1 Korintus 9

Yesus pung utusang-utusang pung hak deng tugas

9:1-27

1Basudara e! Jang sampe kamong sangka kata beta seng bebas par biking apa sa iko beta pung mau? Jang sampe kamong sangka kata beta balong lia Tuhan Yesus yang katong somba tu? Jang sampe kamong sangka kata beta bukang Antua pung utusang? Jang sampe kamong lupa kata kamong bisa parcaya, itu tagal beta pung karja par Tuhan? 2Biar kata orang laeng anggap beta ni bukang Yesus pung utusang, mar par kamong, beta ni Antua pung utusang. Kamong parcaya Tuhan Yesus tagal beta kasi tau Kabar Bae par kamong. Itu jadi bukti kalo beta ni Antua pung utusang.

3Jadi, par orang-orang yang tudu kata beta ni bukang Yesus pung utusang, beta mau bilang bagini par dong: 4Jang sampe kamong sangka kata katong yang jadi Yesus pung utusang-utusang ni seng ada pung hak par makang deng minong dari kamong tagal katong pung karja kapa? 5Jang sampe kamong sangka kata katong seng ada pung hak par bawa katong pung bini yang parcaya waktu pi kasi tau Allah pung Kabar Bae, sama deng Yesus pung utusang-utusang yang laeng ka Petrus#9:5 Petrus: Teks bahasa Yunani bilang, Kefas. Itu tu Petrus pung nama laeng. ka Yesus pung sudara-sudara tu kapa? 6Ka, jang sampe kamong pikir kata cuma beta deng Barnabas sa yang musti karja par isi katong pung kampong tenga kapa?

7Coba pikir! Tantara sapa yang pi prang deng dia pung ongkos sandiri? Sapa yang tanang anggor mar seng makang akang pung bua? Ka, sapa yang jaga domba mar seng minong akang pung susu? 8Beta seng bicara iko manusia pung biasa sa, mar Kitab Torat sandiri jua ada bilang bagitu lai. 9Barang, dalang Kitab Torat yang Musa su tulis tu ada bilang kata, “Karbou yang ada inja-inja gandum par kasi talapas akang pung kuli tu, jang kamong tutu akang pung mulu. Kasi tinggal akang makang gandum tu sadiki.”#Carita Ulang 25:4 Jadi, Kitab Torat bilang bagitu tagal Allah cuma taru kira deng karbou? 10Ka, jang sampe itu soal katong samua? Memang batul, Antua bilang bagitu tu par katong! Sapa yang bapacol deng sapa yang kasi pisa biji gandum dari akang pung kuli, dong musti harap nanti dapa dong pung bagiang dari situ.

11Jadi, kalo katong su tanang Allah pung kata-kata par kamong, masa katong seng bisa dapa apa yang katong parlu par katong pung hidop dari kamong? 12Kalo orang laeng yang kasi balajar Allah pung kata-kata par kamong sa ada pung hak par dapa dong pung bagiang dari kamong, kong katong lai? Katong pasti ada pung hak yang labe basar lai. Mar katong seng tuntut katong pung hak tu. Katong mala tanggong samua yang katong parlu, biar jang sampe itu pele orang par tarima Kabar Bae soal Kristus yang katong kasi tau. 13Ka, jang sampe kamong seng tau kalo orang yang karja di Tampa Sombayang Pusat, dong makang dari korbang yang orang bawa ka sana? La orang yang karja par kasi korbang binatang par Allah di tampa bakar korbang di sana, dong dapa bagiang dari daging yang dapa kasi korbang tu to? 14Bagitu lai deng orang yang kasi tau Kabar Bae. Tuhan Yesus su putus kalo dong musti dapa hidop dari dong pung karja tu.#Matius 10:10; Lukas 10:7; 1 Timotius 5:18

15Mar beta seng parna pake beta pung hak-hak tu sama sakali. Beta seng tulis surat ni biar kamong kasi akang par beta, tagal yang biking beta paleng sanang tu kalo beta bisa kasi tau Kabar Bae soal Kristus cuma-cuma. Kalo sampe ada orang yang rampas apa yang biking beta pung hati sanang tu, labe bae beta mati sa. 16Mar, kalo beta kasi tau Kabar Bae, beta seng bisa puji-puji beta pung diri, tagal itu memang tugas yang beta musti biking. Cilaka beta kalo sampe beta seng kasi tau Kabar Bae tu. 17Kalo beta biking akang tagal beta sandiri yang pili par biking akang, beta memang pantas par tarima apapa dari situ. Mar ini Tuhan sandiri yang pili beta par biking akang. Antua parcaya beta par biking akang. 18Kalo bagitu, beta mau dapa apa dari situ? Yang beta dapa tu ini: Beta bisa kasi tau Kabar Bae cuma-cuma deng seng pake beta pung hak par minta apapa dari kamong.

19Beta ni bukang sapa-sapa pung jongos. Mar biar kata bagitu, beta biking diri macang deng jongos par samua orang, biar beta bisa tolong labe banya orang lai par parcaya Kristus. 20Jadi kalo beta ada sama-sama deng orang Yahudi, beta biking diri macang deng orang Yahudi biar beta bisa tolong dong par parcaya Kristus. Kalo beta ada sama-sama deng orang-orang yang pegang atorang-atorang dalang Kitab Torat, beta biking diri sama deng dong, biar kata beta sandiri seng taika deng atorang-atorang tu. Beta biking bagitu biar beta bisa tolong dong par parcaya Kristus. 21Kalo beta ada sama-sama deng orang-orang yang seng pegang atorang-atorang dalang Kitab Torat, beta biking diri macang deng dong, biar beta bisa tolong dong par parcaya Kristus. Mar, itu bukang pung arti beta seng iko Allah pung parenta. Beta iko Kristus pung parenta. 22Kalo beta ada sama-sama deng orang parcaya yang balong batul-batul kuat, beta biking diri macang deng dong biar beta bisa tolong dong par labe parcaya Kristus lai. Jadi, beta usaha par biking diri sama deng samua orang, biar paleng kurang, beta bisa tolong satu dua orang dari dong par parcaya Kristus. 23Beta biking samua tu biar ada banya orang yang parcaya Kabar Bae soal Kristus tu, biar satu waktu nanti beta bisa tarima beta pung bagiang dari Allah sama-sama deng dong.

24Basudara e! Kamong tau kalo dari samua orang yang iko lomba lari, cuma satu orang sa yang dapa hadia to? Tagal itu, kamong jua musti usaha sunggu-sunggu par iko Tuhan pung mau tarus biar kamong bisa dapa hadia dari Antua. 25Sapa yang iko lomba apa sa, dia musti batul-batul tau ator dia pung diri dalang sagala hal. Dia biking bagitu tagal dia inging dapa hadia#9:25 Teks bahasa Yunani pake kata stefanos yang pung arti ‘makota’. Waktu itu, orang yang manang lomba apa sa biasa dapa makota dari daong, jadi akang capat layu. yang bisa ancor. Mar katong, katong biking bagitu par dapa hadia yang seng bisa ancor, yang ada tarus-tarus. 26Tagal itu, beta seng lari sabarang, mar usaha lari sampe ka garis finis. Ka, macang deng orang yang suka tinju, beta seng asal pukul sa. 27Mar, beta lati beta pung diri deng karas sampe beta bisa batul-batul ator akang. Beta biking bagitu biar jang sampe abis kasi tau Kabar Bae par orang laeng, beta sandiri seng tarima hadia dari Allah.

Currently Selected:

1 Korintus 9: ABMA

Highlight

Copy

Compare