber lang. 9Ndurhian asu Angelo ngarn Migael, i da gin bo iil le ndro beld Satan, be i beg behena numnuen ad Mose, i de gin boii beld Satan le nongen aden bui, be sor gin vong me goure. I gin vong le ndro i: Ndorlaben i gob gord le ndro uo. 10Su ndramed gorbo su boii longu masigane de dansu heb leri bui. Su dege bu, su dege mui, hanguruen longu momen ber boan. 11Su gina momen gane. Su gin dogi sal ad Kain, su irgai le sal ad Biliam ge. Su hanguruen memrad ber boan, su na gmed dege Korah le bahun asu. 12Su ndramed gorbo su lugdo le mandrgosgeao ademu, be mu la goure, beg ien gan anmu, beg hanguruen golnisden ad Ndorlaben. Bombulsu i de mesi bui, su lugdo la born ndro mu, su ndramed segdan ge. Su dege ndoulang, heb lengen i do da ri bui, ior i buldi su sidesi. Su dege gei, heb sengen bui, heb louge bugane, su ginmad maberuo. Dege su gei su gin los, be ior manden gin ngoh. 13Su dege noui ber ndas, su bieni longu gulgon molhege le leng su dege biri ber lang, su da dulieni su ndramed le sal momen ge. Ndrogmoan manden ir belengen su, su do da ge ri sidesi. 14Nongen ad Henog i da ber lain ad Adam, be su damen aden manonou ginmad. Aga le ndro su lie, be i vong: Ndangen, Ndorlaben i gmeher le molengasu mabosungul, 15i beg bo gord le ndro su ndramed momen masi, i surien longu asu momen masigane, su da gin hinen i, i surien nongen asu momen masi, su da gin bosoui ri. Su ndramed momen ge, su da gin bieni Jehova. 16Su ndramed gorbo su bangondrngondr sidesi, heb longu i da monen le ndro su bui, su da hanguruen longu asu ge, su ha bosoui nongen dsoln, su bamugueni su ndramed ge, be su hanguruen memrad asu.
17Mu ndere hian, ghanguruen nongen asu Apostel ad Ndorlaben adu Jesu Kristo, su da gin boharni le ndro mu. 18Sidesi su gin bai: Bersi muren su ndramed momen su gmeher, su da gin bieni Jehova, su dogi dege su ha lengi. 19Su ndramed gorbo sidesi su ilgi bahun le molengamu, Meluan Helian i da ndro su bui, su hanguruen molhege le bergolsu. 20Mu ge, mu ndere hian, gboro ndoui ber lang, bo raring gle ndoui ad Meluan Helian. 21Golnisden ad Jehova i da ge ndro mu, hian mu gmenda gle golnisden ad Jehova, ir belengeni gahaloseli ad Ndorlaben adu Jesu Kristo, i da hinen mu mamaren ge sidegesi. 22Ibdi gahaloseli le ndro su, de dansu boro ndoui ber lang hian masou. 23E rumburdi su, e rui su glendi le moan. Su ge, de dansu Ndorlaben bui, ibdi gahaloseli le ndro su lie. Ha noh su, debosan mu segdan dege su, mbue hedi heb longu asu. 24I ge, i danen bogulue mu le sal ademu, mu de glos bui, i danen bogulue mu le longu masi momen, mu gmeher le bormarn ad Ndorlaben Jehova, mu ha mugmug manden ge. 25Iou bamugueni i ge, i Ndorlaben homo ge, i gin rumburdi du le ndoui ad Ndorlaben adu Jesu Kristo. Ndoui aden manden ge, engerang aden ge, ndoui aden ber nandugian, ber range lie, i da ge ndro i bing si e rang si sidegesi. Amen.
Currently Selected:
Judas 1: LLENT
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society 1956
