Apostel 27

Paulus i dogi le gor Rom.

1Su da gin bo mburer, su beg dogi le gor Italia. Mburer asu boen, su gin daui Paulus, ma su holel ber kalabus le ndro hom polismaster asu polisboi ad Sesar, ngarn Julius. 2Ndol heie gin meher le gor Adramitium, i da hilou sidesi le su gor masi, su da baghege le leng ber Asia mandehe. Iou gina le ndol ogo, iou bieni gor Sesarea. Hom gamel ngarn Aristargus i homo asu Masedonia ber gor Tesalonik i le born ndro du le ndol. 3Bing si muren iou gin meher le gor Sidon. Julius, i da gin hanguruen hian ge le ad Paulus i gin somui ri, Paulus i gbieni ndol, i ilndri su gous aden, su do da le gor. Su ghengen le ndro i le gan ansu. 4Boen iou gin bieni gor ogo, ndol adu gin hilou baghege le reda Sipern, le rai. Ior manden beg ndounen du. 5Be iou da gin hilou baghege le leng ber Silisia e Pamvilia, iou gin meher le gor Mira, i da Lisia. 6Polismaster i ilndri ndol heie manden ber Aleksandria. Be i gin hirong i, ndol ogo beg hilou le Italia, iou masi gina le ndol ogo. 7Ndol adu i de gin hilou roud bui, iou da le bing holel le ndas, boen iou gin meher baghege le reda Knidus. Heb ior hian bui, iou da baghege le reda Kreta, baghege le gor Salmon. 8Io da gin bo mburer manden ge, iou gin meher baghege le leng, su bosoui Paseds mamali ge, gor si i da baghege ngarn Lasea. 9Rang holel gineao, dandu hilou bui, iou do da le gor. Taim hian le hilou le ndas baghege boen. Uru asu Juda i gineao. Paulus i vong le ndro su, i bai: 10Mu gamel, io dono i hian, longu momen mabosanged ir belengen du le ndas manden, ndol adu na ge momen, dagara memrad adu masigane i da le ndol, ma iou ndramed, iou do da le ndol ogo. 11Polismaster i de delengan le nongen ad Paulus bui, i hirong nongen ad ndorlaben ber ndol ma ad ndremda mburdol, sor gin bai, taim hian ge malabo. 12Paseds ogo i de heb hian bui, le hai manden i da beg meher. Baghege masigane ha leng hilou beg meher le Veniks, gor si ber Kreta. Hai manden de danen meher le gor Veniks bui.

13Be heb gub gin ngoh, su masi gin hanguruen, aga taim hian le hilou le ndol. Su gin rui anker ber ndol le belengan, ndol adu i hilou baghege le leng le reda Kreta. 14Heb eluen bui muren ior mandromai i da ngoh, su bosoui i Eurokliton, aga ior ber ndolou. 15Ior ogo i hedi ndol adu, ndremda mburdol de danen ndounen ndol bui, i hilou ge molhe. 16Iou da gin meher baghege le reda mandehege ngarn Klauda. Iou da gin bo mburer manden ge, beg hosi ndol mandehege i da le ndol adu manden. 17Iou gin rui le belengan, iou gin hosi ndol adu le vas manden ge ndoun ndoun, iou ha noh ndol adu hilou le mosou, su gin hedi belei gineao, ndol adu i hilou ge molhe. 18-19Ior mandromai i da ngoh lobing gane. Mabing, iou gin bieni kago masigane le ndas, ribing iou gin bieni longu masi ber ndol le ndas lie. 20Le bing holel, heb mernal bui, heb biri bugane. Ior ge mandromai i da ngoh lobing e lorang, iou gin hanguruen, iou masi na glos.

21Homo de gin ien heb gan bui, homo i de mundrul bugane. Malabo Paulus i hilou le molengasu, i vong le ndro su, i bai: Mu gamel, desa delengamu le nongen ordo bui, io da gin bai, mbue bieni reda Kreta. Longu ogo masigane de meher de la ndro du bui, be iou da le reda Kreta. 22Dandu hinen heb longu bugane, hian, mbue bieni ndoui ademu gane, iou ndramed ber ndol ogo, iou na gmed le ndas bugane, ndol adu ge, i na glol. 23Lobing ogo, Angelo ad Jehova gin meher ndro io, Jehova gin rendegien i, aga Ndorlaben ordo, io da bo mburer aden ge. 24I gin bai me ndro io, Paulus mbue uo go noh, uo ha dogi le ndro Sesar. E lele, Jehova i da gin daui su ndramed masi gle nemem. 25Mu gamel masi, mbue mu go noh, io dono longu masi na gmeher, dege Angelo ad Jehova gin bai. 26Hanu ndol adu na gdud le reda si.

27Bing masongul e hahu boen, iou da le ndas Adria. Malabo su ndremda ndol, su hanguruen gor si i da baghege, ndas eluen bui. 28Su gin seslaini, su gin ilndri ndas manden bugane. 29Malabo su noh, ndol i hilou le moso. Iou gin bieni anker mahahu le ndas, iou gin belengeni madourang. 30Malabo su ndremda ndol su beg bieni ndol asu, su beg vob. Su lulueni ndol mandehe le ndas, su ha leng, iou ghanguruen, su gbieni Anker le ndol horo lie le ndas. 31Paulus i vong le ndro polismaster ma le ndro su polisboi, i boi: Be su ndramed ogo su de giroh bui, mu masi na glol, mu gina momen ge. 32Malabo su polisboi sindrdi vas ber ndol mandehe, ndol gin los le ndas. 33Madourang masou, Paulus i vong le ndro su masi, su gien heb gan hanu, i bai: Eruar bing masongul e hahu gineao, mu de gin ien heb gan bui, mu da gin noh ior manden ge, heb ndoui ademu bugane. 34Io ha lengi, mu gien gan anmu hanu. Muren mu ndoa lie, be mu hilou le leng. Ghanguruen i, iou masi horuan ge, heb lomon ad homo ma homo i de glol le ndas bui. 35Nongen aden boen, i hedi suslong, i bo lodu le ndro Jehova le bormarsu masigane, boen i iendri heb suslong, ma i ien. 36Be su gin ilndri Paulus, i da ien gan, su gin hedi heb gan lie le ansu. 37Iou marunged, manondrdilingul e onou le ndol adu. 38Gan ansu boen, iou gin bieni gan ansu masigane sumburdi le ndas.

39Mabing, su gin ilndri gor si i da manan hebe, de dansu i bui sehe gor. Su gin ilndri heb paseds ndas manden bui, su ha lengi, ndol i hilou gle leng. 40Su gin sindrdi vas le anker, anker gin los le ndas. Su gin rumburdi vas ber mburndol su daui belei mandehe, su hosi i, ndol i hilou le leng. 41Ndol i gina le logna duruon, ndol de danen hilou hebsa bui. Noui manden ge i ndumbue ndol. 42Malabo su polisboi beg daii su ber Kalabus, debosan homo i ngangai, i vob. 43Polismaster i mbueren Paulus na gmed. I sendraini su polisboi le daii su ber kalabus. Su ge, dansu ngangai, i ha somui su gohis le ndran, su hilou gle leng. 44Su holel de dansu ngangai bui, su hedi bergou ber ndol ma gei, ma su hilou gle leng. Su masigane su gin meher le leng, homo de gin lol bui.

Currently Selected:

Apostel 27: LLENT

Highlight

Copy