Apostel 14

Paulus i da le gor Ikonium, Listra e Derbe.

1Be sor gin meher le gor Ikonium, sor gina le numo hernou asu Juda, sor bohernou le ndro su ndoun ndoun. Su Juda mabosanged, dagara su Haiden dsoln gin ibdi nongen ad Ndorlaben. 2Su Juda ge, su de gin somui ri bui, su vong le ndro su Haiden, su gob iil le ndro sor. 3Paulus sor Barnabas sor dandon le gor le bing holel, i bohernou le ndro su le ndoui ad Ndorlaben, Ndorlaben gin sobani sor gle ndoui ber belengan, sor gin hinen gelman ma longu ndoun le ndro su. 4Su ndramed holel gin somui le nongen ad Ndorlaben, su da le lain asu Apostel. Su holel mbueresu nongen ad Jesu, su da le lain asu Juda. 5Su Haiden ma su Juda, dagara su labenan ber gor, ndrnesu i mah le asoro manden ge, su ha leng bo iil le ndro sor, beg bieni bad le ndro sor, beg daii sor. 6Ngarnongen le iil asu gin mehere ndro sor, sor bieni gor Ikonium, sor vong, sor dogi le gor Listra e Derbe, i da Likaonia. 7Su bohernou le ndro su ndramed longu ber lang.

8Hom gamel i da le gor Listra, heb ndoui aden i da le ndegen bui. De danen irgai hebsa bui gle mamemei. 9I hirong nongen ad Paulus. Paulus i ilndri bormarn ndoun, i danen, ndramed ogo i danen boro ndoui ad Jehova, i da beg regurdueni i. 10I loh le ngasen ndoun: Edne! Ndramed ogo i dne, i danen dogi monen. 11Be su ndramed gin ilndri longu ogo, Paulus i da gin hinen i, su lug bohosu manden, su loh le nongen asu Likaonia, su boi: Su beld gin ibdi sengen asu ndramed, su gin bieni gor asu, su gin meher ndro du. 12Su bosoui Barnabas ngarn Jupiter, ma Paulus su bosoui ngarn Merkurius, Paulus i da gin bohernou le ndro su. 13Su ndremda beld ber gor, su da dirhor le ndro Jupiter, aga beld asu le ad um ber beld, i da le marbohon gor. Malabo su gin me, su gin rui su bulmagou, su gin nauni su le louge, su beg dirhor le ndro sor. 14Barnabas sor Paulus, sor Apostel ad Jesu Kristo, be sor gin hirong i, sor mbuserei salo asor, sor hilou le molengasu ndramed, 15sor loh, sor bai: Mu gamel, mu da bo sa, iouoro ndramed molhege, dege mu lie, iou da gin bohernou le ndro mu longu ber lang ge. Hian e bieni su beld admu, ibdi Jehova, i da mamaren ge gle Ndorlaben ademu. I ge, i gin mengseni lang e boan, e ndas, ma longu masigane i do dari. 16Goru su Haiden gina le sal asu momen, 17I gin boharni le ndro su golnisden aden, i gin daui le ndro su lengen, beleng asu i hian ge, gan ansu mabosanged, bergolmu gin mugueni i. 18Be su gin hirong nongen ogo, su ndramed beg dirhor le ndro sor.

19Malabo su Juda ber Antiogia ma ber Ikonium su gin me, su rui su ndramed le lain asu, su bo iil le ndro sor, su daii Paulus le bad, boen su gin rui mandern le marbohon gor, su gin hanguruen, Paulus i ginmad gane. 20Su lao ad Jesu su gin lugmuni Paulus, i dne, i dogi le gor lie. Bing si muren Paulus sor Barnabas sor dogi le gor Derbe. 21Sor bohernou longu ber lang le ndro su ndramed ber gor ogo, su mabosanged su lao ad Jesu. Boen sor mul le gor Listra, le gor Ikonium, ma le gor Antiogia i da Pisidien. 22Su gin sobani su lao ad Jesu le gor masi, gle ndoui ber lang. Sor ndemani su, su dandon baghege ndro Ndorlaben. Boen i boharni le ndro su ngendian mabosanged, ir belengen le lao ad Jesu, su da beg dogi le gor lundielang. 23Su gin loh su holel gle labenen ber lodu, su gin raring, su gin bandri, su gin soling ndro Jehova, ir bogulue su, su da gin boro ndoui aden. 24Su dogi le gor Pisidien. 25Boen su gin me le gor Perge, i da Pamvilia, su bohernou le ndro su nongen le ad Ndorlaben, boen su dogi le gor Atalia. 26Su bieni gor ogo, su gin meher le leng, su hedi ndol heie, su gin dogi mul le gor Antiogia. Nongen le Ndorlaben i da gin hilou le gor masi, sor mugmug manden leri. 27Be su gin meher le gor, su loh su lao ad Jesu le goure, sor boharni le ndro su longu masi, Jehova gin hinen i, babi le ndro su Haiden gin deh, su gin boro ndoui ber lang. 28Sor dandon le gor ogo le taim eluen hebe.

Currently Selected:

Apostel 14: LLENT

Highlight

Copy