'Olic 145
145
O Sapahmek a Radiw
O nitilidan ni Tafiti a 'olic to sapahmek a radiw.
1Kawasaw ako, mipalosiyang kako to nika tadamaan Iso,
Hongtiaw ako, mipahmek kako a tahada'oc to ngangan Iso.
2O papahmeken ako Kiso to romi'ami'ad,
o papahmek kako to ngangan Iso a tahada'oc.
3O tadamaanay ko Tapang saka,
o tadapapahmeken Cingra,
caay ko mamafilo a lalaten ko nika tadamaan Ningra.
4O papalosiyangen no kasarayray no hkal ko nidmakan Iso,
o paparatoh cangra to tadamaanay a nitayalan Iso.
5O papasowal cangra to nika ci'dil ato nika tadamaan Iso,
o mamiharateng kako to kafahka'an a dmak Iso.
6O papasowal ko tamdaw to nika o kangodoan ko 'icel Iso,
o papalosiyang kako to nika tadamaan Iso.
7O papasowal cangra to nika makadofahay ko kanga'ay Iso,
o raromadiw a pahmek cangra to nika mo^cel Iso.
8O matomesay no sini'ada ato mikomi ko Tapang,
o caay ka narikay a makter Cingra, o matomesay no caay ka falic a olah Cingra.
9O sida'itay ko Tapang to tamdamdaw,
mildef i polong no nisanga'an Ningra ko sini'ada Ningra.
10 Tapangaw, o papahmek i Tisowanan ko nisanga'an Iso a ma^min,
o mamikansiya i Tisowanan ko so'linay ko faloco' a finawlan Iso a ma^min.
11O papalosiyang cangra to nika tadamaan no sakowan Iso,
o papasowal cangra to nika tadamaan no 'icel Iso,
12ta mafana' ko i hkalay a tamdaw a ma^min to nika tadamaan no nidmakan Iso,
ato nika ci'dil a tadamaan no nikowanan Iso a kitakit.
13O mida'ocay ko sakowan Iso,
o mamida'oc Kiso a malahongti.
O so'linay a tati'eren ko niktonan no Tapang a sowal,
o nga'ayay a ma^min ko nidmakan Ningra.
14Mipadama ko Tapang to mapadesay a tamdaw,
palowaden Ningra ko masamsamay a tamdaw.
15 Tapangaw, hinatala i Tisowanan ko ma'oripay a ma^min,
paflien Iso cangra to malokakaenen nangra to mihcahcaan.
16Pakadofahen Iso cangra a pafli,
rahker cangra a ma^min tonini.
17Sahto o mo^celay ko nidmakan no Tapang,
sahto o adayayay ko dmak Ningra.
18Miraod ko Tapang to mingitangitay i Cingraan a tamdaw,
mingata Cingra to so'linay a milongoc i Cingraan a tamdaw.
19Palahcien Ningra ko longoc no maolahay a mangodo i Cingraan a tamdaw,
tngilen Ningra ko pitahidang nangra a milongoc, pa'oripen Ningra cangra.
20Dipoten no Tapang ko maolahay i Cingraan a tamdaw a ma^min,
nikawrira, o tatkopen Ningra ko tatiihay a tamdaw.
21O papahmek kako to Tapang,
nanay mida'oc a pahmek to fangcalay a ngangan Ningra ko polong no nisanga'an Ningra.
Currently Selected:
'Olic 145: AMIS2019
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2019
