'Olic 115
115
Ccay aca ko So'linay a Kawas
1 Tapangaw, deng Kiso ko papahmeken,
caay ko kami, deng Kiso ko papahmeken,
Nawhani o so'linay caay ka falic ko olah Iso.
2Nawiro pakonira han Iso ko pilicay no kasakitakit i tamiyanan toya,
<<I cowa ko Kawas namo saw?>> sanay.
3Ira i kakarayan ko Kawas ita,
do^doen Ningra ko nafaloco'an Ningra a midmak.
4O samiyay nangra i, o nifowahan to tada^kim ato ^kim,
o nito^to'an no kamay no tamdaw a misafaco a misanga'.
5Ira ko ngoyos nanira i, caay ka caciyaw,
ira ko mata nanira i, caay pakanengneng,
6ira ko tangila nanira i, caay pakatngil,
ira ko ngoso' nanira i, caay pakasanek,
7ira ko kamay nanira i, caay pakasapsap,
ira ko wa'ay nanira i, caay ka romakat,
ira ko takolaw nanira i, caay ka sadak ko ngiha' nanira.
8Mamana matiya o nisanga'an nangra a samiyay ko polong no misanga'ay ato paso'linay tonini.
9Kamo o Israil a tamdaw, piti'er to Tapang.
Nawhani o padamaay, o midipotay Cingra i titaanan.
10Kamo o paro no loma' ni Aron a citodongay to ta'ong, piti'er to Tapang.
Nawhani o padamaay, o midipotay Cingra i tamowanan.
11Kamo o mangodoay to Tapang a tamdaw a ma^min, piti'er i Cingraan.
Nawhani o padamaay, o midipotay Cingra i tamowanan.
12Maharateng no Tapang kita, o papalmeden Ningra kita,
o papalmeden Ningra kita o paro no loma' no Israil a tamdaw,
o papalmeden Ningra ko paro no loma' ni Aron a citodongay to ta'ong.
13O papalmeden no Tapang ko mangodoay i Cingraan a tamdaw,
ano o tadamaanayto, ano o sasafaayto a tamdaw i, palcad han Ningra a pakalmed.
14Nanay palnaken no Tapang ko wawa namo,
ta 'aloman ko wawawawa namo.
15Nanay palmeden no Tapang kamo,
nawhani o misanga'ay Cingra to kakarayan ato sra a Tapang.
16O no Tapang ko kakarayan,
nikawrira, paflien Ningra ko tamdamdaw to sra.
17Caayto ko papahmek to Tapang ko mapatayay a tamdaw,
caayto ko papahmek i Cingraan ko i tiraay i awaay ko adeses#115.17 adeses -- o roma i, 'ngiw (Fata'an)..
18Nikawrira, kita o ma'oripayho a tamdaw i,
pikansiya to Tapang a tahada'oc.
Haliluya!
Currently Selected:
'Olic 115: AMIS2019
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2019
