Apostel 26

Paulus i vong le bormarn ad Vestus ma Agripa.

1Agripa i vong le ndro Paulus: Ha bosoui longu adem me ndro du malabo. Paulus i da gemdi le nemen, i vong le ndro su, i boi: 2Ndangen io hian, io horuan ge, io dono bosoui longu ordo le ndro uo King Agripa, longu hendre e hendre, su Juda su beg bo gord me ndro io. 3Uo ge, uo danem bern asu Juda hian ge. Io ha soling ndro uo, hian, hirong nongen ordo malabo.

4Io da le dogrosu Juda gle mbunana ge. Sidesi io da le gor Jerusalem. 5Su Juda dansu leri. Be nongen asu monen, dansu bai le ndro uo, io homo i da voaniso Jehova ma lodu aden ge, io homo asu Pharisi. 6Malabo io do da le gord asu le longu hendre ge, Jehova i da gin bai goru, le ndro su damdu, 7ma le ndro su ndurn masi ber um masongul e rumou. Io da gin lodu le ndro i, dege su, lobing e lorang. O King Agripa, le longu ogo ge, su Juda bo iil me ndro io. 8Aga longu hendre bahilou, be io bai, Jehova i ghingeni, de derbe? 9Mahanu, io hom ndremda rah ad Jesu ber Nasaret, io gin bo iil le ndro i ge. 10Io da gin bo momen le gor Jerusalem dagara, io gin hedi pas asu ndurhian io da gin daui su lao ad Jesu Helian le kalabus. Be su gin daii su, io da gin somui ri. 11Io da gin rui su le numo hernou asu masi, io gin ndounen su, io gin rii su, su gbieni Ndorlaben asu Jesu, io gin bo iil le ndro su ndoun ndoun. 12Bersi io da hedi pas asu ndurhian le gor Damaskus. 13O King, be io da le sal, sul mandromai ber lang i da gin me, engersul ogo gin hinganen me ndro io, ma le ndro su masi, su do da le sal. Longu ogo i da gin meher le dogrorang. 14Be io gin los le boan, io gin hirong ngasen ad homo, i da gin bai me ndro io, ma le nongen asu Hebru: Saul, Saul, desa uo bo iil me ndro io ie? I beruan le ndro uo, le ha dogi sal adem. 15Io gin bai: Ndorlaben uo sie? Ndorlaben i bodeie: Io Jesu uo da bo iil me ndro io. 16Edne, al dogi, io da gin mbsig le ndro uo, io beg hinen uo le lao ordo, io ha leng uo boharni le ndro su longu masi, uo da gin ilndri malabo, ma longu hendre e hendre io beg henunuen uo. 17Io da hedi uo glendi le molengasu Israel, ma le molengasu Haiden, io beg rendegien uo le ndro su Haiden. 18Begmarsu i greu, su do gbieni gor ndrogum ge, su girgai le sul ber lang, su gbieni ndorlaben asu Satan, su ibdi Jehova, boen io beg esbui longu asu momen giao, su hilou, su ha ngab memrad ber lang, dege su masi su da gin boro ndoui ordo. 19O King Agripa, delengo le gelman ogo ber lang. 20Io gin boharni le ndro su gor Damaskus, ma le ndro su ber gor Jerusalem, le ndro su ber gor hoger e hoger asu Juda, dagara le ndro su Haiden, io gin soling ndro su, su garbelueni bern asu, su ibdi Jehova gle Ndorlaben asu, su gob mburer hian monen ge, mburer i da vonei le bern houen. 21Le longu ogo su Juda gin hosi io le lundieum ad Jehova, su ha leng daii io. 22Jehova, i ge, gin sobani io mabenan range, i de gin bieni io bui. Io da boharni le ndro su labenen, ma le ndro su ndramed molhege longu ber lang. Nongen ordo, i dege nongen asu Provet, i dege ad Mose lie, io da gin boharni: 23Mesias i na gmed ge le iil asu, boen i gedne lie, hanu le asu masigane. I de boharni le ndro su, su Haiden ha dogi le sul ber lang.

24Be Paulus gin vong nongen dagara, Vestus i loh, i boi: Paulus uo ngongong, longu masigane, su gin henunuen uo, i ghinen hanguruen adem momen. 25Paulus i bodeie: Uo Vestus hian, nongen ordo i ngongong bui, io da bosoui nongen monen ge. 26King ogo i danen longu masigane, nongen ordo io gin bosoui le ndro i ge, i danen leri. Longu ogo masigane i de gina le ndro homo ge bui, su gor masi dansu leri. 27King Agripa, uo danem boro nongen le su Provet? Ehe, io dono uo danem boro i. 28Agripa i vong le ndro Paulus, i boi: Uo gin hinen io baghege le homo asu Kristen. 29Paulus i bodeie: Io ha lengi manden, heb eluen bui muren uo, ma su masi gorbo su dege io. Longu hendre io mbuere mu ibdi i, aga sen ordo, su da gin hosi io ri.

30Boen King, ma ndorlaben ber Sesarea, Bernise ma su masigane su dne, su bieni um ogo. 31Be su da le sal, homo i vong le ndro homo: Ndramed ogo i de gin hinen heb longu momen masou i da vonei kalabus aden. 32Agripa i vong le ndro Vestus, i boi: Io ha leng rumburdi ndramed ogo, dandu hinen i bui, i ha lengi gord ad Sesar ber Rom.

Currently Selected:

Apostel 26: LLENT

Highlight

Copy