'Olic 107
107
SAKA LIMA A MALOLODAY CUDAD
('Olic 107--150)
O Pipahmek to Nika Nga'ay no Kawas
1<<Pikansiya to Tapang, nawhani o nga'ayay Cingra,
o mida'ocay ko sini'ada Ningra,>> saan.
2Kamo o nipa'oripan no Tapang a tamdaw,
pisaliyaliyaw a mipahmek tonini i Cingraan,
o nipa'oripan Ningra kamo a paliyas nai 'ada.
3O nisa'opoan Ningra kamo nai kawali, ka^tip, katimol, ka'amis a mikrid a panokay nai kasakitakit.
4O roma a tamdaw i, moraraw i kohkohan,
awaay a makilim nangra ko lalan to sakatayra i malokamaro'an nangra a niyaro'.
5Macahiw maso'aw cangra,
awaayto ko pafaloco'an nangra.
6I nika pades nangra i, mingitangit cangra to Tapang,
saka, pa'oripen Ningra cangra a paliyas nai kapadesan nangra.
7Kriden Ningra cangra i pafsocay a lalan a tayra i malokamaro'an nangra a niyaro'.
8O kakansiyaen nangra ko olah no Tapang,
o hahmeken nangra ko kafahka'an a nidmakan Ningra.
9Adahen Ningra ko so'aw no maso'away a tamdaw,
pafcolen Ningra to nga'ayay a kakaenen ko macahiway a tamdaw.
10O roma a tamdaw i, itira i to'manay ato i lidong no patay ko 'orip,
mapasemsem a mapalit no lonayi' cangra.
11Nawhani pacoli cangra to limo'ot no Kawas,
mana'ay cangra to sifana' no Isatakaraway a Kawas.
12Orasaka, pakarorayen no Kawas cangra a pakatayal a mikdec to faloco' nangra,
polinen Ningra cangra, awaay ko padamaay.
13I nika pades nangra i, mingitangit cangra to Tapang,
saka, pa'oripen Ningra cangra a paliyas nai kapadesan nangra.
14Kriden Ningra cangra a pasadak nai to'manay ato nai lidong no patay a 'orip nangra,
Pelpelen Ningra a milafot ko sapalit a lonayi' i cangraan.
15O kakansiyaen nangra ko olah no Tapang,
o hahmeken nangra ko kafahka'an a nidmakan Ningra.
16Tastasen no Tapang ko fodawan a sa'def,
pelpelen Ningra ko marad a cacafi'an no fawahan.
17O roma a tamdaw i, o nano raraw no tireng ko sakaadada ningra,
o nika tatiihan no dmak ningra ko sakapisemsem ningra.
18Awaayto ko sakakomaenaw nangra,
sakapatayanto cangra.
19I nika pades nangra i, mingitangit cangra to Tapang,
saka, pa'oripen Ningra cangra a paliyas nai kapadesan nangra.
20Pakaynien no Tapang i sowal Ningra ko sapiadah i cangraan,
pa'oripen Ningra cangra a paliyas nai patay.
21O kakansiyaen nangra ko olah no Tapang,
o hahmeken nangra ko kafahka'an a nidmakan Ningra.
22O kakansiyaen nangra ko Tapang a pacakat to sapato'aya,
o lalipahak cangra a pa'olic a pasowal to pakayniay i nidmakan no Tapang.
23O roma a tamdaw i, o i riyaray ko tayal,
o i lonanay ko 'orip.
24Manengneng nangra ko nidmakan no Tapang,
manengneng haca nangra ko kafahka'an a dmak Ningra i riyar.
25Palimo'ot han no Tapang ko fali i, mafaliyos,
malodis ko riyar.
26Saca'owa'owaw#107.26 Saca'owa'owaw -- o roma i, sata'owa'owaw. sa ko lonan nangra, mateneng haca i papara'an no riyar,
sacalemcem sa cangra a matoled a awa ko cdi.
27Sawarawara sa cangra a matiya o malasangay,
rawraw sa cangra a awaayto ko pinang no fenek nangra.
28I nika pades nangra i, mingitangit cangra to Tapang,
saka, pa'oripen Ningra cangra a paliyas nai kapadesan nangra.
29Patrep han Ningra ko faliyos i,
sarimadac sato ko riyar.
30Tomrepto ko fali ato taplik saka, salipahak sa cangra,
kriden no Tapang cangra a patayra i karihadayan nangra a minato.
31O kakansiyaen nangra ko olah no Tapang,
o hahmeken nangra ko kafahka'an a nidmakan Ningra.
32O papasowalen nangra i kapolongan a sa'opo no finawlan ko pakayniay i tadamaanay a dmak no Tapang,
o papahmeken nangra Cingra i pilaocan no kalas no niyaro'.
33Palahadhaden no Tapang ko tarawadaw a 'alo,
po^ten Ningra ko kasadakan no nemnem.
34Palafohoken Ningra ko mamatangay a sra a palakahciday a sra,
nawhani o tatiihay a tamdaw ko maro'ay itira.
35Palafanawen Ningra ko tafotafokan,
papowaren Ningra ko nemnem i makdalay a sra.
36Paaro'en Ningra itira ko macahiway a tamdaw,
mipatireng cangra itira to kamaro'an nangra a niyaro'.
37Mifolsak cangra to sapaloma i omah, mipaloma cangra to fadisoso',
saka, kadofah ko kinaira nangra.
38Palmeden no Tapang ko finawlan Ningra a palnak ko tlotloc nangra,
palnaken Ningra ko pina'orip nangra a matongal a matongal.
39Nanoya, mapakangodo, masti', masamsam, mapades ko finawlan no Kawas.
40Tfocen no Kawas koya misamsamay i cangraan,
pamorarawen Ningra ko rakat nangra i awaay ko lalan a kohkohan.
41Nikawrira, pa'oripen Ningra ko pakosiya a tamdaw a paliyas nai kapadesan nangra,
matiya o nika lnak no masaflaway a siri ko nika 'alomanto no paro no loma' nangra.
42Minengneng tonini ko mo^celay a tamdaw i, salipahak sa cangra,
nikawrira, trep sato ko tatiihay a tamdaw, caayto ka caciyaw cangra.
43Nanay mafana' a mihapinang ko citanengay a tamdaw tonini a dmak,
nanay miharateng cangra to caay ka falic a olah no Tapang.
Currently Selected:
'Olic 107: AMIS2019
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2019
