Popular Bible Verses from 1 Korintus 13

Share

Orang yang batul-batul sayang orang laeng, dia tu bagini: sabar, pung hati bae, seng jalus, seng bicara pukul tinggi, deng seng sombong. Dia jua seng kasar, seng cuma pikir diri sandiri, seng takiri-kiri, deng seng simpang orang laeng pung sala.

Orang yang sayang orang laeng, dia musti tahang hati biar kata apa lai yang jadi, salalu parcaya orang laeng, harap apa yang bae par orang laeng, deng kuat tarus biar kata dia susa deng sangsara.

Dia tu jua seng sanang kalo ada orang biking apapa yang jahat, mar sanang kalo ada orang biking apapa yang batul.

Jadi sakarang, cuma ada tiga hal yang musti tetap ada: parcaya Tuhan, taru harap par Tuhan, deng sayang orang laeng. Mar, yang labe panting tu sayang orang laeng.

Kalo katong sayang orang laeng, katong pung sayang tu seng abis-abis, akang ada tarus-tarus. Mar satu waktu nanti, berkat rohani par kasi tau pasáng dari Allah, ka par bicara deng bahasa dari Allah pung Roh, ka par tau samua hal yang laeng, samua-samua tu nanti seng ada lai.

Basudara e, biar kata beta bisa bicara deng sagala macang bahasa yang manusia pake deng yang malekat-malekat pake lai, mar kalo beta seng sayang orang laeng, beta pung bicara tu seng ada pung arti apapa, macang deng tong kosong yang babunyi sa.

Biar kata beta ada pung berkat rohani par kasi tau pasáng yang beta dapa dari Allah, deng mangarti sagala macang hal yang tatutu mati dari orang laeng, deng tau samua hal yang laeng lai, deng batul-batul parcaya Allah sampe bisa kasi pinda gunung lai, mar kalo beta seng sayang orang laeng, beta seng ada pung guna apapa.

La biar kata beta bage-bage beta pung harta samua par orang-orang kasiang, mala kasi beta pung badang par dapa bakar tagal iko Yesus, mar kalo beta seng sayang orang laeng, samua tu seng ada pung guna apapa par beta.

Conto bagini: Waktu beta masi kacil, beta bicara macang anana kacil deng pung pikirang macang anana kacil lai. Mar sakarang waktu beta su basar, beta su kasi tinggal beta pung kalakuang yang macang anana kacil tu.