Apostel 21

Paulus i da le gor Tirus e Sesarea.

1Iou gin bieni su, iou gina le reda Kos, bing si muren le Rodus, boen le gor Tatara. 2Be io gin danoni ndol heie, i beg iao le gor Vinisia, iou hedi ndol ogo, iou gineao. 3Iou gin ilndri reda Sipern, i da manan ge, i da le nemen gameao adu. Ndol adu gina le gor Tirus. Su beg hurdi memrad ber ndol ogo le leng. 4Le gor ogo, iou gina le ndro su lao ad Jesu, iou da ndro su le wik si. Su lao ad Jesu ber gor ogo, su beg sendraini Paulus le dogi le gor Jerusalem. Bersi ma bersilie, Meluan Helian gin boharni le ndro su, longu i da beg meher ndro i. 5Wik si boen, iou ha leng dogi, su lao ad Jesu, nambulsu, ma ndursu masi su la born ndro du le sal, gin dulieni du le marbahon gor. Be iou da le leng, iou godurhu ngondrnegedu, iou gin lodu. 6Boen iou bieni su, iou gina le ndol, su ge, su gin mul le gor asu. 7Boen iou gin dogi, gin meher le gor Tolomais. Io gin ilndri su lao ad Jesu ber gor ogo, iou do da le um asu le bing si. 8Si muren, iou gin dogi, gin meher le gor Sesarea. Iou gina le um ad Philipus, ndremda henunuen su, i homo asu manondrelimou, su da gin bo mburer le gor Jerusalem, le gan ansu lao ad Jesu memrad asu bui. Iou da le um aden le bing holel. 9Su ndurbihin mahamou aden ge, su Provet. 10Bersi, be iou da le gor Sesarea, hom Provet, ngarn Agabus ber Judea gin meher ndro du. 11I hedi led ad Paulus, i hosi nemen e ndegen leri, boen i vong: Aga nongen ad Meluan Helian: Gamel, led ogo aden ge, su Juda ber gor Jerusalem su ghosi nemen, dege io da gin hosi nemo e ndego. Boen su daui i le nemesu Haiden. 12Be iou da gin hirong nongen ogo, iou soling ndro i, dagara su lao ad Jesu ber gor ogo su soling ndoun ndro i, mbue ir dogi le gor Jerusalem. Paulus i bodeie: 13Desa mu dang dagara, mu ghinen i, bergolo i da beruan ge? Io ha leng dogi, io de noh longu asu bui, gonan su ghosi io, be su gdaii io le gor Jerusalem, io na gmed gle ngarn ad Ndorlaben Jesu. 14Iou da heb ndoa le ndro i bui, iou simge, iou gin bai: Longu masi na gmeher, dege Ndorlaben ha lengi.

Paulus i da le gor Jerusalem e Sesarea.

15Bing holel ogo boen, iou gobad le gor Jerusalem. 16Su holel asu lao ad Jesu ber gor ogo, su gin dulieni du le ndro homo, ngarn Mnason ber Sipern, i hom lao ad Jesu, i barmanda. I gin somui le adu, iou da le um aden. 17Su lao ad Jesu ber gor Jerusalem, su mugueni du, be su gin ilndri du. 18Bing si muren, Paulus ma iou masi gina le ndro Jakobus. Su labenen masi ber lodu su gin me goure. 19Be Paulus gin ilndri su, i bosoui le ndro su longu masigane, longu hendre e hendre Jehova i da gin hinen le molengasu Haiden, gle mburer ad Paulus. 20Be su gin hirong nongen ogo, su bamugueni Jehova, boen su vong le ndro Paulus: Ndere hian, uo ilndri, su masobu e masobu asu Juda su gin boro ndoui ad Jesu Kristo, su masi delengasu le nongen ad Mose lie. 21Ngarnongen gin hilou le ndro su, uo da sendraini su Juda, su da le gor asu Haiden, nongen le Mose. Uo mbuerem, su sindrdi mandrsu ndurgamel asu, su ghanguruen bern adu Juda. 22Uo da vong sa malabo? Su mabosanged asu, su beg me goure le gor adu, boen su hirong i, uo do da le gor. 23Ha hirong nongen adu, hian, ghinen i dege iou bai le ndro uo. Su gamel mahamou su gorbo, heb bandri i da ndro su. 24Hian uo la born ndro su, uo bandri lie. Boen uo sobani su gle moni adem, be su beg sindrdi lomon asu. Muren su masi dansu lele, ngarnongen i da gin hilou le ndro su, aga bahilou asu, dansu i, uo da hanguruen bern asu Juda. 25Su Haiden, su da gin belueni bern asu, su lao ad Jesu, iou da gin bai le ndro su goru, gin hondre le ndro su, mbue su dirhor le ndro su beld, mbue su gien ndrai, mbue su sungsou. 26Paulus i la born ndro su mahamou, i ha bandri dege su. Bing si muren, i gina le um ad Jehova beg bosoui bandri aden le ndro su ndremda dohor. Beg hengen le ndro su longu le dirhor, le hinen boen bandri asu mahamou.

Su hosi Paulus.

27Wik si muren, su Juda ilndri Paulus, su da gin meher le gor Asia mandehe, le um ad Jehova, su loh su ndramed masigane le goure, boen su hosi Paulus. 28Su loh le ngasen ndoun, su bai: Mu gamel ber Israel, am sobani du. Ndramed gorbo i da bohernou le ndro su ndramed le gor masigane, su gbieni nongen ad Mose, su hangaini du, ma logna ad Jehova gorbo. I da gin dulieni homo asu Haiden le lundieum adu, um adu gina momen ri. 29Su gin ilndri hanu, homo asu Evesus, ngarn Trovimus, i da le gor Jerusalem, le born ndro Paulus. Malabo su hanguruen Paulus gin dulieni i le lundieum ad Jehova. 30Su ndramed masi ber gor gin hilou me geherong, su hosi Paulus, su rui i le lundieum ad Jehova lendi, boen su vadi babi ber um. 31Su ha leng daii Paulus. Ndorlaben asu polisboi gin hirong gle longu ogo, su masi ber Jerusalem gin hilou me goure. 32Malabo i loh su polisboi ma su polismaster, su hilou le ndro su. Be su ndramed gin ilndri ndorlaben asu polisboi ma su lao aden, su de rii Paulus bui. 33Ndorlaben asu polisboi gin me, i hedi Paulus, i hosi i le sen maruo, boen i ndemani i, i sie? I da gin bo sa le ndro su? 34Su masigane su da gin me goure, su lug bohosu manden ge, su loholo ndoun, ngasen asu ndramed gina manden ge. I de danen hirong heb longu hendre monen bui, i bai le ndro su polisboi, su dulieni i le um aden i da ndre bahali. 35Su ndramed su besbas, heb salsal bui. Su polisboi hedi Paulus le hauesu. 36Su ndramed masi su loholo ndoun, su boi: Rii i, gu daii i. 37Be su beg dulieni Paulus le lundieum, i ndemani ndorlaben i boi: Uo ha somui, be io vong heb nongen le ndro su, de bui? Ndorlaben i bodeie: Uo danem nongen asu Grek? 38Uo ndramed ber Egipten bui? I da gin loh su ndramed me goure, i gin dulieni su mahabou su da gin bo iil le ndro su ber gor le marboga. Uo sie? 39Paulus i bodeie: Aga io bui, io homo asu Juda ber gor Tarsus, bo domo i homo asu Rom, ber Silisia. Ha somui, io beg bosoui heb nongen le ndro su. 40Ndorlaben gin somui ri, boen i iao heb ndi la born ndro su masi, i gimdie su le nemen, su masi su simge. Boen i vong le ndro su le nongen asu Hebru heb nongen ogo:

Currently Selected:

Apostel 21: LLENT

Highlight

Copy