Apostel 18

Paulus i da le gor Korint.

1Muren Paulus i bieni gor Ateen, i dogi le gor Korint. 2I ilndri homo asu Juda, ngarn Akuila. I homo ber Pontus. I, ma nambulen Prisila, gin meher le gor Korint. Heb eluen bui goru, sor da le gor Italia. Goru Sesar Klaudius i gin robuldi su Juda masi le gor Rom gineao. Paulus i la ndro sor. 3Mburer asor, dege mburer aden, su ndremda salo, su da mengseni salo ndoun ndoun. Malabo su madilmou su da gin bo mburer le um hom. 4Le Sabbath asu Juda i iao le numo hernou asu Juda, i bohernou le ndro su longu le Jesu, le ndro su Juda, ma le ndro su Grek. 5Boen Silas sor Timotius gin bieni Masedonia sor aga Mesias adu. 6Su Juda mbueresu hirong nongen aden, so boii nongen aden, su hal le aden. Paulus i sibui heb gas i da le sumianegen gineao, boen i vong le ndro su, i bai: Aga longu ademu, be mbueremu nongen ad Jesu, io ge, io gin boharni i le ndro mu. Malabo io dogi le ndro su Haiden. 7I bieni numo lodu asu, i iao le um ad hom Haiden, i da voaniso Jehova, ngarn Titius Justus, um aden i da baghege le numo hernou asu Juda. 8Krispus, labenen ber um ad Jehova, i boro ndoui ad Ndorlaben. I, ma su ber um aden, su lao ad Jesu Kristo, dagara su Korint mabosanged, su da gin hirong nongen ad Paulus, su lao ad Jesu Kristo. Su gin surhi su le ndran, gelman asu lao ad Jesu. 9-10Ndorlaben i vong le ndro Paulus lobing, le gelman si i da gin mbsig le ndro i, i boi: Mbue uo go noh, boharni le ndro su, mbue uo simge, io baghege ndro uo, homo de danen bo momen de la ndro uo hebsa bugane. Su lao ordo mabosanged su do da le gor ogo. 11Paulus i dandon le gor ogo le kristmas si, ma sehendr, i bohernou le ndro su gor Korint nongen le Jehova.

12Galion, aga ndorlaben asu Grek. Su Juda su bo gord le ndro Paulus, su rui i le ndro ndorlaben ber Grek. 13Su vong, su boi le ndro i: Ndramed ogo i seslaini su ndramed, su ibdi bern houen aga bern adu bui. 14Paulus i beg vong heb nongen le ndro Galion. I vong le ndro su Juda: Be ndramed ogo i gin bo longu momen io dono bo gord le ndro i, io gdieni i. 15Longu ademu ogo, aga longu le lodu ge, aga mburer ademu, io da bo gord le ndro ndramed ogo gle lodu aden bui. 16I robuldi su Juda, su gbieni i. 17Malabo su masi su hilou le ndro Sostenes, labenen ber numo hernou asu Juda, su rii i ndoun le bormarn ad ndorlaben Galion. Galion de gin sendraini su bui.

18Bersi muren, Paulus i bieni gor Korint, i dogi le gor Siria. Prisila sor Akuila sor la born ndro i. Be i da le gor Kengrea, su sindrdi lomon ad Paulus, be bandri aden gina boen. 19Su gin meher le gor Evesus, sor marmou sor giroh. Paulus i iao le numo hernou asu Juda, i bohernou le ndro su le longu ber lang. 20Su ndemani i, i giroh. Paulus de gin somui le soling asu bui. 21I vong le ndro su, i bai: Bugane, io ha leng dogi le gor Jerusalem. Io beg dogi le uru asu Juda, i da baghege. Ar Jehova ha lengi, io gmul le ndro mu. Boen i bieni gor Evesus. 22I meher le gor Sesarea, boen i gobad le gor Jerusalem. I ilndri su lao ad Jesu, i bo nongen le ndro su, boen i dogi le gor Antiogia.

Paulus i dogi lie le gor hoger e hoger le mburer ad Jesu.

23Heb eluen bui muren Paulus i bieni gor asu Antiogia, i dogi le ndro su Galatia, ma le ndro su Vrigia, i sobani su le bohernou aden.

Apolos i da le gor Evesus e Korint.

24Homo asu Juda, ngarn Apolos, i homo ber Aleksandria, i hom ndremda hernou. I danen nongen ad Jehova hian ge. Apolos ogo gin meher le gor Evesus. 25Goru su gin henunuen i le nongen ad Jesu lie. I da bohernou le ndro su ndoun ndoun, i bosoui longu le Jesu le ndro su. Apolos i danen ge surhi ad Johanes. 26I da bohernou le ndro su Juda le numo hernou asu. Prisila sor Akuila sor hirong nongen aden, sor la ndro i, sor henunuen i le longu gin meher ndro Paulus. Malabo i da gin bo mburer ge le nongen ad Jesu, i bohernou le ndro su, Jesu ad Jesu hian ge. 27Boen Apolos beg dogi le gor asu Grek. Su lao ad Jesu ber gor Evesus gin somui ri. Su rendegien heb nongen le ndro su lao ad Jesu ber Korint, su ha somui Apolos le gor asu. Be i gin meher le gor Korint, i sobani su lao ad Jesu ber gor ogo. 28I henunuen su Juda ndoun ndoun. I bohernou le ndro su, Jesu aga Mesias asu Juda.

Currently Selected:

Apostel 18: LLENT

Highlight

Copy