Apostel 12

Herodes Agripa i daii Jakobus i hosi Petrus i na gmed.

1-2King Herodes, ndrnen i mah le asu lao ad Jesu, i hosi su holel asu, i daui su le kalabus, boen i daii Jakobus, ndern Johanes le mordo borla. 3Be i gin ilndri, su Juda mugueni i leri, i hosi Petrus lie le rang asu Juda, be su ien suslong e ndurmeh. 4Be i gin hosi i, i daui le kalabus. Su polisboi masongul e onou gin bogulue i le kalabus. Be uru asu boen, i beg dieni Petrus na gmed. 5Su gin bogulue Petrus hian ge, su lao ad Jesu su da soling ndoun le ndro Jehova. 6Be Herodes beg bo gord le ndro Petrus, Petrus i da medir lobing, hom polisboi i da le nemen sengen, homo i da le nemen gameao. Su gin hosi Petrus le sen maruo. Dagara su polisboi su da le marbohon um. Su bogulue babi. 7Malabo Angelo ad Ndorlaben i da le lundieum, engerang aden i da hinganen. Angelo ogo i hingeni Petrus, i rii mandern, i vong, i boi, edne roud, sen gin los le boan molhege. 8Malabo Angelo i vong le ndro i: Hosi salo adem, daui sumianagem. Petrus i hinen i, boen Angelo i vong le ndro i: Hedi salo adem manden le legen, e ndrbo. 9Petrus i ndrbon Angelo, su bieni um, Petrus de danen i bui, longu masi Angelo gin bai, i ndangen, de i inhini aden. 10Su bieni um, su meher baghege ndro su polisboi, su bieni su, su gin meher le babi manden ber aiern. Be su da baghege, babi ogo i deh molhe. Su gin meher le marbohon Kalabus, su dogi le sal, boen Angelo i bieni Petrus, i do da baghege ndro i bui. 11Malabo Petrus i mamed, i vong, i boi: Malabo io dono i ndangen, Ndorlaben gin rendegien Angelo aden, i gin rumburdi io le nemen ad Herodes, i gin rumburdi io le gus asu Juda. 12Be i da gin hanguruen longu ogo masigane, i iao le um ad Maria, nanen ad Johanes, su da bosoui i Markus lie. Su lao ad Jesu su do da le um, su bo lodu. 13Petrus i reregdi babi ber um, hom bihilou ngarn Rode gin me, beg hirong ngasen ad homo, i da le marbohon um. 14I da gin hirong ngasen ad Petrus, goln gin dud le audi babi, i mugmug manden, i hilou le lundieum, i boharni le ndro su, Petrus i da le lobohon um. 15Su vong le ndro i, su bodeie: Bugane, nongen adem gouge. I vong le ndro su lie, aga Petrus. 16Su bodeie: Aga hom Angelo aden. Petrus i da lobohonum, i reregdi, malabo su audi babi, su ilndri Petrus meluasu masi i ieb manden. 17I gimdie le nemen, i vong: Su simge, i bosoui le ndro su longu masigane, Ndorlaben gin rumburdi i, boen i vong le ndro su, i boi: Boharni longu ogo le ndro Jakobus, ma le ndro su ndern masi. Boen i bieni Jerusalem, i dogi le gor hoger e hoger.

18Madourang, meluasu polisboi gin ieb, be su de gin ilndri Petrus bui. 19Herodes gin rendegien su lao aden, su gdulieni Petrus le ndro i. De dansu danoni Petrus bui, malabo i bo gord le ndro su polisboi, boen i daii su masi. Muren Herodes i bieni gor asu Judea i dogi le gor Sesarea, i dandon le gor. 20Ndrnen i mah le asu Tirus e Sidon. Su rendegien su holel asu le ndro King, su ndemani i, mbue i gob iil le ndro su. Blastus, homo asu ndorlaben ad King, i sobani su gor asu Sidon e Tirus, i da le leng, gan ansu bui, be su Juda bo iil le ndro su. 21Herodes beg lug beno bersi muren i daui golos aden, golos ad hom King i lugdo le logna King, i bosoui le ndro su heb nongen. 22Su ndramed, su da gin hirong i, su loh, su boi: Aga nongen ad hom ndramed bui, aga nongen ad Jehova ge. 23Malabo Angelo ad Ndorlaben i rii Herodes, le surien hanguruen aden momen, i de gin mugueni Jehova bui. Jab momen gin hedi i. Boen i ginmad. 24Nongen ad Jehova gin menda, gina le gor manan. 25Barnabas sor Saulus sor gin bieni gor Jerusalem, sor gin mul le gor Antiogia. Johanes, su bosoui ngarn aden Markus, i la born ndro sor.

Currently Selected:

Apostel 12: LLENT

Highlight

Copy