Apostel 20

Paulus i da le gor Masedonia e Greg, boen i mul le gor Troas e Milet.

1Iil asu Evesus gina boen, Paulus i loh su lao ad Jesu me goure i bohernou le ndro su, i bieni su, boen i dogi le gor asu Masedonia. 2Be i da gin dogi le horo ma le horo, i sobani su Kristen le bohernou aden, boen i dogi le gor asu Grek. 3I do da le gor le vara madolo, boen i beg hedi ndol heie, beg dogi le gor Siria. Be Paulus gin hirong i, su Juda beg daii i, i mul le gor asu Masedonia. 4-5Sopater ber Berea, ndur ad Pirus, ma Aristargus e Sekundus ber Tesalonik, dagara Gaius sor Timotius ber gor Derbe ma Tigikus sor Drovimus ber gor Asia mandehe, su la born ndro Paulus le sal aden, Tigikus sor Drovimus sor gin me muren, sor gin belengen du le gor Troas. 6Uru asu Juda boen, iou bieni gor Philipi. Bing malima muren, iou gin meher ndro sor le gor Troas iou do da le gor le bing manondrdolo.

7Le sande asu Kristen iou gin me goure, beg ien gan ad Jesu Kristo. Paulus ibohernou le ndro su mabenan dogrobing, i ha leng dogi le gor manan mabing. 8Su gin hesul lamp mabosanged i da le um su do dari. 9Hom ulhou, ngarn Eutikus, i da gin lugdo baghage le vindo. Mediriu ndoun gin meher ndro i, be Paulus i gin bohernou le ndro su eluen dagara. Be i da gin medir i gin los, gina boan. Su gin hedi i, gin hanguruen i ginmad. 10Paulus i la ndro i, i bogarni i, i vong le ndro su, i boi: Mbue mu noh, heb ndoui i da le bergoln. 11I gin bieni i, beg iendri suslong le ndro su, su beg ien gan. Be i gin ien gan hebe, i bohernou le ndro su, mabenan madourang. Boen i ha leng dogi. 12Ulhou i da mamaren lie, su masi mugmug leri.

13Iou masi iou gina le ndol hanu, iou dogi le reda Asos, beg belengeni Paulus, i ha leng dogi le sal le gor Asos. 14I gin sohal sal me ndro du le gor Asos, boen i gina le ndol adu, iou masi gin dogi le gor Mitilene. 15Iou bieni gor ogo, iou gin meher le gor Kios, bing si muren iou da le reda Samos. Iou da gin hengang hebe le gor Trogilion. Bing si muren iou gin meher le gor Milet. 16Heb taim i da ndro Paulus bui, i mbuere dogi le gor Evesus, beg bieni Asia mandehe, i beg hilou le gor Jerusalem, le Pentikost, aga uru asu Juda.

Su labenen ber Evesus ma Paulus.

17Be iou da le gor Milet, i rendegien su holel le gor Evesus, i eloh su labenen ber lodu, su gmeher ndro i. 18Be su gin me goure, i vong le ndro su, i bai: Danmu, be io da gin meher le ndro su Asia goru, sidesi io do da le gor ademu. 19Io gin bo mburer ad Ndorlaben, su ge, su gin ndounen io, gin hingismad ordo. Ndurmoro i da gin muh le boan, su gin seslaini io manden. 20Danmu hian, io de gin melmal bui, gin henunuen mu sidesi le logna bah asu, ma le um asu dagara lie. 21Io gin bohernou le ndro su Juda, ma le ndro su Haiden dagara lie, io gin soling ndro su, su garbelueni bern asu gle ndro Jehova, su boro ndoui ad Ndorlaben Jesu Kristo. 22E lele, Ndorlaben gin hosi meluo. Io beg dogi le gor Jerusalem. Io de dono i bui, sehe longu beg meher ndro io. 23Meluan Helian i da boharni me ndro io le gor hoger e hoger, su beg hosi io, ndangen ngendio ordo mabosanged ir belengen io. 24Io da hanguruen mondro hebsa bui aga longu hendre molhege, io ha leng dogi le gor lundielang, beg hinen sal ordo boen, beg bo mburer ordo gbomud, Ndorlaben Jesu Kristo, i da gin daui me ndro io. I ha lengi, io da bosoui le ndro su nongen le golnisden ad Jehova. 25E lele, malabo io dono, de danmu ilndri bormoro bersilie bui, mu masigane io da gin henunuen mu longu le gor ad Jehova. 26Io beg bai me ndro mu eruar, ar homo na glos, aga mburer ordo bui. 27Io de gin melmal hebsa bugane, io da gin boharni le ndro mu longu masigane le gor ad Jehova. 28Hian gobgulue meluamu, ma mu labenen ber lodu gobgulue su lao ad Jesu, i da gin semani su gle ndrai aden. 29Io dono, be io da gineao gane su mui momen ge, su gmeher ndro mu, su da sumbue mu. 30Ehe, su holel, su da le molengamu, su gedne, su ghenunuen mu momen ge, su beg rui su lao ad Jesu Kristo gle momen ge. 31Orgulue meluamu, hian mu mamed ge, ghanguruen i, io da ndro mu le Kristmas madolo. Io de gin hengang hebsa bui, io gin henunuen homo ma homo ademu lobing e lorang. Ndurmoro mabosanged gin muh le boan. 32Malabo io beg daui mu gle ndro Jehova gle nongen ber golnisden aden. I ge, i ndoa le sobani mu, mu da gmenda, i hengen le ndro mu memrad ber lang, dagara le ndro su masi, su da gin bieni bern momen ber boan. 33Io de gin hedi moni de salo, de heb memrad ademu bugane. 34Danmu i hian, nemo ogo gin bo mburer le gan ono. 35Sidegesi, le gor masigane io da gin henunuen mu, mu gob mburer hian monen ge dege io gin hinen i. Mu ghanguruen su, su heb ndoa bui. Dege nongen ad Ndorlaben Jesu gin bai, i da gin vong, i gin boi: Ghengen le ndro su gle memrad, aga i hian hanu le hedi memrad asu giao. 36Nongen ogo boen, i godurhu ngondrnegen ma su masi, su raring. 37Malabo su masigane su da dang manden, su bogarni i, su da hungung. 38Ngendiasu gle nongen aden, i da gin bai le ndro su, de dansu ilndri bormarn bersilie bui. Su masi su la born ndro i le sal le leng, boen Paulus i la le lundiendol.

Currently Selected:

Apostel 20: LLENT

Highlight

Copy