1 Korintus 10

Jang somba patong-patong macang orang Israel pung tete-nene moyang

10:1-22

1Basudara e! Beta mau kamong salalu inga apa yang jadi dolo, waktu katong pung tete-nene moyang kaluar dari negri Mesir. Dong samua bajalang dalang awang#10:1 Yang Paulus maksud deng awang tu tiang awang yang bajalang sama-sama deng bangsa Israel di padang gurun. Tiang awang tu tanda kalo Tuhan Allah ada sama-sama deng dong. Lia Kaluar dari Mesir 13:21-22, Orang Israel di Padang Gurun 9:15-22, deng Carita Ulang 1:32-33. pung sombar. Dong bajalang langgar lautang di tampa yang Allah su kasi karing.#Kaluar dari Mesir 13:21-22, 14:22-29 2Itu sama deng dong su dapa baptis dalang awang deng dalang lautang, biar dong jadi Musa pung orang-orang. 3Dong samua su makang makanang yang sama yang Tuhan kasi.#Kaluar dari Mesir 16:35 4Dong samua jua su minong aer yang sama yang Tuhan kasi, yang hener kaluar dari batu satu dari Tuhan.#Kaluar dari Mesir 17:6; Orang Israel di Padang Gurun 20:11 Batu tu sama deng Kristus yang bajalang sama-sama deng dong tarus. 5Mar biar kata bagitu, Allah seng suka deng banya dari dong, tagal dong pung kalakuang. Tagal itu, dong mati abis la dong pung bangke talamburang di padang gurun.#Orang Israel di Padang Gurun 14:29-30

6Samua tu jadi conto par katong, biar katong jang inging par biking kajahatang macang deng dong. 7Jadi, jang somba patong-patong macang deng babarapa orang dari dong. Allah pung Tulisang jua su bilang, “Bangsa tu dudu makang-minong la abis itu dong mulai manari barsuka deng somba patong-patong.”#Kaluar dari Mesir 32:6#10:7 Dolo-dolo, waktu somba patong-patong, orang-orang biasa manari barsuka la tidor deng orang yang bukang dia pung laki ka bini. 8Jang tidor deng orang yang bukang kamong pung laki ka bini, macang deng babarapa dari dong. Tagal dong pung kalakuang tu sampe 23.000 orang mati dalang sahari sa.#Orang Israel di Padang Gurun 25:1-9 9Jang katong coba Tuhan#10:9 Dalang babarapa teks bahasa Yunani dolo-dolo, ada yang seng pake kata Tuhan mar kata “Kristus”. sama deng babarapa dari dong la dapa bunu dari ular bisa.#Orang Israel di Padang Gurun 21:5-6 10La jang barsungut macang deng babarapa dari dong sampe dapa bunu dari malekat yang datang par bunu dong.#Orang Israel di Padang Gurun 16:41-49

11Samua yang jadi par dong tu jadi conto par katong, la samua tu tatulis par kasi inga katong yang hidop di dunya yang su amper kiamat ni. 12Jadi sapa yang rasa diri kuat, ati-ati jang sampe dia jatu. 13Sabang kali kamong dapa coba par biking dosa, kamong musti inga kalo samua manusia jua dapa coba macang bagitu. Mar Allah salalu biking apa yang Antua janji. Tagal itu, Antua pasti seng parna kasi biar kamong dapa coba labe dari kamong pung kuat par tanggong akang. Kalo kamong dapa coba, Antua nanti kasi jalang kaluar par kamong biar kamong bisa kuat par batahang deng seng jatu.

14Tagal itu basudara jantong hati e, jang somba patong-patong! 15Beta bicara par kamong tagal beta tau kamong tu orang yang pung pikirang tajang. Timbang apa yang beta mau bilang ni bae-bae! 16Waktu katong minong anggor par inga-inga soal Kristus yang su kasi tumpa Antua pung dara di kayo salib tu, katong minta dangke dari Allah. Kamong tau ka seng kalo itu sama sa deng katong su taika jadi satu deng Kristus, jadi satu deng Antua pung dara tu? Bagitu lai waktu katong pata-pata roti la makang akang par inga-inga soal Kristus yang su kasi Antua pung badang di kayo salib. Kamong tau ka seng kalo itu sama sa deng katong su taika jadi satu deng Kristus pung badang? 17Barang, biar kata katong ni banya, mar waktu katong makang par inga Tuhan Yesus, katong samua su batul-batul taika jadi satu badang, tagal katong samua makang dari roti yang satu tu.

18Coba lia orang Israel. Waktu dong abis kasi korbang par Allah di tampa bakar korbang, dong makang daging tu. Kamong tau ka seng kalo waktu dong makang akang sama-sama, itu sama sa deng dong samua su taika jadi satu deng Allah? 19Mangapa kong beta bilang bagitu? Beta pung maksud tu bagini: Patong-patong tu seng ada pung kuasa apapa, jadi seng apapa kalo katong makang daging yang su dapa kasi korbang par patong-patong tu. 20Mar, dong musti ati-ati tagal dong seng kasi korbang tu par Allah mar par setang-setang.#Carita Ulang 32:17 Jadi beta seng mau kamong taika jadi satu deng setang-setang tu.

21Jadi, kalo kamong su makang deng minong par inga Tuhan Yesus la taika jadi satu deng Antua, jang paskali kamong makang deng minong sama-sama deng orang-orang yang somba patong-patong la taika jadi satu deng setang-setang. 22Ka, jang sampe kamong mau biking Tuhan jumawa kamong? Kamong sangka kata kamong tu labe kuat dari Antua, jadi kamong bisa biking bagitu ka?

Ati-ati jang sampe tagal katong orang laeng bardosa

10:23—11:1

23Orang biasa bilang, “Katong bisa biking apa sa iko katong pung suka.” Itu memang batul, mar seng samua yang katong biking tu ada pung guna. Memang batul katong bisa biking apa sa iko katong pung suka, mar seng samua dari itu bisa tolong orang laeng par labe tamba parcaya. 24Jadi jang cuma pikir diri sandiri sa, mar musti pikir orang laeng lai.

25Jadi, kamong bisa makang daging apa sa yang orang jual di pasar. Seng parlu tanya lai kata daging tu su kasi akang par patong-patong ka seng, tagal pikir kata kalo makang daging macang bagitu tu dosa. 26Barang, dalang Allah pung Tulisang jua ada bilang, “Dunya deng akang pung isi samua tu Tuhan pung.”#Lagu-Lagu 24:1

27Jadi, kalo ada orang yang seng parcaya Kristus undang kamong par pi makang di dia pung ruma la kamong mangaku, makang apa sa yang dia kasi par kamong. Jang tanya lai kata makanang tu dia su kasi akang par patong-patong ka seng, tagal pikir kata kalo makang makanang macang bagitu tu dosa. 28Mar kalo kamong mau makang la ada yang bilang par kamong kata, “Makanang yang kamong mau makang tu, makanang yang orang su kasi akang par patong-patong”, jang makang akang. Jang sampe orang yang bilang akang par kamong tu rasa kalo makang daging tu dosa. 29Beta larang bagitu bukang tagal kamong, mar tagal orang yang bilang akang par kamong tu. Tagal kalo par kamong sandiri, makang makanang yang macang bagitu tu seng dosa. Mar, orang yang bilang akang par kamong tu nilai kata kamong ada biking dosa kalo kamong makang akang.

Sampe di sini, mangkali ada orang yang bilang kata, “Mangapa kong beta seng bole biking apa yang beta suka cuma tagal orang laeng anggap itu dosa? 30Kalo beta sombayang minta dangke do dari Tuhan baru makang makanang tu, mangapa kong orang tudu kalo beta ni biking dosa tagal makanang yang beta su minta dangke tu?”

31Mar, beta mau bilang bagini par dong: Kalo katong makang ka minong ka biking apa sa, katong musti biking akang biar Allah dapa puji! 32Jang tagal katong yo orang laeng bardosa, biar kata orang Yahudi ka bukang Yahudi#10:32 Bukang Yahudi: Teks bahasa Yunani bilang, “orang Yunani”. ka Allah pung jamaat. 33Sama deng beta, beta salalu usaha par biking bae par samua orang waktu biking apa sa. Beta seng pikir beta pung diri sandiri, mar pikir orang laeng lai. Beta biking bagitu biar dong bisa parcaya Kristus la salamat.

Currently Selected:

1 Korintus 10: ABMA

Highlight

Copy

Compare