Apostel 15

Paulus sor Barnabas dogi le gor Jerusalem.

1Su Kristen holel ber gor Judea gin meher le gor Antiogia. Su vong le ndro su ndern ber gor ogo, su boi: Ar mu de hanguruen gelman ad Jehova bui, be su sindrdi mandrmu bugane, de danmu dogi le gor lundielang bui. 2Meluasu lao ad Jesu gin irgu le nongen ogo. Paulus sor Barnabas sor bo iil le ndro su Kristen ber Juda le nongen asu, Boen su boi, Paulus sor Barnabas ma su Kristen holel ber Antiogia su gdogi le gor Jerusalem le ndro su Apostel, su ghinen bahun ogo boen. 3Su bieni gor Antiogia, su dogi le sal le gor Vinisia, ma le gor Samaria, su bosoui le ndro su longu le su Haiden, su da gin ibdi bern ad Jesu Kristo. Su ndern mugmug leri manden. 4Be su gin meher le gor Jerusalem, su lao ad Jesu ber gor, dagara su Apostel ma su labenen ber lodu gin mugueni sor. Sor bosoui le ndro su longu masi Jehova gin hinen i, gle mburer asoro. 5Malabo su holel asu Pharisi su da gin boro ndoui ad Jesu Kristo lie, su ha lengi, su gsindrdi mandrsu Kristen ber gor asu Haiden, su ghanguruen nongen ad Mose lie.

6Malabo su Apostel, ma su labenon ber lodu su la goure, beg hanguruen longu ogo. 7Su da gin bosoui nongen mabosanged le longu hendre e hendre, malabo Petrus i dne, i vong ndro su: Mu ndere hian, danmu i, Jehova gin loh io goru, io gobharni le ndro su Haiden longu ber lang, i ha lengi su gboro ndoui ad Ndorlaben lie. 8Jehova i da danen bergolsu ndramed, i gin somui le asu Haiden, i gin daui Meluan Helian le bergolsu, dege i gin hinen me ndro du. 9I da gin hanguruen bui, ogo su Juda, ma i da le horo su Haiden. I gin surhi bergolsu Haiden su da gin boro ndoui aden. 10Desa mu beg seslaini Jehova, mu beg daui le ndro su lao ad Jesu longu beruan gle hauesu dagara. Su damdu ber goru, iou dagara lie, dandu sab longu ogo bugane. 11Ehe, iou da mamaren ge le golnisden ad Ndorlaben Jesu, iou da gin boro i, su dagara lie. 12Malabo su masi su simge, delengasu le nongen ad Paulus sor Barnabas. Sor da gin bosoui le ndro su gelman manden e longu masigane, Jehova gin hinen i, le molengasu Haiden, gle mburer asoro. 13Nongen asor boen, Jakobus i dne, i vong, i boi: Mu ndere hian, ha hirong nongen ordo. 14Simon, aga Petrus i gin bosoui me ndro du, Jehova i ha lengi su Haiden su lao aden lie, su da gob lodu le ngarn. 15Aga i monen ge, su Provet lie gin hondre dugian dagara. Homo i da hondre, i boi: 16Boen io beg mul, beg mengseni um ad David, i da gina ndumbue, gina los. Io beg mengseni um aden gle houen. 17Boen su ndramed, su dandon, su gahi Ndorlaben, su Haiden dagara lie su lao ordo ge. Aga nongen ad Ndorlaben, i da gin hinen i dagara. 18Nandugian, nandugian i ha lengi dagara. 19Io hanguruen, iou de daui le ndro su Haiden, su da gin belueni bern asu, longu beruan bui. 20Iou ha lengi su de dirhor de la ndro su beld bui, su de bo sungsou bui, su de gien ndrai le longu masi ber lonhou, dagara le ndrai asu ndorgan ber lang bugane. Longu madolo ogo i heliasu. 21Mose, ma nongen aden i da le gor hoger e hoger, su Juda masi absoui nongen aden le numo hernou asu.

22Boen su Apostel, ma su labenen ber lodu, dagara su lao ad Jesu masigane su gin somui ri. Su lao ad Jesu holel ber Jerusalem su la born ndro Paulus sor Barnabas. Silas i la born ndro sor, dagara Judas su bosoui ngarn aden Barsabas, sor marmou ogo sor labenen ber lodu. 23Su gin daui le ndro sor peper le ndro su lao ad Jesu, su da le gor asu Haiden. Su gin hondre: Iou Apostel, iou labenen ber lodu, iou da beani nongen hian le ndro su Kristen ber Antiogia, ber Siria, ma ber Silisien. 24Iou da gin hirong i, su holel adu gina le gor ademu, su da gin bosoui le ndro mu longu hendre e hendre. Iou de gin rendegien su bugane, ndrnemu gin irgu le nongen asu, meluamu gin ieb leri. 25Malabo iou masi gin me goure, iou gin loh sor marmou, sor dogi le born ndro Barnabas e Paulus. 26Sor marmou ge, sor lao ad Ndorlaben Jesu Kristo hohunan, sor de gin hanguruen mandrsor bui, beg daui i le ndro Ndorlaben Jesu Kristo. 27Iou gin rendegien Judas sor Silas, sor gobharni le ndro mu longu masigane. 28Meluan Helian, dagara iou masi gorbo, iou gin hanguruen, i de hian bui, be iou da daui longu beruan gle hauemu. 29Longu madolo iou ha lengi, mu ghanguruen i: Mbue de dirhor le ndro su beld, mbue gien ndrai ma sengen le longu ber lonhou be ndrai i dari, ma longu hendr lie: Mbue sungsou dege su Haiden su hinen i. Longu ogo i helian ndro mu, orgulue meluamu le longu momen ogo, muren mu da hian ge le gor ademu. Nongen adu boen malabo.

30Su gamel ogu su bieni gor Jerusalem, su dogi le gor Antiogia. Su loh su lao ad Jesu me goure, su daui peper ogo le ndro su. 31Be su lao ad Jesu ber Antiogia gin ilndri nongen ogo, su mugmug ge le nongen hian. 32Judas, sor Silas, sor ndremda hernou, sor bohernou le ndro su longu ber lang, sor sobani su lao ad Jesu ber gor le nongen asoro. 33Sor dandon le bing holel, boen su lao ad Jesu ber Antiogia su rendegien sor mul le ndro su Apostel. 34Silas, i ge, i dandon le gor.

Paulus i da le sal lie le bo mburer le gor hoger e hoger.

35Paulus sor Barnabas sor do da le gor Antiogia, sor henunuen su ndramed ber gor, su holel ber gor gin bo mburer dagara lie. 36Heb eluen bui muren Paulus i vong le ndro Barnabas: Iou beg dogi le gor hoger e hoger, mahanu iou gin bosoui le ndro su nongen ad Ndorlaben, beg ilndri su ndern su da le gor asu, su da hian ge le gor asu, de derbe. 37Barnabas ha lengi Johanes, su da bosoui ngarn aden Markus, i la born ndro sor. 38Paulus i mburen homo ir dogi le sal asoro, i da gin bieni sor goru, le gor asu Pamvilia, i da gin sobani sor le mburer ad Jehova bui. 39Malabo sor da bo iil le nongen asor. Homo gina le sal hasel, homo gina le sal hasel. Barnabas gin hedi Markus, sor dogi le reda Sipern. 40Paulus i hedi Silas, i la born ndro i le sal aden. Be su ndern ber Antiogia gin lodu le asoro, sor bieni gor. 41Sor dogi le gor Siria ma le ndro su Silisia, i sobani su lao ad Jesu ber gor.

Currently Selected:

Apostel 15: LLENT

Highlight

Copy