'Olic 119
119
O Rikec no Tapang
1O awaay ko tatoro'en a patlac,
o mido^doay a tamdaw to rikec no Tapang i, o malmeday.
2O mido^doay to limo'ot no Tapang,
o masarocoday ko faloco' a milongoc i Cingraan i, o malmeday.
3O matiniay a tamdaw i, caay pidmak to tatiihay a dmak,
deng o lalan no Tapang ko nido^doan nangra.
4 Tapangaw, mipafli Kiso i tamiyanan to rikec Iso,
papilahcien Iso kami a papido^do tonini.
5Mangalay kako a so'lin ko faloco' a mido^do to rikec Iso.
6Ano ma'imer kako to limo'ot Iso a ma^min i,
caay ka pakangodo kako.
7Ano minanam kako to mo^celay a rikec Iso i,
o makoracay a faloco' ko sapahmek i Tisowanan.
8O dado^doen ako ko rikec Iso,
nanay caay pifalah Kiso i takowanan.
O Pido^do to Rikec no Tapang
9Samaanen no kapah ta makorac ko 'orip ningra saw?
O nipido^do to limo'ot Iso ko sakakorac ningra.
10Masarocod ko faloco' ako a milongoc i Tisowanan,
nanay caay pisiikor kako to limo'ot Iso.
11Pakifaloco'en ako ko sowal Iso,
ta caay ka ciraraw kako i Tisowanan.
12 Tapangaw, mipahmek kako i Tisowanan,
nanay pasifana'en kako to rikec Iso.
13Milkal kako a pasowal to polong no rikec Iso.
14Maolah kako to rikec Iso,
ikaka no masamaamaanay a dafong ko nika olah ako.
15Minanam kako to sifana' Iso,
pakifaloco'en ako ko sowal Iso.
16O sakalipahak ako ko rikec Iso,
caay ko mamatawal ako ko limo'ot Iso.
O Lipahak no Mido^doay to Rikec no Tapang
17Nanay kasida'iten Iso ko matayalay Iso,
ta ma'oripho kako a mido^do to sifana' Iso.
18Nanay fohaten Iso ko mata ako,
ta paka'araw kako to pakakmoday a so'lin no rikec Iso.
19O palafangay ko 'orip ako i tini i hkal,
nanay caay pisimed Kiso i takowanan to limo'ot Iso.
20Mararid kako a maolah to rikec Iso,
sahinatala sa ko faloco' ako caayto ka pakahadidi.
21Kapo'iyen Iso ko malata'angay a tamdaw,
o miliyasay to limo'ot Iso i, o a 'kaken cangra.
22Nanay palasawaden Iso ko milokesay ato milikafay i takowanan,
nawhani o mido^doay kako to rikec Iso.
23Talacowa adihay ko pisahalaka no mikowanay to sapikari'angaw i takowanan,
nikawrira, oyananto kako o matayalay Iso a minanam to rikec Iso.
24O palipahakay i takowanan ko sifana' Iso,
o nga'ayay a singsi ako ato sakaci^poc ako a widang.
O Pikton to Faloco' a Mido^do to Rikec no Tapang
25Mapolinto kako i sra,
nanay do^doen Iso ko niktonan Iso a sowal a pa'orip i takowanan.
26Mapatalahkalto ako i Tisowanan ko nano dmak ako a ma^min, saka, paca'of Kiso i takowanan,
nanay pasifana'en kako to rikec Iso.
27Nanay pasifana'en kako to sakafana' ako to rikec Iso,
o maminanam kako to pakakmoday a sifana'#119.27 sifana' -- ano ^ca i, dmak. Iso.
28Tadamararom kako,
nanay do^doen Iso ko niktonan Iso a sowal a patanektek i takowanan.
29Nanay caay papido^doen Iso kako to awaay ko ^poc a lalan,
kasida'itenho kako a pakafana' to rikec Iso.
30O so'linay a lalan ko nipili'an ako,
karteng ko pinengneng ako to rikec Iso.
31 Tapangaw, mado^do ako ko sifana' Iso,
nanay caay pakangodoen Iso kako.
32Misa'icel kako a mihaklong to limo'ot Iso,
nawhani o mamatongal Iso ko sakafana' ako.
O Pilongoc to Sakafana'aw to Tatodong no Rikec
33 Tapangaw, nanay pakafana'en kako to tatodong no rikec Iso,
mangalay kako a mararid a mido^do.
34Nanay tadtaden a pasifana' kako to rikec Iso,
mangalay kako a ma'imer a masarocod ko faloco' a mido^do.
35Nanay kriden Iso kako a parakat i lalan no limo'ot Iso,
nawhani nai itira a miala kako to sakalipahak ako.
36Nanay papiolahen Iso kako a papido^do to rikec Iso,
onini ko ikakaay to nika 'anof ako to dafong.
37Nanay papisawaden kako a miharateng to awaay ko ^poc a dmak,
nanay pakayni i pido^do ako to sowal Iso ko sapisafa^loh to 'orip ako.
38Oya niktonan Iso a sowal i mangodoay i Tisowanan a tamdaw i,
nanay lahcien Iso i tireng no matayalay Iso.
39Nanay paliyasen Iso i takowanan koya katalawan ako a kangodoan a dmak,
nawhani tadamakapah ko rikec Iso.
40Mangalay kako to limo'ot Iso,
nanay pakaynien i mo^cel Iso ko sapafli i takowanan to fa^lohay a 'orip.
O Piti'er to Rikec no Tapang
41 Tapangaw, nanay pahapinangen kako toya caay ka falic a olah Iso,
nanay do^doen Iso ko niktonan Iso a sowal a pa'orip i takowanan.
42Ta ma^deng kako a paca'of toya milokesay i takowanan,
nawhani o paso'linay kako to sowal Iso.
43Nanay mapararid Iso kako a pasowal to so'linay a sowal,
nawhani o rikec Iso ko pafaloco'an ako.
44O mamararid kako a mido^do to rikec Iso tangasa i da'oc.
45O mapakoniraayto ko 'orip ako,
nawhani o mido^doay kako to sifana' Iso.
46O papasowal kako i hongtingti to limo'ot Iso,
caay ko mamangodo kako.
47O sakalipahak ako ko nipido^do to limo'ot Iso,
nawhani maolah kako tonini a limo'ot.
48Ma'imer kako, maolah kako to limo'ot Iso,
miharateng kako to sifana' Iso.
O Pipaso'lin to Rikec no Tapang
49Nanay maharateng Iso ko niktonan Iso a sowal i matayalay Iso,
nawhani o sowal Iso ko sakaira no pafaloco'an ako.
50Saka, yo mapades kako i, mahinom kako,
nawhani o niktonan Iso a sowal ko misafa^lohay to 'orip ako.
51Mararid a milikaf i takowanan ko malata'angay a tamdaw,
nikawrira, caay pisoikor kako to rikec Iso.
52Maharateng ako ko nano pasifana' Iso iti:yaayho,
Tapangaw, o mihinomay i takowanan ko sifana' Iso.
53Minengneng kako to misoikoray to rikec Iso a tatiihay a tamdaw i,
marafraf ko kter no faloco' ako, caayto paka'emet kako.
54O pacarcaray ko aro' ako i tini i hkal,
misanga' kako to 'olic a radiw a pahmek to limo'ot Iso.
55 Tapangaw, maharateng ako Kiso to dadaya,
o ma'imeray kako to rikec Iso.
56O pido^do to limo'ot Iso ko sakalipahak ako.
O Lalok to Saki Rikec no Tapang
57 Tapangaw, o sakalmed ako Kiso,
mikton kako to faloco' a mido^do to rikec Iso.
58Masarocod ko faloco' ako a mingitangit i Tisowanan,
nanay do^doen Iso ko niktonan Iso a sowal a adayay i takowanan.
59Mitikol kako a miharateng to nano dmak ako i,
mikton kako to faloco' a pasayra i rikec Iso.
60Saka, caay ka cihinapec kako a mido^do to limo'ot Iso.
61Ano palipaliten no tatiihay a tamdaw kako to towaso i,
oyananto a caay ka tawal ako ko rikec Iso.
62O tnok no lafii i, lomowad kako a pahmek a romadiw to nika mo^cel no rikec Iso.
63O mangodoay Tisowanan, o mido^doay to rikec Iso a tamdaw i,
o widang ako cangra a ma^min.
64 Tapangaw, mildef i hkal ko caay ka falic a olah Iso,
nanay pasifana'en kako to limo'ot Iso.
O Tadamaanay a Rikec no Tapang
65 Tapangaw, mado^do Iso ko nano sowal Iso a sida'it i takowanan o matayalay Iso.
66Nanay paflien kako to taneng ato fana',
nawhani o paso'linay kako to limo'ot Iso.
67Yo caho ka tfocen Iso kako i, honihoni patlac kako,
nikawrira, aninito i, mido^doto kako to sowal Iso.
68O tadanga'ayay, o fangcalay ko nidmakan Iso,
nanay pasifana'en kako to limo'ot Iso.
69Milikaf ko malata'angay a tamdaw a mikari'ang i takowanan,
nikawrira, masarocod ko faloco' ako a mido^do to rikec Iso.
70Maapa a awaay ko fana' nangra,
nikawrira, o rikec Iso ko kalipahakan ako.
71O sakaci^poc ako ko nika tfoc ako,
nawhani o papinanamay i takowanan to limo'ot Iso konini.
72O sakaci^poc ako ko nipaflian Iso i takowanan a rikec,
ikaka no i hkalay a adihayay a tada^kim ato ^kim ko nika nga'ay.
O Mo^celay a Rikec no Tapang
73O misanga'ay, o midipotay Kiso i takowanan,
nanay paflien kako to sakafana' ako a minanam to rikec Iso.
74Ano ma'araw no mangodoay i Tisowanan a tamdaw kako i, salipahak sa cangra,
nawhani o paso'linay kako to sowal Iso.
75 Tapangaw, mafana' kako to nika o mo^celay ko pisawkit Iso,
nawhani o pitfoc Iso i takowanan i, o nika so'lin no dmak Iso.
76Nanay do^doen ko niktonan Iso a sowal i matayalay Iso,
pakaynien i caay ka falic a olah Iso ko sapihinom i takowanan.
77Nanay kaadayayenho kako ta ma'oripho kako,
nawhani o rikec Iso ko sakalipahak ako.
78Mamana mapakangodo koya milokesay i takowanan a malata'angay a tamdaw,
nikawrira, kako to no mako i, mina'on kako a miharateng to rikec Iso.
79Nanay oya mangodoay i Tisowanan a tamdaw i, tayni i takowanan,
oya mafana'ay to rikec Iso a tamdaw i, mihaklong i takowanan.
80Nanay masarocod ko faloco' ako a mido^do to limo'ot Iso,
ta caay ka tfad a mapakangodo kako.
O Pilongoc to Pipadama no Tapang
81 Tapangaw, marorayto kako to nano halamham ako to pipa'orip Iso,
nikawrira, o pafaloco'an ako ko niktonan Iso a sowal.
82Kadipohaw sato ko mata ako tonano hinatala ako to niktonan Iso a sowal,
o licay ako i, <<Ano hacowa Kiso a mihinom i takowanan saw?>> sa kako.
83Talacowa matiya o matlangayto a falako no ^pah kako,
nikawrira, caay ka tawal ako ko limo'ot Iso.
84Hakowaho ko halafin no pitala ako saw?
Ano hacowa Kiso a mitfoc toya mikari'angay i takowanan saw?
85Oya caay pido^do to rikec Iso a malata'angay a tamdaw i,
misarfong cangra to sapitfadaw i takowanan.
86Padteng sa cangra a mikari'ang i takowanan, nanay padamaenho Iso kako,
nawhani o tati'eren ko limo'ot Iso a ma^min.
87Sapitkopan cangra i takowanan,
nikawrira, caay pifalah kako to limo'ot Iso.
88Nanay paflien kako to fa^lohay a 'orip, tahada'ocen a maolah kako,
ta manga'ay kako a mido^do to rikec Iso.
O Paso'lin to Rikec no Tapang
89 Tapangaw, o mida'ocay ko sowal Iso a patanektek to kakarayan.
90O mida'ocay ko nika so'lin Iso,
o nipatirengan Iso ko hkal saka, mida'oc a tanektek a tomireng.
91O no Miso a sa'osi ko sakaira no kalomaamaan a tahanini,
nawhani o matayalay Iso ko kalomaamaan a ma^min.
92Ano caay ka o rikec Iso ko sakalipahak ako i,
kona mapatayto kako to nano nika pades ako.
93Caay ko mamiliyas kako to rikec Iso a tahada'oc,
nawhani onini ko sapa'orip Iso i takowanan.
94O no Miso kako saka, nanay pa'oripen Iso kako,
nawhani o mido^doay kako to limo'ot Iso.
95Misa'adapaw to sapipatayaw i takowanan ko tatiihay a tamdaw,
nikawrira, oyananto a miharateng kako to rikec Iso.
96Mahapinang ako ko nika o citolasay ko kalomaamaan,
nikawrira, awaay ko tolas no limo'ot Iso.
O Olah to Rikec no Tapang
97Tadamaolah kako to rikec Iso,
saromi'ami'ad sa kako a miharateng tonini.
98Mararid i faloco' ako ko limo'ot Iso,
saka, ikaka no 'ada ako ko nika citaneng ako.
99Ikaka no polong no singsi ako ko nika fana' ako,
nawhani miharateng kako to sifana' Iso.
100Ikaka no mato'asay ko nika citaneng ako,
nawhani o mido^doay kako to limo'ot Iso.
101Maliyasto ako ko polong no tatiihay a dmak,
nawhani o mihaklongay kako to sowal Iso.
102Caay piliyas kako to sifana' Iso,
nawhani o pasifana'ay Kiso i takowanan.
103Tadako^san ko sowal Iso,
ikaka no ko^san no waneng#119.103 waneng -- o roma i, 'odax (katimol). no 'odal ko nika ko^san no sowal Iso.
104O nai tiraay i rikec Iso ko sakacitaneng ako,
saka, mi'intel kako to tatiihay a dmak.
O Likat no Rikec no Tapang
105O mikriday a padawdaw to rakat ako ko sowal Iso,
o likat no lalan no 'orip ako.
106O a 'imeren ako ko niktonan ako a sowal a mido^do to mo^celay a sifana' Iso.
107 Tapangaw, tadakarteng ko pades ako,
nanay do^doen Iso ko niktonan Iso a sowal a pafli i takowanan to fa^lohay a 'orip.
108 Tapangaw, layapen ko pikansiya ako a mitolon,
nanay pasifana'en kako to limo'ot Iso.
109Mararid i laloma' no kacalemceman ko 'orip ako,
nikawrira#119.109 Mararid ... nikawrira, -- ano ^ca i, Ano hacowaay to i, ma^deng kako a kinafalah to 'orip., caay ka tawal ako ko rikec Iso.
110Mitlay to tilo ko tatiihay a tamdaw to sapikari'angaw i takowanan,
nikawrira, caay pisorikol kako to limo'ot Iso.
111O mida'ocay a dafong ako ko limo'ot Iso,
o sakalipahak no faloco' ako konini.
112Do^doen ako ko rikec Iso tangasa i piliyasan ako tonini a hkal saan ko pikton ako to faloco'.
O Rihaday i Laloma' no Rikec no Tapang
113Mi'intel kako to caay ka so'lin ko faloco' a mitoor i Tisowanan,
nikawrira, maolah kako to rikec Iso.
114O midipotay i takowan Kiso, o sapatada ako Kiso,
o niktonan Iso a sowal ko pafaloco'an ako.
115Kamo o tatiihay ko dmak a tamdaw, piliyas i takowanan,
o mamido^do kako to limo'ot no Kawas ako.
116Nanay do^doen Iso ko sowal Iso a mipadama i takowanan ta ma'oripho kako,
nanay caay palasawaden Iso ko pafaloco'an ako.
117Ano mipadama kiso i, rihaday kako,
o mamararid kako a mido^do to limo'ot Iso.
118Ma'osi Kiso to misorikoray to rikec Iso a tamdaw,
o horac a ma^min ko nisahalakaan nangra.
119Samatiya han Iso o lakaw ko tatiihay a tamdaw a ma^min,
orasaka, maolah kako to sifana' Iso.
120Mirmir sa ko tireng ako to nano talaw ako i Tisowanan,
tona makoki' kako to pisawkit Iso saka, matomes no talaw kako.
O Pido^do to Rikec no Tapang
121Mado^do ako ko marayasay, mo^celay a dmak saka,
nanay caay patoroden Iso kako i 'ada ako.
122Nanay mihai Kiso a padama to matayalay Iso,
nanay caay pakoniraen Iso ko pisamsam no malata'angay a tamdaw i takowanan.
123Makadipohawto ko mata ako to nano pitala to niktonan Iso to sapa'orip i takowanan ato mo^celay a sowal Iso.
124Nanay do^doen Iso ko caay ka falic a olah Iso a sida'it i takowanan,
nanay pasifana'en kako to limo'ot Iso.
125O matayalay Iso kako saka, nanay paflien kako to sakafana' a 'icel,
ta mafana' kako to sifana' Iso.
126 Tapangaw, maraodayto ko pilahcian Iso a mitfoc i matini,
nawhani misorikor a ma^min ko tamdaw to rikec Iso.
127Ikaka no nika olah ako to ^kim ato tada^kim ko nika olah ako to limo'ot Iso.
128Orasaka, mido^do kako to sifana' Iso a ma^min,
ma'osi kako to mangah a dmak a ma^min.
O Nika Olah a Mido^do to Rikec no Tapang
129O kafahka'an ko sifana' Iso saka,
masarocod ko faloco' ako a mido^do tonini.
130Ano haccayen a mitadtad ko sifana' Iso i,
o mipata^ngaday to sakacitaneng no mafolaay a tamdaw.
131Sangatowatowa' sa ko ngoyos ako a macahacah,
nawhani maso'aw kako to limo'ot Iso.
132Nanay sikolenho Iso kako, kaadayayenho kako,
samatiyaen o dmak Iso to maolahay i Tisowanan a tamdamdaw ko pidmak Iso.
133Nanay do^doen Iso ko niktonan Iso a sowal ta tanektek ko rakat ako,
ta caay ka fo'ot no tatiihay a tamdaw kako.
134Nanay pa'oripen kako a paliyas nai misamsamay i takowanan,
ta pakado^do kako to limo'ot Iso.
135Nanay kasida'itenho Iso ko matayalay Iso,
pakafana'en kako to rikec Iso.
136Samatiya sa o nanom no 'alo ko losa' ako,
nawhani misorikor a ma^min ko tamdaw to rikec Iso.
O Nika Mo^cel no Rikec no Tapang
137 Tapangaw, o mo^celay Kiso,
o mo^celay ko rikec Iso.
138O nipaflian Iso a rikec i, o marayasay o mo^celay a masongila'.
139Marafraf ko kter ako a matiya o marengrengay a namal,
nawhani mi^pec ko 'ada ako to limo'ot Iso.
140O tadaso'linay ko niktonan Iso a sowal,
tadamaolah kako tonini.
141Talacowa o sasafaay kako, o ma^pecay no tao kako,
nikawrira, caay ka pitawal kako to sifana' Iso.
142O mo^cel Iso i, o mida'ocay a mo^cel,
o so'linay ko rikec Iso.
143Yo mapades a mapakaroray kako i,
o limo'ot Iso ko palipahakay i takowanan.
144O mo^celay a tahada'oc ko sifana' Iso,
nanay paflienho Iso kako to sakafana' ako, ta ma'oripho kako.
O Pilongoc to Sapa'orip
145 Tapangaw, masarocod ko faloco' ako a mingitangit i Tisowanan, nanay paca'ofenho Iso kako,
o mido^doay kako to limo'ot Iso.
146Pasayra kako i Tisowanan a mingitangit, nanay pa'oripenho Iso kako,
o mido^doay kako to rikec Iso.
147I 'ayaw no nika ta^ngad i, milongoc kako i Tisowanan,
o niktonan Iso a sowal ko pafaloco'an ako.
148Salafiifii sa a macngaw ko mata ako,
a miharateng to sifana' Iso.
149 Tapangaw, nanay do^doen Iso koya caay ka falic a olah Iso a mitngil to pilongoc ako,
nanay pakaynien Iso toya mo^cel Iso a pafli i takowanan to fa^lohay a 'orip.
150Miraodto i takowanan koya miforiforay a mari'angay a tamdaw,
o caacaay aca pido^do cangra to rikec Iso.
151Nikawrira, Tapangaw, ira Kiso i tatihi ako,
o so'linay a ma^min ko rikec Iso.
152Nai 'a:yaw aca kako a mafana' to sifana' Iso,
patanekteken Iso a tomireng ko sifana' Iso a tahada'oc.
O Pilongoc to Sadama
153Nanay nengnengenho Iso ko pisemsem ako, nanay pa'oripen Iso kako,
nawhani caay pisakahmaw kako to rikec Iso.
154Nanay pa'adingen Iso kako, tdalenho kako,
nanay do^doen Iso koya niktonan Iso a sowal a pa'orip i takowanan.
155Caay ko mamapa'orip ko tatiihay a tamdaw,
nawhani caay pido^do cangra to rikec Iso.
156Nikawrira, Tapangaw, tadamaan ko olah Iso,
nanay do^doen Iso ko mo^cel Iso a pafli i takowanan to fa^lohay a 'orip.
157Tada'aloman ko misa'adaay ato misamsamay i takowanan,
nikawrira, caay pisoikor kako to rikec Iso.
158Ano ma'araw ako ko pacoliay i Tisowanan a tamdaw i, ma'osi kako,
nawhani caay pido^do cangra to limo'ot Iso.
159 Tapangaw, nengnengen ko nika talolong no olah ako to sifana' Iso,
nanay do^doen Iso koya caay ka falic a olah Iso a pa'orip i takowanan.
160O patosokan no rikec Iso i, o so'lin,
o polong no mo^celay a rikec Iso i, o mamida'oc a ira.
O Pipacakat to Tireng i Rikec no Tapang
161O cisakowanay a tamdaw i, padteng sa a mikari'ang i takowanan,
nikawrira, karteng ko piharateng ako to rikec Iso.
162Lipahak kako to nano niktonan Iso a sowal,
matiya o pakatamaay to adihayay a tadamaanay a dafong a tamdaw.
163Ma'osi kako to mangahay a sowal a ma^min,
nikawrira, maolah kako to rikec Iso.
164Tona o mo^celay ko rikec Iso saka,
to romi'ami'ad kinapito kako a mikansiya i Tisowanan.
165O rarihaday ko maolahay to rikec Iso a tamdaw,
awaay ko maan aca a mamipolin i cangraan.
166 Tapangaw, mitalaay kako to pipa'orip Iso i takowanan,
o mido^doay kako to limo'ot Iso.
167Mihaklong kako to sifana' Iso,
masarocod ko faloco' ako a maolah to rikec Iso.
168Mido^do kako to limo'ot ato sifana' Iso,
ma'arawto Iso a ma^min ko pinangan ako.
O Pitolon a Milongoc to Pipadama
169 Tapangaw, nanay matngil Iso ko pitahidang ako a milongoc i Tisowanan,
nanay do^doen Iso ko niktonan Iso a sowal a pafli i takowanan to sakafana' ako a 'icel.
170Nanay matngil Iso ko pitolon ako,
nanay do^doen Iso ko niktonan Iso a sowal a pa'orip i takowanan.
171Mararid kako a pahmek i Tisowanan,
nawhani o papasifana' Kiso to rikec Iso i takowanan.
172Mipahmek kako a romadiw to rikec Iso,
nawhani o mo^celay ko limo'ot Iso.
173Nanay tangsol Kiso a mipadama i takowanan,
nawhani o mihaklongay kako to limo'ot Iso.
174 Tapangaw, tadamangalay kako to pipa'orip Iso,
o sakalipahak ako ko rikec Iso.
175Nanay mararidho kako a ma'orip ta mipahmekho kako i Tisowanan,
nanay mapadama no sifana' Iso kako.
176Matiya o masidayay a moraraway a siri kako,
nanay tayni Kiso a mikilim to matayalay Iso,
nawhani caay ka tawal ako ko rikec Iso.
Currently Selected:
'Olic 119: AMIS2019
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2019
