1 Korintus 12

Allah pung Roh kasi berkat rohani yang beda-beda par orang-orang parcaya

12:1-11

1Basudara e! Sakarang beta mau bicara soal berkat-berkat rohani dari Allah pung Roh, biar kamong bisa batul-batul mangarti soal akang. 2Kamong sandiri tau to, kalo waktu kamong masi balong kanal Allah, kamong dapa hela par somba patong-patong yang seng bisa bicara tu. 3Tagal itu, beta mau kamong tau kalo seng ada satu orang lai yang dapa pimping dari Allah pung Roh bisa bilang kata, “Kutok biar akang Yesus tu”. La seng ada satu orang lai yang bisa bilang, “Yesus tu Tuhan”, kalo dia seng dapa pimping dari Allah pung Roh.

4Ada berkat rohani yang beda-beda yang katong dapa, mar samua tu asal dari Roh yang sama. 5La ada saribu satu macang cara par tolong orang-orang parcaya, mar samua tu asal dari Tuhan Yesus yang satu tu. 6Allah karja dalang manusia samua pung hidop deng saribu satu macang cara, mar Allah yang sama tu jua yang biking samua tu.

7Allah pung Roh kasi berkat rohani yang beda-beda par orang parcaya satu-satu par tolong Antua pung orang-orang samua. 8Par yang satu, Roh kasi berkat rohani par biking dia pung pikirang tajang biar dia bisa kasi nasehat yang pas. Par yang laeng, Roh yang sama tu jua kasi berkat rohani par mangarti Antua pung kata-kata la kasi tau akang par dong. 9Par yang satu, Roh yang sama tu kasi berkat rohani par biking dia pung parcaya par Yesus kuat paskali, labe dari orang laeng. Par yang laeng, Roh tu jua kasi berkat rohani par kasi bae orang saki. 10Par yang satu, Roh tu kasi berkat rohani par biking tanda-tanda herang. Par yang laeng, Roh tu kasi berkat rohani par kasi tau pasáng yang Antua kasi tau par dia. La par yang laeng lai, Roh tu kasi berkat rohani par tau kata mana Antua pung Roh deng mana bukang. Par yang satu, Roh tu kasi berkat rohani par bicara deng bahasa-bahasa yang dong sandiri seng mangarti akang, la par yang laeng, Roh tu jua kasi berkat rohani par kasi tau akang pung arti. 11Mar yang biking samua tu, itu Roh yang sama deng yang satu tu. Antua kasi berkat rohani yang beda-beda par satu-satu iko Antua pung mau.#Roma 12:6-8

Orang parcaya tu macang deng bagiang yang beda-beda yang taika jadi satu badang

12:12-31

12Basudara e! Manusia pung badang ni cuma satu sa, mar akang taika dari bagiang yang beda-beda la bagiang yang beda-beda tu taika jadi satu badang sa. Bagitu lai deng katong yang parcaya Kristus. Katong ni macang deng Kristus pung badang, yang taika jadi satu dari bagiang yang beda-beda.#Roma 12:4-5 13Barang, katong samua su dapa baptis dari Tuhan pung Roh yang sama, la Tuhan pung Roh tu su ika katong samua jadi satu badang, seng lia kata katong ni orang Yahudi ka bukang Yahudi,#12:13 Bukang Yahudi: Teks bahasa Yunani bilang, “orang Yunani”. jongos ka bukang jongos. Katong samua su tarima Roh yang sama, sama deng katong ada minong dari mata aer yang sama.

14Katong pung badang ni jua seng taika dari satu bagiang sa, mar dari banya bagiang. 15Mangkali kaki bisa bicara la bilang kata, “Beta ni bukang tangang jadi beta ni bukang bagiang dari badang.” Biar kata bagitu, mar akang tetap bagiang dari badang jua. 16Talingang jua bisa bilang, “Beta ni bukang mata, jadi beta ni bukang bagiang dari badang.” Biar kata bagitu, mar akang tetap bagiang dari badang jua. 17Kalo katong pung badang samua ni jadi mata, katong mau dengar bagemana? La kalo katong pung badang samua ni jadi talingang, katong bisa ciong bobou bagemana? 18Mar, Allah su ator bae-bae biar bagiang yang beda-beda dari badang tu ada di akang pung tampa satu-satu, iko Antua pung mau. 19Kalo badang samua cuma dari satu bagiang sa, katong seng bisa bilang itu badang. 20Jadi badang ni cuma satu sa, mar akang taika dari banya bagiang.

21Tagal itu, mata seng bole bilang par tangang kata, “Beta seng parlu se!” Ka, kapala jua seng bole bilang par kaki kata, “Beta seng parlu se!” 22Mar, mala ada bagiang-bagiang dari badang yang katong anggap seng kuat paskali, itu yang katong paleng parlu. 23Ada bagiang-bagiang dari badang yang katong anggap seng panting, itu yang katong taru kira akang bae-bae. La ada bagiang-bagiang yang katong anggap seng pantas kalo orang lia akang, katong kasi pakiang par tutu akang. 24Katong seng biking bagitu par bagiang-bagiang yang katong anggap bagus. Allah su susung katong pung badang dari bagiang-bagiang yang beda-beda, biar katong bisa taru kira par bagiang-bagiang yang katong anggap seng bagus. 25Antua biking bagitu biar badang tu seng tapica-pica, mar biar bagiang-bagiang yang beda-beda dari badang tu bisa taru kira satu deng laeng. 26Tagal itu, kalo ada satu bagiang yang saki, samua bagiang jua saki lai. La kalo ada satu bagiang yang dapa puji, samua bagiang jua sanang lai.

27Kamong samua yang parcaya Kristus tu sama deng Kristus pung badang. La kamong satu-satu tu sama deng bagiang yang beda-beda dari badang tu. 28Kamong tu jua Allah pung jamaat. Antua su angka babarapa orang dari jamaat par jadi:

Partama, Allah pung utusang.

Kadua, Allah pung juru bicara.

Katiga, guru par kasi balajar Allah pung ajarang.

Abis itu, Antua jua kasi berkat rohani par babarapa orang dari jamaat par biking tanda herang, par kasi bae orang saki, par tolong orang laeng, par jadi pamimping,#Efesus 4:11 deng par bicara deng bahasa yang dong sandiri seng mangarti.

29Samua orang dapa berkat rohani dari Allah, mar seng samua dapa berkat par jadi Allah pung utusang, ka Allah pung juru bicara, ka guru, ka biking tanda herang. 30Seng samua dapa berkat rohani par kasi bae orang saki, ka bicara deng bahasa yang dong sandiri seng mangarti, ka par biking orang laeng mangarti bahasa tu.

31Kamong musti usaha sunggu-sunggu par tarima berkat rohani yang labe panting.#12:31 Ka, “Kamong memang ada usaha sunggu-sunggu par tarima berkat rohani yang labe panting.” Mar sakarang, beta mau kasi unju jalang yang labe bae lai, labe dari berkat-berkat rohani tu.

Currently Selected:

1 Korintus 12: ABMA

Highlight

Copy

Compare