Apostel 24

Gord ad Paulus i da le gor Sesarea.

1Bing malima muren, ndurhian Ananias, ma su labenen holel, dagara hom ndremda gord, ngarn Tertulus, su iao le gor Sesarea. Su beg bo gord le ndro Paulus. 2Be su gin dulieni Paulus le ndro ndorlaben, Tertulus i bo gord le ndro Paulus, i bai: 3Veliks, no ndorlaben hian ge, uo da bogulue gor adu gle hian, sidesi, uo da gin hengen me ndro du gle hian, iou mugueni uo gleri. 4Iou da beg bosoui nongen mabosanged bugane, iou beg vong heb nongen mandehege, hian hirong nongen adu. 5Ndramed ogo i momen ge, i hom ndremda bahun, i loh su ndramed me goure le gor masigane, i homo asu labenen ber lodu houen, su da bosoui i, lodu asu Nasaret. 6I gin me, beg bo momen le ndro um ad Jehova, iou gin ilndri i, boen iou gin hosi i, 7hendre ge, polismaster Lisias gin me, i dulieni Paulus glendi. 8Uo danem ndemani i longu hendre ogo, muren uo danem nongen adu i monen de bui. 9Su Juda masi, su da gin vong dagara lie. 10Ndorlaben i gemdie Paulus, boen Paulus i vong le ndro su, i bai: Io dono, uo da bo gord le ndro su ndramed ber gor ogo, le Kristmas mabosanged, io de noh hebsa bui. Io dono, uo gob gord monen ge me ndro io. 11E ndemani su, iou da le gor asu Jerusalem, le bing masongul e ruo ge, io gin me, beg lodu. 12Homo i da gin ilndri io bui, io da gin dulieni homo asu Haiden le um ad Jehova. Homo i de gin ilndri io bui, io ha bo iil le ndro su. 13Nongen asu i heb monen bui, su da gin bosoui le ndro uo. 14Longu hendre io beg boharni le ndro uo, io da gin ibdi lodu houen, io de dono bieni nongen asu Provet, ma nongen ad Mose i da le Buk Helian bui, io da lodu le ndro Jehova. 15-16Jehova Ndorlaben ordo, i Ndorlaben asu lie. Ma io dono, su ndramed su gedne lie le ngad asu, boen Jehova i gob gord le ndro su, sidesi io ha leng dogi monen ge le bormarn ad Jehova, ma le bormarsu ndramed lie. 17Eluen io da le gor Jerusalem bui, malabo io gin dogi le gor, io beg dohor le ndro Jehova, ma io beg daui heb moni asu le ndro su lao ad Jesu. 18Io do da le um ad Jehova ge, io gin bandri, su mabosanged su de gin meher ndro io hanu bui, be su gin ilndri io. 19Su Juda holel ge ber Asia mandehe, su gin ilndri io, su ogo, su gmeher ndro uo, su gobharni, longu masi su da gin ilndri. 20E ndemani su gorbo lie, goru iou da le gord asu, sehe longu momen su gin danoni, io da gin hinen i. 21Longu hendre ge dansu hanguruen i, be io da le molengasu, io gin loh, io gin bai: Su da ginmad, su gedne lie, le nongen ogo mu beg bo gord me ndro io. 22Veliks i de dieni Paulus bui, i danen longu masi le su lao ad Jesu, i vong, i bai: Be ndorlaben asu polisboi, ngarn Lisias na gmeher, io beg hinen gord ogo gbomud. 23Boen i vong le ndro polismaster, i bogulue Paulus, i de ndoun le ndro i bui. Su gous aden dansu ilndri i le kalabus, dansu sobani i.

24Bing holel muren, Veliks ma nambulen Drusila, i hom bihin asu Juda, beg hirong heb nongen ad Paulus. Su loh i, i gabsou le ndro su longu le Jesu Kristo. 25Be Paulus gin bosoui le ndro su heb longu monen ber lang, longu le bergoln rosan, ma longu ber gord i da beg mehere, meluan ad Veliks i irgu, i noh, i bai: Malabo uo giao, bersi muren le rang hian io beg loh uo lie. 26I da gin hanguruen le bergoln, Paulus beg hengen le ndro i heb moni. I gin loh i bersi ma bersilie, i hirong nongen ad Paulus. 27Kristmas maruo muren, hom ndorlaben gin meher le gor Sesarea, le surien ndorlaben Veliks, ngarn ad ndorlaben houen Porsius Vestus. Veliks bamugueni su Juda, i de gin rumburdi Paulus bui, be i gin bieni gor Sesarea. Paulus i dandon kalabus.

Currently Selected:

Apostel 24: LLENT

Highlight

Copy