Korint I 15
15
Heb Nongen Le Asu, Su Da Gin Mad.
1Mu ndere hian, io ha leng, mu hanguruen nongen ordo io da gin bosoui le ndro mu le longu ber lang. Mu da gin somui ri, mu da ndoa le nongen ogo. 2I da rui mu le gor lundienlang, be mu somui le nongen masigane, iou gin bohernou le ndro mu, mu de gin boro ndoui ad Ndorlaben gle molhe bui. 3Io da gin bosoui le ndro mu longu hendre e hendre, Ndorlaben i gin daui le bergolo hanu, nongen dege ogoro: Kristo i gin mad le surien longu adu momen, dege su gin hondre le Buk Helian. 4Su gin doni i le ngad, bing madolo muren i gin ndne lie le ngad aden, dege su gin hondre le Buk Helian. 5I gin mbsig le ndro Kevas, boen le ndro su masongul e rumou. 6Boen le ndro su ndern malimengad, su gin ilndri i bersi, baghege su masigane su do da le boan, su holel ge su gin mad. 7Boen i gin mbsig le ndro Jakobus, boen le ndro su Apostel masigane. 8Boen i gin meher ndro io lie, io dege sameluan mbunana ge. 9Io homo molhege le moleng asu Apostel, io de vonei ngarn Apostel bui, io gin hingismad su lao ad Jehova. 10Golnisden ad Jehova ge i gin hinen io le Apostel aden, golnisden aden i de gin meher molhe de la ndro io bui. Io gin bo mburer mabosanged hanu le asu masi, io ge bui, golnisden ad Jehova ge, i gin bo mburer le mondro ma le bergolo. 11Gonan, su da gin bo mburer, de io, bohernou adu bersi ge, mu gin boro ndoui le nongen adu.
12Io da gin bohernou le ndro mu, Kristo gin edne le ngad aden. Hi derbe, su holel su vong, su bai, su da gin mad de dansu dne le ngad asu bui. 13Be su de dne le ngad asu bui, Kristus lie de gin ndne le ngad aden bugane. 14Be Kristus de gin ndne le ngad aden bui, bohernou adu gina molhe ndro mu, mu da gin boro ndoui ber lang dahed. 15Iou da gin bahilou ge le longu ad Jehova, iou da gin vong, iou gin bai, Jehova gin hingeni Kristo le ngad aden, i de gin hingeni bui, be su da gin mad de dansu dne le ngad asu bugane. 16Be su de dansu dne le ngad asu bui, Kristo lie i de gin ndne le ngad aden bui. 17Be Kristus de gin ndne le ngad aden bui, mu da gin boro longu ber lang dahed. Longu ademu momen i dandon le bergolmu. 18Dagara su, su da gin mad le ngarn ad Kristo, su gina momen ge. 19Be iou ndramed ge, su da belengeni Kristus le rang asu hian ber lang, ndangen, iou molhege, iou gina momen ge, hanu le asu ndramed masigane ber boan.
20Malabo dandu i, Kristo i gin ndne lie le ngad aden, i hanu le asu masi, su da ginmad. 21Su ndramed masigane, su da ginmad le longu momen ad homo, su masigane su gedne lie le mburer ad homo lie. 22Su masigane su na gmed le longu ad Adam, su masigane su gedne lie, su mamaren gle mburer ad Kristo. 23Homo ma homo le rang aden. Hanu Kristo, boen su ad Kristo, be i gmeher lie. 24Boen su masigane le rang be Kristo i da daui gor aden le ndro Jehova Damen aden, be i da gin ndumbue boen ndoui masigane asu ndorlaben ber boan de ber lang. 25Boen i King, i homo ge, i ndounen su ndremda rah aden masigane ndegen gle golsu. 26Boen, i rii Ndorlaben i da gin ndaii su ndramed, ndremda rah ad Jehova. 27Ndangen, i gin ndounen su ndremda rah masigane, gin rui su le boan ndegen gle ndro su. Be i da bai, i ndounen su masigane, homo i da ndro su bui, i ge, i Ndorlaben, i da gin bo iil le ndro su ndorlaben masi ber boan e ber lang. 28Be Ndurn gin bo bahun boen, boen i doui nemen aden gle ndro Jehova, i aden ge, ma Jehova i homo i da Ndorlaben ber lang e ber boan.
29Desa su holel ademu su da surhi su lao ad Jesu Kristo le bormarsu, su da gin mad? Desa su hanguruen su, su da gin mad? Le surhi asu, be su da gin mad, dansu de dne lie bui. 30Iou hi derbe, desa iou da somui, be su bo momen me ndro du sidesi? 31Bing si e rang si dansu gmeher, dansu daii du. Mu ndere hian, aga ndangen, mu danmu leri, mu surian le mburer ordo, io da gin hinen i le ndro Jesu Kristo, i Ndorlaben adu. 32Be io da gin bo iil le ndro Laion, ber lonhou, le gor Evesus, dege su ndramed molhe su hinen i, aga i de danen sobani io bui, be su, su da gin mad de dansu dne lie bui, gonan iou ha leng ien gan, iou ha leng bo gous, mo iou na gmed. 33Mbue bahilou gle meluamu, su ndramed momen, su da baghege ndro uo garbelueni bern adem hian, uo gibdi bern asu momen. 34Ghanguruen monen le bergolmu, ghanguruen longu masi hian ge, mbue hinen longu momen. Su holel ademu de dansu Jehova heb hian monen masou, hian, bombulmu i gmesi leri be io da vong le ndro mu dagara. 35Malabo su holel ademu, su e ndemani io, su da gin mad, su gedne lie derbe? Mandrsu i hi derbe? 36Uo gouge, be uo da daui gorn le beleng i de mbsig le houen bui, hanu i na gmed ge. 37Be uo da daui begen masigane i de mbsig bugane, dege uo gin daui le boan, uo da daui begen molhe le boan. 38Ma Jehova i da hengen le ndro i mandrn dege i ha lengi. 39Mandrn le longu masi i bersi bui, mandrn asu ndramed i ndehendre, sengen asu ndegen mahagal i ndehendre, sengen ad ndorgan i ndehendre, ma sengen le ni i ndehendre. 40I da le gor lundielang mandrn asu dege ber gor boan bui, mandrsu ndramed su da le gor lundielang i ndehendre, mandrsu ndramed ber boan i ndehendre. 41Mernal i de hinganen dege vara bui, mbul i de hinganen dege su biri bugane. Biri si e si i da hinganen ndehendre. 42Dagara su ndramed, be su gedne le ngad asu. Mandrsu molhege i los le boan su gedne lie le engerang ad Jehova. 43Su ndramed molhege su los le ngai asu, Jehova i da hingeni su, i run su le engerang aden. Su ndramed su da heb ndoun bui, su doni su le ngad, Jehova i ilgi ndoui ber lang gle ndro su, be su gedne lie. 44Ndangen su doni mandrn molhege le ngad, Ndorlaben i da hingeni su, mandrsu i mamaren, su da le engerang. Mandrn molhege ber boan i do da, dagara mandrn ad meluan, mandrn ber lang. 45Dege su gin hondre goru: Adam, ndramed hanu, Ndorlaben gin mengseni i, bergoln i da mamaren, Adam ber muren, i da meluan ge, i da mamaren. 46Hanu mandrn i meher, boen meluan. 47Ndramed hanu Jehova gin mengseni i le boan, i ber gor boan ge. I ge i da meher muren, i ad Jehova ber gor lundielang. 48Su ndramed masigane ber boan su dege Adam ber boan, su ndramed masigane ber lang su dege Kristo ber lang. 49Goru iou sameluan ad Adam ber boan, hian iou da ibdi bern ad Kristo ber lang, iou sameluan aden ge. 50Mu ndere hian, io boi le ndro mu: Sengen e ndrai de danen ibdi gor lundielang bui, sengen molhege i da glos i de danen ibdi memrad ber gor lundie lang bugane, i da mamaren ge sidesi. 51E lele, io da boharni le ndro mu longu hendre Ndorlaben gin nhui sidesi: Iou masigane iou de gmad bui, Ndorlaben i garbelueni mandru masigane. 52I ghinen i bersi, i ghinen i roud, be ndah manden ber gor lundielang i reng. Be ndah i reng, su da gin mad, su gedne lie le ngad asu, su horuan, su mamaren ge, boen Ndorlaben i garbelueni mandru. 53Mandrn ogo molhege i ibdi mandrn ad Jesu Kristo, i da mamaren ge sidesi. Mandrn ogo i da heb ndoun bui, i da gmed, ibdi mandrn ber lang i de somad bui. 54Be mandrn ogo i da glos, i ibdi mandrn ber gor lundielang, be mandrn ber boan i da gmad, i ibdi mandrn ber lang i de somad bui, boen longu na gmehere, dege su gin hondre goru: Su ndramed su na gmed bui, gin mad asu gina sumburdi Ndorlaben gin ndounen i. 55Uo da oho malabo, uo da gin daii su ndramed? 56Uo da oho malabo, uo da gin rii su le born adem? Born adem aga longu momen ber boan i da gin ibdi ndoui adem le nongen ad Jehova. 57Iou bamugueni Jehova, iou ndounen longu masi momen gle ndoui ad Jesu Kristo, i Ndorlaben adu. 58Mu ndere hian, hian mu ndoa, mu da bo mburer ad Ndorlaben hian ge, danmu i, mburer ademu, mu da gin hinen i le ndro Ndorlaben, mu da gin hinen dahed bugane.
Currently Selected:
Korint I 15: LLENT
Highlight
Copy
Compare
Share
Want to have your highlights saved across all your devices? Sign up or sign in
Published by the British and Foreign Bible Society 1956
