1 Korintus 13
13
Sayang orang laeng tu labe panting daripada dapa sagala macang berkat rohani
13:1-13
1Basudara e, biar kata beta bisa bicara deng sagala macang bahasa yang manusia pake deng yang malekat-malekat pake lai, mar kalo beta seng sayang orang laeng, beta pung bicara tu seng ada pung arti apapa, macang deng tong kosong yang babunyi sa. 2Biar kata beta ada pung berkat rohani par kasi tau pasáng yang beta dapa dari Allah, deng mangarti sagala macang hal yang tatutu mati dari orang laeng, deng tau samua hal yang laeng lai, deng batul-batul parcaya Allah sampe bisa kasi pinda gunung lai, mar kalo beta seng sayang orang laeng, beta seng ada pung guna apapa. 3La biar kata beta bage-bage beta pung harta samua par orang-orang kasiang, mala kasi beta pung badang par dapa bakar tagal iko Yesus, mar kalo beta seng sayang orang laeng, samua tu seng ada pung guna apapa par beta.
4Orang yang batul-batul sayang orang laeng, dia tu bagini: sabar, pung hati bae, seng jalus, seng bicara pukul tinggi, deng seng sombong. 5Dia jua seng kasar, seng cuma pikir diri sandiri, seng takiri-kiri, deng seng simpang orang laeng pung sala. 6Dia tu jua seng sanang kalo ada orang biking apapa yang jahat, mar sanang kalo ada orang biking apapa yang batul. 7Orang yang sayang orang laeng, dia musti tahang hati biar kata apa lai yang jadi, salalu parcaya orang laeng, harap apa yang bae par orang laeng, deng kuat tarus biar kata dia susa deng sangsara.
8Kalo katong sayang orang laeng, katong pung sayang tu seng abis-abis, akang ada tarus-tarus. Mar satu waktu nanti, berkat rohani par kasi tau pasáng dari Allah, ka par bicara deng bahasa dari Allah pung Roh, ka par tau samua hal yang laeng, samua-samua tu nanti seng ada lai. 9Tagal sakarang, apa yang katong tau tu ada pung batas. Katong jua seng batul-batul bisa kasi tau pasáng yang katong dapa dari Allah. 10Mar nanti waktu Tuhan biking batul samua, katong seng parlu berkat rohani lai, tagal akang ada pung batas.
11Conto bagini: Waktu beta masi kacil, beta bicara macang anana kacil deng pung pikirang macang anana kacil lai. Mar sakarang waktu beta su basar, beta su kasi tinggal beta pung kalakuang yang macang anana kacil tu. 12Bagitu lai deng katong. Sakarang katong seng bisa batul-batul mangarti samua-samua, macang deng orang yang lia dia pung rupa di kaca yang kabor. Mar nanti waktu katong su baku dapa Tuhan muka deng muka, baru katong bisa batul-batul mangarti samua-samua, macang deng Antua batul-batul mangarti katong.
13Jadi sakarang, cuma ada tiga hal yang musti tetap ada: parcaya Tuhan, taru harap par Tuhan, deng sayang orang laeng. Mar, yang labe panting tu sayang orang laeng.
Currently Selected:
1 Korintus 13: ABMA
Highlight
Copy
Compare
Share
Want to have your highlights saved across all your devices? Sign up or sign in
© 2022, Sinode Gereja Protestan Maluku
