Apostel 13

Mburer ad Paulus sor Barnabas.

1Su Provet ma su ndremda hernou holel, su da le gor Antiogia, ngarn asu ogoro; Barnabas e Simeon, su da bosoui ngarn aden Niger, ma Lusius ber Kirene, dagara Manaen, be i hom mbunana, i da le um ad ndurhian Herodes, ma Saulus lie. 2Bersi muren be su da gin lodu le ndro Ndorlaben, su gin bandri, Meluan Helian i bai le ndro su, Barnabas sor Saulus glendi, io beg rendegien su le mburer io da gin loh sor. 3Boen su bandri, su raring, su daui nemesu gle ndro sor, boen sor dogi. 4Meluan Helian gin rendegien sor, sor dogi le gor Seloika. Boen su hedi ndol heie, su me le gor Sipern. 5Su bohernou le ndro su Salamis nongen ad Jehova le numo hernou asu Juda. Johanes i sobani sor. 6Su da gin dogi le reda ogo, le horo ma le horo, boen su gin meher le gor Pavos. Hom Provet momen, hom ndremda beld ngarn aden Barjesus, i da le um ad ndorlaben Sergius Paulus, i hom ndorlaben monen ge. 7I ogo i loh Barnabas sor Saulus le um aden, i ha leng hirong nongen ad Jehova. 8Malabo ndremda beld, ngarn aden Elimas i gin me, i bo iil le ndro sor, i mburen ndorlaben i hirong nongen asor. 9Saulus, ngarn aden Paulus lie, i lele i ndoun, 10i vong gle ndoui ad Meluan Helian: Uo ndur Satan. Bergolm i beb le bahilou ge, uo ndremda rah ad Jehova, gehere mburer adem momen boen? 11Malabo nemen ad Ndorlaben beg meher ndro uo, begmarm bui, de danem ilndri mernal bugane, le taim eluen hebe. Ndrogmoan gin meher ndro i, begmarn i ndrogum gane, de danen ilndri heb sal bui. I gahi su ndramed, su da gdulieni i le sal aden. 12Be ndorlaben gin ilndri longu ogo, meluan i ieb, i boro ndoui ad Ndorlaben, ma nongen aden.

Paulus boharni nongen hian le gor Antiogia.

13Paulus ma su la born ndro i, su bieni gor Davos su hedi ndol heie, su gin meher le gor Perge i da Pamvilia. Johanes i bieni sor, i dogi mul le gor Jerusalem. 14Sor bieni Perge, sor gin meher le gor Antiogia, i da Pisidia, su lugdo im logna ber numo hernou asu Juda. 15Be su gin abui nongen le Mose ma asu Provet, su labenan ber numo hernou su vong: Mu ndere hian, be mor beg bosoui heb nongen hian, absoui.

16Paulus i dne, i ie gimdie le nemen, i boi: Mu gamel ber Israel, mu masi voamuiso Jehova, ha hirong nongen ordo. 17Jehova, Ndorlaben asu Israel i gin loh su damdu, i gin loh su lao aden ber Israel i gin sobani su le gor asu Egipten, boen i gin rumburdi su, gin dulieni su le gor asu Egipten gineao. 18Le Kristmas mahangul i gin sobani su, golnisden su. 19I gin ndumbue gor manondrdolo, gin hengen beleng asu le ndro su Israel. 20Kristmas le mburer aden ogoro mahangad e limungul. Boen i gin hengen le ndro su ndremda gord, mabenan le taim ad Samuel. 21Su Israel ha lengi King homo. Jehova gin hengen le ndro su Saul, ndur ad Kis i homo ber um Benjamin, i King asu le Kristmas mahangul. 22Boen Jehova i bieni Saul, i gin hinen David le King asu. I gin boharni, i gin vong, i gin boi: Io gin danoni David, ndur Isai, i hom gamel monen vooiso aden, i gob mburer ordo, dege io ha lengi. 23Homo asu ndurn, ngarn aden Jesu, i gin me, i da beg bolumia su Israel. 24Hanu Johanes gin me i da bohernou le ndro su Israel, i boi, su garbelueni bern asu, boen gin surhi su. 25Rang ad Johanes baghege boen, i boharni le ndro su, i boi: Mu hanguruen io Kristo, io Kristo bui. E lele homo i gmeher muren, io de vonei i bui, io dari sumianegen giao. 26Mu ndere hian mu ndur ad Abraham ma mu masi gorbo voamuiso Jehova, nongen ogo me ndro du masi. 27Su ndramed ber gor Jerusalem ma su labenen asu de dansu Jesu bui, de dansu boharni asu Provet bugane, su da hirong i Sabbath si, Sabbath si le numo hernou asu. Su ogo gin dieni Jesu, 28de dansu danoni heb longu aden momen bui, su gin dieni na gmed, gin doui i le nemen ad Pilatus. 29Be su gin hinen longu asu masi, dege su gin hondre dugian, su gin hedi i le beldigei gineao, su gin doni i le ngad. 30Jehova ge, i gin hingeni i le ngad aden. 31I gin mbsig le ndro su ber Galilea, su da gin gobad le gor Jerusalem bersi ndro i. Lobing, su holel gin ilndri i, malabo su boharni le ndro su ndramed leri. 32Iou da bohernou le ndro mu nongen hian ber lang, dege Jehova gin boharni le ndro su damdu nandugian. 33Iou ndur asu damdu, Ndorlaben gin hingeni Jesu le ngad aden, i da gin hengen me ndro du, dege i gin boharni le ndro su le Psalm maruo, dege su gin hondre: Uo nduro, eruar io gin ilgi uo. 34I gin hingeni i le ngad aden, i mbueren mandern i borah, dege su gin hondre nandugian: Io beg hengen le ndro mu memrad ber lang, io da gin boi goru le ndro David, io beg hengen i le ndro i. 35Homo i da gin hondre lie: Uo de danem somui bui, lao adem Helian na gborah. 36David i ginmad, be rang aden hian gina boen, i da gin bo mburer ad Jehova, dege Ndorlaben ha lengi i. Meluan gina le ndro su damen aden, ma mandrn gin borah. 37I ge, Jehova i da gin hingeni i, mandrn de gin borah hebsa bui. 38Mu ndere hian, io beg boharni le ndro mu, Jesu i da esbui longu momen giao. 39Nongen ad Mose de danen esbui longu momen bugane. Ndorlaben Jesu Kristo, i ge, i hinen i le ndro homo ma homo i da boro ndoui aden. 40Or gulue meluamu, debosan Provet i da hondre le ademu nongen ogoro: 41E lele, mu da gin hangaini i, meluamu gu ieb, mu na glos gane, io da bo mburer le rang ademu, mburer mandromai. Ar homo i beg bosoui leri, de danmu boro i bui. 42Be su gin bieni numo hernou asu, su ndemani sor, sor meher le Sabbath muren bersilie, i absou longu hendre e hendre. 43Be su gineao gane, su Juda mabosanged, dagara su Haiden, voasuiso Jehova, su ndrbon Paulus sor Barnabas. Sor gin henunuen su, sor gin ndemani su, su dandon le golnisden ad Jehova. 44Le Sabbath muren, baghege su ndramed masigane ber gor gin me goure, beg hirong nongen ad Ndorlaben Jesu. 45Be su Juda gin ilndri su ndramed mabosanged dagara, ndrnesu i mah le asoro, su bo iil le ndro sor, su boii sor.

46Malabo Paulus sor Barnabas sor vong le ndro su: Iou gin bosoui nongen ad Jehova ogo hanu le ndro su Juda, mu da bieni nongen aden, mu de vonei le gor lundielang hebsa bui. E lele, malabo iou dogi le ndro su Haiden, 47dege Ndorlaben gin bai me ndro du: Io gin hinen uo le sul asu Haiden, uo na gsobani su gor masi ber boan. 48Be su Haiden gin hirong nongen ogo, su mugmug ge, su mugueni nongen ad Ndorlaben. Su masi, Jehova ha lengi, su ibdi gor lundielang, su gin boro ndoui ad Ndorlaben. 49Nongen ad Ndorlaben gin hilou le ndro su Haiden dagara. 50Su Juda loh su labihin ber gor le goure, dagara su labenen ber gor, boen su bo iil le ndro Paulus sor Barnabas, su robuldi sor le gor asu gineao. 51Sor gin sebui gas ber gor ogo i da le ndegesor, gor ogo gina momen ge, sor dogi le gor Ikonium. 52Su lao ad Jesu ogo su mugmug ge, bergolsor i beb le Meluan Helian.

Currently Selected:

Apostel 13: LLENT

Highlight

Copy