Apostel 16

Timotius sobani Paulus, sor dogi le gor Europe.

1Sor gin meher le gor Derbe e Listra. E lele, hom lao ad Jesu ngarn Timotius i da le gor, nanen i homo asu Juda, damen i homo asu Grek. 2-3Su lao ad Jesu ber Listra ma Ikonium su bamugueni Timotius. Paulus i ha langi, i la born ndro i le sal aden. I gin sindrdi mandern, gelman asu Juda, debosan su Juda su bo iil le ndro i. Su Juda masi dansu i, damen i homo asu Haiden. 4Be su da gin dogi le gor hoger e hoger, su bosoui le ndro su longu masigane, su Apostel ber Jerusalem, ma su labenan ber lodu gin bai. 5Sor sobani su lao ad Jesu gle ndoui ber lang. Su mabosanged asu Haiden su la born ndro su Kristen.

6Boen su dogi le gor asu Vrigia, dagara le gor asu Galatia, su beg dogi le ndro su Asia, beg bohernou le ndro su nongen ad Jehova. Meluan Helian i sendraini su. 7Su gin meher baghege le gor asu Misia boen su beg dogi le gor asu Bitinia. Meluan ad Jesu de gin somui ri bugane. 8Boen su da dogi baghege le gor Misia, su gin meher le leng le gor Troas. 9Gelman ber lang gin meher ndro Paulus lobing: Homo asu Masedonia i da baghege ndro i, i soling ndro i, i boi: Am le horo le gor adu Masedonia, osbani du. 10Be i gin ilndri gelman ogo, iou ha leng dogi le gor asu Masedonia, iou gin hanguruen Jehova gin loh du, iou gob mburer le longu ber lang le ndro su.

Paulus i da le gor Masedonia.

11Iou gin hedi ndol heie, iou gin bieni Troas, ndol adu gina le gor Samotrase. Bing si muren iou da le gor Neapolis. 12Iou gin bieni gor ogo, iou gina le gor Philipi, gor manden ge asu Masedonia, aga gor si asu Rom. Iou do da le gor ogo le bing holel. 13Le Sabbath asu Juda, iou gina le marbohon gor, le mandrgos ndran haga. Iou da gin hanguruen, su Juda me goure le logna gorbo, su da beg lodu. Iou gin lugdo im boan, iou vong le ndro su bihin, su da gin me goure.

14Homo asu bihin ogo, i da voaniso nongen ad Jehova, ngarn aden Lidia. I hom ndremda simsim ber gor Tiatira. I da delengan le nongen ad Paulus, nongen ber lang gina le bergoln. 15Su gin surhi Lidia le ndran ma su masi ber um aden. Boen i vong le ndro Paulus: Ar mu hanguruen, io hom bihilou ad Ndorlaben Jesu, hian am le um ordo, io beg bo mburer le gan anmu. I gin ndemani du dagara.

16Bersi muren iou da le sal, beg dogi le logna lodu. Hom bihilou i sohal sal le ndro du, ngongong i da ndrnen, i da gin bo mburer ad beld Satan, ndorlaben aden gin hedi moni mabosanged leri. 17Bihin ogo i do ndrbon Paulus, i loholo i bai: Su gamel ogo, su lao ad Jehova hohunan, dansu boharni le ndro mu sal lundielang. 18I da gin hinen dagara le bing mabosanged. Bersi Paulus ndrnen i irgu, i belueni bormarn ndrbon, i vong le ndro ngongong ogo: Io bai le ndro uo le ngarn ad Jesu Kristo: E bieni i, glendi. Malabo ngongong gin bieni bihin ogo. 19Be su ndorlaben ad bihin ogo gin ilndri, ngongong gin bieni i, heb moni de meher de la ndro su bugane, su hosi Paulus sor Silas, su rui su le logna gord, le ndro ndorlaben ber gor. 20Su vong le ndro ndremda gord: Sor marmou ogo sor gin meher le gor adu, sor Juda. 21Sor ha lengi, iou da ibdi bern asor ber gor manan, iou ge ber Rom. Mbueredu bern asu. 22Dagara su ndramed mabosanged su bo gord le ndro sor. Su ndremda gord su boi le ndro polisboi, su mbuserei salo asor, su rii sor le vusu. 23Be su da gin rii sor ndoun dagara, su bieni sor le kalabus. Su bai le ndro polismaster, i gobgulue su hian ge. 24I gin daui sor le kalabus, i gin daui ndegesor le gei beruan.

25Dogrobing, Paulus sor Silas, sor lodu, sor mugueni Jehova le gagaile asor. Su ber kalabus masi gin hirong lodu asor. 26Malabo boan i rerr, um ogo i nunueie, babi masi gin deh, sen i da le nemesu gin los le boan molhe. 27Meluan ad polismaster i ieb, i mamed. Be i gin ilndri babi ber kalabus su deh, i hedi mordo borla aden, beg sindrdi goln. I gin hanguruen, su ber kalabus masi su gin vob. 28Paulus i loh, i boi le ngasen ndoun: Mbue hinen longu momen dagara, iou masi gorbo. 29I loh, su hengen sul le ndro i, i hilou ge, i meher le lundieum, mandern masi i rerr. I los le boan, baghege le ndegen ad Paulus sor Silas. 30Boen i gin dulieni sor lendi, i ndemani sor, i boi: Mu ndorlaben, io gob sa, io ha leng dogi le gor lundielang. 31Sor bodeie: E boro ndoui ad Ndorlaben Jesu Kristo, muren uo ma su ber um adem danmu dogi le gor lundielang. 32Sor bohernou le ndro i, ma le ndro su ber um aden nongen ad Jehova. 33Polismaster i dulieni sor lobing ogo le um aden, i surhi mandrsor, i da beb le ndrai. Su gin rii sor ndoun dagara. Boen sor surhi polismaster ogo le ndran, gelman asu lao ad Jesu, dagara su masi ber um aden. 34Boen i hengen gan le ndro sor, i mugmug ge, ma su masi ber um aden su mugmug ge, be su gin hanguruen, Jehova gin somui le asu. 35Madourang, su ndrem da gord rendegien su lao asu, su da bo mburer le gord le ndro polismaster, su boi: E rumburdi sor marmou. 36Polismaster i bosoui nongen ogo le ndro Paulus, i boi: Su ndremda gord su gin vong me ndro io, io grumburdi mor le kalabus, hian mu gbieni kalabus ogo, al dogi le mandri ad Jehova. 37Paulus i bodeie: Su de gin hirong nongen ador bui, su gin dieni iouoro, gin rii du. Io homo asu Rom, su gin daui dor le kalabus, malabo su beg robuldi dor. Aga heb monen bui, su gmehere, su gdulieni du le gor ogo giao. 38Su lao asu ndremda gord gin mul le ndorlaben asu, su bosou nongen ogo le ndro su. Meluasu masi i ieb, su noh manden, be su gin hirong i, sor asu Rom. 39Boen su gin meher ndro sor, su ndemani sor, mbue sor hanguruen momen le ndro su. Boen su dulieni sor le kalabus lendi, su ndemani sor, sor gbieni gor asu. 40Sor bieni kalabus asor, sor gina le um ad Lidia. Be su gin ilndri su lao ad Jesu ber gor, sor bosoui le ndro su heb longu ber lang, boen sor bieni gor, sor dogi le gor hoger e hoger.

Currently Selected:

Apostel 16: LLENT

Highlight

Copy