Apostel 17

Paulus i da le gor Tesalonik, le gor Berea ma le gor Ateen.

1Sor dogi le sal, le gor Amvipolis ma le gor Apolonia. Boen su gin me le gor Tesalonik, numo hernou asu Juda i do dari. 2Paulus i gina le numo hernou asu, dege i gin hinen i sidesi, aga bern aden. I bosoui le ndro su nongen le Jehova, le sabbath madolo. 3I bohernou le ndro su, i henunuen su longu masi le Mesias, ma le ngendian aden, i da gin meher ndro i. Dagara, i gedne lie le ngad aden. Jesu ogo, io da gin bohernou le ndro mu, aga Mesias adu. 4Su holel gin somui le nongen asoro, su ndrbon Paulus e Silas. Dagara su Haiden ber gor ma su labihin holel su lao ad Jesu. 5Su Juda, be su gin ilndri su mabosanged, su lao ad Jesu, su bo iil le ndro sor, su gin loh su ndramed momen ber gor, su da loholo, su lug bohosu manden, su bo iil le ndro su lao ad Jesu. Su gina le um ad Jason, su gahi Paulus sor Silas, beg bo gord le ndro sor, 6de dansu danoni sor bui. Malabo su rui Jason, ma su ndern holel le ndro su ndremda gord. Su lug bohosu manden, su loh, su bai: Su ndramed ogo su da bo momen le ndro su gor masi, malabo su gin meher le gor adu lie. 7Jason, i gin somui sor le um aden. Su ndramed ogo, su da bo iil le ndro Sesar, su vong, su boi: Jesu, aga King asu. 8-9Be su gin vong dagara, ndrnesu ndramed i mah le asu lao ad Jesu. Su hedi moni le ad Jason ma le asu lao ad Jesu, boen su gin rumburdi su.

10Su lao ad Jesu ber gor, su gin sobani Paulus sor Silas, sor vob lobing, sor gina le gor Berea. Be su gin meher le gor, su gina le numo hernou asu Juda. 11Hanguruen asu Berea i hian ge, dege hanguruen asu Juda ber Tesalonik bui. Su ha somui le nongen asor, bing si e rang si su gahi longu ber lang le Buk Helian, beg ilndri, nongen asor i monen de bui. 12Su mabosanged su ibdi bern ad Jesu, su gamel ma su bihin asu Haiden dagara lie. 13Su Juda ber Tesalonik su gin hirong i, Paulus i bohernou le ndro su Berea nongen ad Jehova. Su gin me, su rui su ndramed ber gor le goure, su bo iil le ndro sor. 14Su lao ad Jesu ber gor gin sobani Paulus, i bieni gor asu, i dogi le leng. Silas sor Timoteus sor dandon le gor. 15Su lao ad Jesu holel su la born ndro Paulus le sal, su dulieni i le gor Ateen. Boen su gin mul, su vong le ndro Silas sor Timoteus, sor ndrbon le Paulus.

16Paulus i da belengen sor le gor Ateen. Bergoln i reng be i da gin ilndri su ndramed ber gor su da dirhor le ndro su beld ge. 17I gina le numo hernou asu Juda, i bosoui le ndro su longu ber lang. I da bosoui le ndro su Haiden bing si e rang si nongen le Jesu, le logna bah asu. 18Su ndremda skul asu Epikurea, ma su Stoa su la ndro i, su holel su gin boi: Ndramed ogo molhe i da bosoui sehe nongen molhe dagara? Su holel su boi: I da beg boharni me ndro du longu le su beld ber gor manan. Paulus i gin bohernou longu ber lang, nongen le Jesu i da gin ndne lie le ngad aden. 19Su hedi Paulus, su dulieni i ndre bahali Ares, su ndemani i le nongen aden, su boi: Iou beg hirong nongen adem, i da houen me ndro du uo da bosoui leri. 20Longu ogo iou de gin hirong masou, e bosoui me ndro du, muren dandu i, i hian de i momen. 21Su ber Ateen, ma su ndramed ber gor hoger e hoger, su do da gor Ateen, sidesi su beg hirong longu hendre e hendre houen, beg bosoui le ndro homo ma homo. 22Paulus i gina ndre bahali Ares, i vong le ndro su, i boi: Mu gamel ber Ateen, io da gin ilndri gor ademu, io gin ilndri logna dohor mabosanged. Io hanguruen, voamuiso, su ber belengan. 23Be io da gin dogi le horo ma le horo, gin hivane le gor ademu, io gin ilndri le logna dohor si nongen ogo: Le ndro homo ber belengan dandu le aden masou. Homo ogo ber lang, mu da mugueni i le dohor ademu, io beg bosoui le aden malabo. 24Aga Jehova, i da gin mengseni gor masi, logna aden i da le um ber boan bui, nemesu ndramed gin mengseni. 25Nemesu ndramed de dansu bo mburer aden bugane, i ge, i da hengen le ndro su ndramed masi, su horuan, su mamaren gleri. 26Su ndramed masigane ber boan, damen asu ber nandugian homo ge. I gin mengseni ndramed ogo. I gin daui le ndro su ndramed gor masi ber boan, gor hoger e hoger asu ndramed ge, dansu beleng asu. 27Jehova ha lengi i, su gahi Ndorlaben ber lang. Dansu danoni i de bui. I da baghege ndro su, i da baghege le dogrodu masigane, le ndro homo ma homo adu. 28Iou mamaren gle ndoui aden, iou da bo mburer le ndoui aden, iou do da le boan gle ndoui aden, dege su holel ademu gin bai: Iou adem ge, i damdu. 29Iou ad Jehova ndangen, mbue hanguruen, Jehova, Ndorlaben ber lang i dege su beld, mu da mengseni sameluan ber gold, de ber bad, dege mu da hanguruen i. 30Ndorlaben Jehova de hanguruen rang ademu ber goru bui, de danmu le Jehova masou hebsa bugane. Malabo i ha lengi i, su ndramed masi garbelueni bern asu. 31I da gin daui rang si, i da gmeher muren, i beg bo gord le ndro su gor masigane, monen ge. I gin loh homo i da bo mburer ogo, gin hingeni i le ngad aden. 32Be su gin hirong longu le su ndramed su gedne lie le ngad asu, su holel su vong, su bai: Io beg hirong nongen aden bersi muren. Su holel su hal aden. 33Paulus i gina lendi le molengasu, gin bieni su. 34Su holel asu su ndrbon Paulus, su belueni bern asu. Homo asu ngarn Dionisus i homo asu labenen, dagara hom bihin ngarn Damaris, ma su holel la born.

Currently Selected:

Apostel 17: LLENT

Highlight

Copy