Apostel 25

Paulus i ndemani Vestus i daui gord aden le ndro Sesar.

1Ar Vestus gin ibdi mburer aden houen, i bieni bing madolo muren Sesarea, i gobad le gor Jerusalem. 2Su ndurhian, ma su labenen ber gor, su bosoui le ndro ndorlaben longu masi le Paulus. 3Su beg bamugueni Veliks, be i ha somui, Paulus i gmul le gor Jerusalem, su beg bo gord le ndro i le gor Jerusalem ge. Su gin hanguruen le bergolsu, su beg daii Paulus, be i da le sal le gor Jerusalem. 4Vestus i vong le ndro su, i bodeie: Paulus i do da le gor Sesarea le kalabus, heb eluen bui muren io beg mul le gor Sesarea. 5Boen i bai: Be io da dogi le gor, su labenen adu holel dansu dogi la born ndro io, su gob gord le ndro Paulus le gor Sesarea. I beg dieni Paulus, be i da gin hinen longu momen. 6Be i da le gor Jerusalem le bing manono, de le bing masongul i mul le gor Sesarea. Si muren, i loh Paulus, beg bo gord le ndro i. 7Be Paulus gin me, su Juda lugmuni i, su da gin meher le gor Jerusalem, ma su da bosoui longu momen mabosanged, Paulus i da gin hinen i. Nongen asu i heb monen bui. 8Paulus i vong le ndro su, i bodeie: Io de gin bo momen le ndro su Juda, de le ndro lodu asu bui, dagara gle um ad Jehova bui, ma le ndro Sesar dagara lie bugane. 9Vestus i beg mugueni su Juda, beg somui le soling asu, i ndemani Paulus, i ha leng gobad le gor Jerusalem, su labenen su gob gord le ndro uo le gor asu de bui? 10Paulus i bodeie: Io da le gord ad Sesar ge, io ha lengi uo gdieni io. Io de gin bo, longu momen de la ndro su Juda hebsa bui, aga uo danem. 11Be io da gin bo longu momen, i vonei uo gdaii io, io somui ri, io na gmed; be nongen asu, su da gin bosoui, i bahilou ge, io mbuere dogi le ndro su. Io ha lengi gord ad Sesar ge. 12Boen Vestus ma su ndorlaben ber Sesarea, su gin vong heb nongen le goure, muren i vong le ndro Paulus, uo ha lengi gord ad Sesar ge, hian uo girgai le ndro i.

13Bing holel muren, King asu Juda, ngarn Agripa sor Bernise, bison ad Agripa, sor gin meher le gor Sesarea, beg ilndri Vestus. 14Sor do da le gor Sesarea le bing holel. Vestus i bosoui le ndro King longu le Paulus, i vong, i bai: Be Veliks gin bieni gor Sesarea, i de gin rumburdi Paulus le kalabus aden bui. 15Be io da gin meher le gor Jerusalem, su ndurhian ma su labenen asu Juda gin ndemani io, su ha leng bo gord le ndro Paulus. 16Io gin bai le ndro su, aga i bern asu Rom bui, le dieni hom ndramed, be su de gin danoni heb longu hendre momen bui, i de danen daui Paulus le nemesu masou, su gmeher, su gabsou longu masigane le gord. 17Be su gin me, bing si muren io da gin bo gord le ndro ndramed ogo. 18Su da beg bo gord le ndro i, de dansu danoni heb longu momen ad Paulus bui, dege io gin hanguruen. 19Su beg dieni i le longu hendre e hendre asu lodu. Su da gin bosoui longu le Jehova, ma longu le ad homo, ngarn Jesu, i do da le boan bui, i da ginmad. Paulus, i ge, i boi, i da mamaren ge. 20Io mbuere bo gord le ndro Paulus le lodu asu, aga longu hendre, io de dono i bui. Io gin ndemani Paulus, i ha leng dogi le gor Jerusalem de bui, su gob gord le ndro i le gor Jerusalem. 21Paulus mbueren, i ha lengi gord ad Sesar ge, i beg gsou le kalabus, mabenan su gin rendegien i le gor Rom. 22Malabo Agripa i vong le ndro Vestus: Io ha leng ilndri ndramed ogo, beg hirong nongen aden. Vestus i bodeie: Mo, uo danem hirong i.

23Bing si muren, Agripa sor Bernise gin nouni mandrsor hian manden, boen su gin me le logna gord. Su ndorlaben asu polisboi ma su polismaster, dagara su labenen ber gor, su do da le logna gord. Vestus i loh Paulus, su polisboi gin dulieni i le dogrosu. 24Boen Vestus i vong, i bai: King Agripa, ma su ndorlaben masi mu gorbo, e lele, aga ndramed, su Juda masi ber gor Jerusalem su gin soling me ndro io, io gdaii i, mbueresu i dandon le gor. 25Io de gin danoni heb longu momen, su bai, i gin hinen i, bugane. Paulus i ha lengi gord ad Sesar ge, malabo io beg rendegien i le gor Rom. 26Io de dono hondre heb longu momen ad Paulus bugane. Malabo io gin dulieni i le bormarmu masi, hanu le ndro uo King Agripa. Uo danem bo gord le ndro i, be uo gin danoni longu hendre momen io dono hondre le ndro Sesar. 27Aga i momen ge, be io da rendegien le ndro i homo ber Kalabus, be io de dono heb longu aden bugane.

Currently Selected:

Apostel 25: LLENT

Highlight

Copy