'Olic 144
144
O Pikansiya no Hongti to Nipipakalowid
O 'olic ni Tafiti.
1Nanay mapahmek ko Tapang o 'ongcoy ako,
pananamen Ningra kako to sakafana' a milood,
pasifana'en Ningra kako to sakasarocod a milood.
2O 'icel ako Cingra, o pisitaraan ako,
o pilimekan ako, o pa'oripay i takowanan,
o piti'eran ako Cingra, pasayra kako i Cingraan a milongoc to pipa'ading.
Cingra ko papihaklongay to kasakitakit i takowanan.
3 Tapangaw, o sapimaan ko tamdaw iro haratengen Iso cingra?
O sapimaan ko mamapohed a tamdaw iro dipoten Iso cingra?
4Matiya o ccay a sla' ko tamdaw,
matiya o mitafsiway a lidong no to'em ko 'orip ningra.
5 Tapangaw, nanay fohaten Iso ko kakarayan a ma^pod a tayni,
nanay tfingen Iso ko tokotokos ta masadak ko 'acfel.
6Nanay pasadaken Iso ko fitili' a paliwasak to 'ada,
nanay pa^feren Iso ko pana' ta milaliw cangra.
7Nanay laya'en ko kamay Iso nai kakarayan a pa'orip i takowanan,
pa'oripen kako a pasadak nai talolongay a nanom,
pa'oripen kako a paliyas nai papotalay a ci'icelay a 'ada.
8Awaay ko so'linay a sowal nangra,
haloniktonan nangra a sowal a o mangah.
9Kawasaw, patngilen ako Kiso to fa^lohay a radiw,
pasonien ako ko datok a pahmek i Tisowanan.
10Kiso ko saka pakalowid no hongtingti,
mapa'orip Iso ci Tafiti o matayalay Iso.
11Nanay pa'oripen Iso kako a paliyas nai miforiforay a 'ada,
pa'oripen kako a paliyas nai papotalay a ci'icelay a 'ada.
Awaay ko so'linay a sowal nangra,
haloniktonan nangra a sowal a o mangah.
12Nanay matiya o tanektekay ko lahad a kilang ko nika lakapah no wawa niyam,
nanay matiya o nito^to'an a hcek a saka^res no loma' no hongti ko nika kapah no kaying a wawa niyam.
13Nanay matomes ko 'ariri niyam to masamaamaanay a kinaira,
nanay malnak ko masaflaway a nipakaenan niyam a siri.
14Nanay malnak ko pina'orip niyam a 'aloman,
nanay awaay ko mahalodotay ko hofoc a kolong ato sipon niyam.
Nanay awaay a matngil i niyaro' niyam ko tangic no tamdaw.
15O matiniay ko 'orip a kitakit i, tada o malmeday.
O mangodoay to Tapang a palaKawas a finawlan i, tada o malmeday.
Currently Selected:
'Olic 144: AMIS2019
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2019
