Petrus I 2
2
Mu mundrul le nongen helian.
1Hian e bieni bern momen masi, mbue bahilou, mbue ar gogobaini su, 2hian mu dege su mamemei, su gin meher le boan houen. Gien nongen ad Jehova, dege su mamemei su gien sus ad nanen, boen mu gmenda gle ndoui ber lang. 3Ar danmu Ndorlaben i da hian ge le ndro mu. 4Ar mu gmeher ndro i, aga i bahud mamaren ge, su ndramed, su gin robieni i, Jehova ge i gin bogulue i hian. 5Ar mu gmeher ndro i mu bahud mamaren ber um aden helian dagara lie. Mu Prister (ndremda dohor) helian ge, danmu dohor longu ber meluan ademu, dege Jehova ha lengi le ngarn ad Jesu Kristo. 6Su gin hondre le buk helian: E lele, io da daui bahud hian manden ge, ar homo i boro i, i de glos bui. 7Mu ge, mu da gin boro ndoui aden ge, danmu ibdi memrad ogo hian ber lang. Le ndro su ge, su lao ad Jesu bui, bahud ogo, su ndremda um gin bieni i i gob momen le ndro su. 8Ndrnesu i irgu le aden, su glos leri, de delengasu le nongen aden bui, de dansu boro ndoui aden bugane, dege Jehova ha lengi su ghinen i. 9Mu ge, mu dege su King, mu dege su Prister, mu lao aden ge, mu ber gor aden helian, mu ad Ndorlaben ge. I ha lengi mu gobharni le ndro su mburer aden hian manden ge, i da gin hinen le ndro mu, be i gin rumburdi mu le gor ndrogmoan, gin rui mu gle sul aden hian manden. 10Goru mu aden bui, malabo mu ad Jehova ge. Goru heb gahaloseli ad Jehova de la ndro mu bui, malabo ge gahaloseli ad Jehova dsoln i da ndro mu.
11Mu ndere hian, io ndemani mu: Mu da dogi ge le sal ademu, mu ber gor ogo bui, mu ber gor manan ge. Hian e bieni hangungerou ber sengen ademu, hangungerou ogo momen ber sengen i bo iil sidesi gle ndro meluan. 12Ha dogi monen ge le sal ademu, le bormarsu Haiden. Ar su gogobaini mu, ar su bahilou le nongen asu, ar su ha vong nanenongen le ademu, su momen gleri. Ar homo i ilndri mburer ademu hian ge, i gabmugueni Jehova le rang aden hian ge.
Delengasu le Gaverment.
13-14Delengamu le nongen asu ndorlaben, ghinen mburer asu, aga Sesar de homo asu ndurhian. De hom ndorlaben ber gor ademu. Jehova gin rendegien su, su gob gord le ndro su ndramed momen, su surien mburer asu hian gle hian ge. 15Aga Jehova i ha lengi mu ha dogi hian monen ge, boen dansu lugdo bohosu bui, su da gahi longu hendre momen ademu, su simge. 16Ndorlaben gin rumburdi mu ndangen, mbue hinen longu momen, mbue gorni i. Gob mburer ademu, dege su lao dandendegei ad Jehova. 17Gabmugueni su ndramed dege i vonei le ndro su, golmuisden su ndere, ha noh Jehova, gabmugueni Sesar.
Nongen le ndro su lao asu ndorlaben.
18Mu lao dandendegei, delengamu le nongen asu Ndorlaben ademu, aga i de vonei bui, be delengamu le nongen asu ndorlaben hian ge, su da bo hian le ndro mu, ha delengamu le nongen asu ndorlaben momen dagara lie. 19Aga Jehova i ha lengi, ar homo i ibdi ngendian le hauen, i ghanguruen Jehova le rang aden momen, be i de gin bo longu momen bui, be su gob ngendian le ndro i le longu aden hian ge. 20Ndorlaben de danen mugueni mu bui, be mu gin bo longu momen, su rii mu le surien longu ademu momen. Aga i hian monen ge, ar mu gin dogi monen ge, ma su bo momen le ndro mu le longu ademu hian. 21Ndorlaben ha lengi dagara, Kristo gin ibdi ngendian aden i ha leng surien ngendian adu, i gin henunuen du le sal hasel hian monen ge, i ha lengi, iou do ndrobon le sal aden. 22I de gin bo longu momen bui, bohon de gin bahilou hebsa bui. 23Be su gin boii i, i de gin boii su lie bui, be su gin bo momen le ndro i, ndrnen i de gin mah le asu bui, i gin ilgi gord masi le nemen aden ge, i da bo gord le ndro su monen gane. 24I gin ilgi longu adu momen le hauen, i gin dadhe su le beldigei aden. I ha lengi, iou ginmad gane le longu momen, iou mamaren ge le longu hian monen ge. I gin regurdueni du le ngendian aden, le ndrai aden. 25Goru mu dege su meh, su da le sal momen ge, malabo mu gin belueni sal ademu, mu gin mul le ndro ndremda meh, i da bogulue mu gle hian sidesi.
Currently Selected:
Petrus I 2: LLENT
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society 1956
