Apostel 19

Paulus i da le gor Evesus.

1Apolos i dandon le gor Korint, Paulus gin meher le gor Evesus, be i da gin dogi le gor hoger e hoger, le horo ma le horo, ber Asia mandehe. I ilndri su lao ad Jesu holel. 2I ndemani su: Meluan Helian gin meher ndro mu, be mu gin belueni bern ademu de bui? Su bodeie: Bugane, iou de gin hirong heb longu le Meluan Helian masou. Dandu i bui aga sa. 3Boen i ndemani su: Mu da gin hedi sehe surhi ie? Su bode: Surhi ad Johanes. 4Malabo Paulus i vong le ndro su, i boi: Ehe, Johanes gin surhi su, su da gin belueni bern asu, boen i vong le ndro su, su belengeni homo i da beg meher muren, aga Jesu. 5Be su gin hirong nongen ogo, Paulus gin surhi su le ngarn ad Ndorlaben Jesu. 6Be i gin daui nemen le ndro su, Meluan Helian gin meher ndro su. Su bosoui nongen le Jesu le germen houen, su boharni nongen ad Ndorlaben. 7Su ogo su gamel masongul e rumou.

8Boen Paulus i iao le numo hernou asu Juda, i henunuen su le longu ber gor ad Jehova, le vara madolo. I beg su somui le nongen ad Jesu. 9Bergolsu holel ndoun ndoun, su boii nongen le Jesu le bormarsu masigane le numo hernou asu. Malabo Paulus i bieni su, su lao ad Jesu su la born ndro i, i bosoui le ndro su longu le Jesu le um hom ad hom ndramed ngarn Tiranus. 10I giroh le gor asu Evesus le Kristmas maruo. Su masi ber Asia dansu hirong nongen ad Ndorlaben Jesu, su Juda ma su Haiden. 11Paulus i gin hinen gelman ndoun le molengasu gle ndoui ad Jehova. 12Su gin hedi salo ber mburer ad Paulus de salo i da gin sibui busngad aden, su daui salo ogo le ndro su ndramed sik i da ndro su. Su horuan muren, dagara su ngongong gin bieni su ndramed. 13Su holel asu Juda, su ndremda beld, su beg robuldi su beld le ngarn ad Jesu. Su vong, su boi: Io vong le ndro mu gle ngarn ad Jesu, Paulus i da bohernou ri, e bieni su giao. 14Su manondrdilmou su ndur ad Skeas i homo asu Juda ber um asu ndurhian ber Juda. Su ogo su gin hinen mburer ogo. 15Ngongong i da vong le ndro su, i boi: Io dono Jesu hian, io dono Paulus lie, io de dono mu bui, mu sie? 16Boen ngongong i hilou le ndro su, i bo iil le ndro su, i ndounen sor marmou asu i rii sor, i mbuserei salo asor, legen i da le mandrsor, boen su hilou su vob. 17Ngarnongen le longu ogo gin hilou le ndro su Juda, ma le ndro su Haiden ber Evesus, nohoasu dsoln. Su bamugueni ngarn ad Ndorlaben Jesu manden ge. 18Su mabosanged, su da gin boro ndoui ad Ndorlaben Jesu, su gin boharni le ndro su masi longu asu momen ber goru. Su de gin gorni hebsa bui. 19Su mabosanged, su da gin bo longu ad beld mahanu, su gin me, su gin hedi buk asu beld me goure su daui moan leri, moan gin dilmui longu le su beld sumburdi. Be su gin nemeni moni, dansu semani buk asu beld masi, moan gin dilmui, aga i vonei moni mabolimungul. 20Boen nongen ad Ndorlaben i hilou ge roud le gor, i ndoa le ndro su.

21Longu ogo boen, Paulus i beg dogi le gor asu Masedonia, me le gor asu Grek, boen i ha leng dogi le gor Jerusalem. I vong, i bai: Boen io beg dogi le gor asu Rom lie. 22I rendegien sor marmou, Timotius sor Erastus, sor dogi hanu le gor Masedonia, i dandon hebe le gor asu Asia mandehe.

Su bo iil le ndro Paulus.

23Le taim ogo su ber Evesus, su bo iil le ndro su Kristen ber gor. 24Hom ndramda marbahar, ngarn aden Demetrius, i da mengseni um mandehe ber moni, um le beld ngarn Diana. Aga mburer aden, ma asu gamel mabosanged ber gor ogo. 25Demetrius i loh su ndramed ber mburer le geherong, i vong le ndro su, i boi: Mu gamel, danmu mburer adu aga i vonei gan anu. 26Malabo danmu ilndri, danmu hirong i, Paulus, i da gin seslaini su mabosanged ber Evesus ma su ber gor masi i da le Asia, i vong le ndro su, i boi: Su beld su molhege, su ndramed ge ber boan gin mengseni i. 27Heb eluen bui muren heb mburer adu bui, gan anu bugane ma longu hendre lie: Heb eluen bui muren su ndramed de dirhor le ndro beld ber Evesus ngarn Diana hebsa bugane. Boen su ndramed su gbieni lodu asu le um ogo mandromai, danmu, gor masigane gin mugueni beld adu. 28Be su gin hirong nongen ogo, ndrnesu i mah manden, su lug bohosu ndoun, su loholo, su boi: Diana ber Evesus i manden ge! 29Su ndramed masi ber gor su loholo, su hilou le goure, le um manden ber gor. Su hosi Gaius sor Aristargus ber Masedonia su do da le sal ad Paulus. 30Paulus beg hilou le ndro su, su lao ad Jesu gin sendraini i. 31Dagara su labenen holel asu Asia, su gous ad Paulus, su rendegien le ndro i, su vong, su boi: Mbue ir dogi le ndro su. 32Su da le um su loholo mandromai bersi, su lug bohosu manden ge, de dansu i bui gle sa. 33Malabo su Juda rendegien Aleksander, homo asu i vong le ndro su ndramed ogo. Aleksander i gimdie le nemen, i beg vong le ndro su. 34Be dansu, i homo asu Juda, su lug bohosu manden lie, su masi su loholo bersi: Diana ber Evesus i manden ge. Su loholo dagara le klok maruo. 35Kuskus ber gor i vong le ndro su, i boi: Mu gamel ber Evesus, hom ndramed i da oho, i de danen i bui, Evesus aga logna ad Diana, su da bogulue um le ad beld Diana, ma sameluan i da gin los le boan, mahanu i da le belengan. 36Longu ogo dandu i masigane, derbe mu da loholo dagara, beg hinen longu hendre e hendre i da heb monen bui. 37Mu gin rui su gamel holel ogo, su de gin behena heb longu bui, su de gin boii beld adu Diana bugane. 38Be longu hendre i da ndro Demetrius ma su lao aden masi ber mburer, hian su gob gord le ndro i, boen iou me goure, iou hirong nongen aden. Su ndurhian su do da le gor adu dansu hinen longu masi gmonen. 39Ar mu ha lengi longu hendre de hendre hian mu absoui i, be iou da me goure le uru adu. 40Iou da vong sa, be ngarnongen le longu ogo i hilou le ndro Sesar, boen i bo gord me ndro du, i boi: Iou da gin bo bahun. 41Nongen aden boen, su ndramed masi su bieni um ogo, su iao le horo ma le horo, le seher ma le seher le um asu.

Currently Selected:

Apostel 19: LLENT

Highlight

Copy