'Olic 106
106
O Sida'it no Kawas to Finawlan
1Haliluya!
Pikansiya to Tapang,
nawhani o nga'ayay Cingra,
o mida'ocay ko sini'ada Ningra.
2Cima ko mama^deng a pasowal to tadamaanay a nidmakan no Tapang?
Cima ko mama^deng a patalahkal a pahmek to polong no nga'ayay a dmak Ningra?
3O ma'imeray a tamdaw to limo'ot Ningra i, o tadamalmeday.
O marariday a o mo^celay ko dmak a tamdaw i, o tadamalmeday.
4 Tapangaw, ano mipalmed Kiso to finawlan Iso i,
nanay haratengen Iso kako, pa'oripen kako.
5Nanay pa'arawen Iso kako to nika cakat no 'orip no nipili'an Iso a finawlan,
papikihatiyaen kako a lipahak to lipahak no finawlan Iso,
ato kalita'angan no Miso a finawlan.
6Malcad kita to tato'asan ita a ciraraw a ma^min,
o ci'iloay o tatiihay ko dmak ita a ma^min.
7Yo i Icipho ko tato'asan ita i, caay ka fana' cangra to kafahka'an a dmak no Kawas,
talacowa kinapinapi:nato ko Kawas a patiri' to sini'ada Ningra i cangraan i, caho ka harateng nangra,
pacoli cangra i Kahngangay hananay a riyar to Ci'icelay a Kawas.
8Nikawrira, o sapatalahkalaw no Kawas to tadamaanay a 'icel Ningra saka,
do^do han Ningra ko niktonan Ningra a sowal a pa'orip i cangraan.
9Palimo'ot han Ningra ko Kahngangay hananay a riyar i, tangsol sa a ma'icang,
krid hanto Ningra ko finawlan a romakat a milacal, matiyasa o romakatay i hadhad cangra.
10Pa'oripen Ningra cangra a paliyas nai mi'intelay i cangraan,
pa'oripen Ningra cangra a pasadak nai 'ada nangra.
11Nikawrira, 'alolen no riyar koya 'ada nangra,
awaayto ko ccaccay aca a fadoc nangra.
12Itiya i, paso'lin sato ko finawlan to sowal no Tapang,
pahmek sato cangra a romadiw i Cingraan.
13Nikawrira, ranikay a matawal nangra ko nidmakan no Tapang,
caay ka sapitalaan cangra to faloco' Ningra.
14Yo i kohkohan cangra i, lomowad ko 'anof nangra,
mingitangit a milifet to Kawas cangra.
15Saka, do^do hanto no Kawas ko nilongocan nangra a mipafli i cangraan,
nikawrira, halolifong a adada a tfaden Ningra i cangraan.
16Yo i talo'an cangra i kohkohan i, ma'inap cangra ci Mosian,
ngaliwngiw cangra ci Aronan o fangcalay a matayalay no Tapang.
17Itiya i, mapla' ko sra, ta'moden no sra ci Tatan,
matadem no sra ci Apiram ato paro no loma' ningra.
18Ira ko namal a matfad i tireng no kapot nangra,
matodoh no namal koya tatiihay a tamdaw a milanto.
19Misanga' cangra to faco no ^kim a kolong i Horip a lotok,
mipitosor cangra a mita'ong to nisanga'an no kamay a samiyay.
20Patisoden nangra to faco no komaenay to rngos a kolong ko tadamaanay a Kawas.
21Matawalto nangra koya pa'oripay i cangraan a Kawas,
matawalto nangra koya tadamaanay a dmak Ningra i Icip
22ato nidmakan Ningra i Ham a kafahka'an a dmak,
atoya nidmakan Ningra i Kahngangay hananay a riyar a katalawan no tamdaw a dmak Ningra.
23Nikawrira, yo pasowal ko Kawas to sapitkopaw to finawlan Ningra i,
sa'icel sa ci Mosi a mingitangit o nipili'an Ningra a matayalay to saka^caaw ka kter Ningra,
saka, malasawad ko sakatkopaw no finawlan no Israil.
24Mi^pec cangra toya makapahay a sra,
caay paso'lin cangra to niktonan no Kawas a sowal.
25Ngaliwngiw cangra i laloma' no kopang,
caay ka sapitngilan cangra a mido^do to sowal no Tapang.
26Onini ko saka, ca^des ko sowal no Tapang i cangraan,
o mamapatay cangra i kohkohan,
27o mamaliwasak ko wawawawa nangra i kasakitakit,
o a itira cangra i roma a kitakit a mapatay, han Ningra.
28Nanoya, mita'ong ko finawlan no Kawas to Paal i Pior,
komaen cangra to nipacakatan i mapatayay a kawas a sapato'aya.
29O nano dmak nangra ko sakakter no Kawas i cangraan,
saka, fahal sa ira i cangraan ko lifong a adada.
30Nikawrira, tireng sa ci Finihas a mitfoc to ciraraway a tamdaw,
saka, trep sato koya lifong a adada.
31O nga'ayay konini a dmak saan ko piharateng no tamdaw,
saka, nai tiya tangasa i da'oc no rayray a maharateng konini.
32Pakakteren haca no finawlan ko Tapang i tatihi no Miripa a nemnem,
saka, halo ci Mosi a mapakaroray to nano dmak nangra.
33Tona tadamapakaroray nangra ci Mosi saka,
pasowal sato cingra to caay ko sasowalen a sowal.
34Miliyang cangra to limo'ot no Tapang,
caay pipatay cangra toya roma a finacadan.
35Kalararamod han nangra cangra,
mitodong cangra to pinangan nangra.
36Mita'ong to samiyay ko finawlan no Kawas,
o sakatkop nangra konini.
37Kalasapato'aya han nangra ko wawa nangra i palafoay a kawas no Kanan.
38Patayen nangra ko awaay ko raraw a tamdaw,
patayen nangra ko wawa nangra a pato'aya i samiyay no Kanan,
saka, mapaacek no rmes no nipatayan konini a pala.
39Onini a dmak ko saka mapaacek cangra,
o miliyasay o ma'odangay cangra i ka'ayaw no Kawas.
40Saka, makter ko Tapang to finawlan Ningra,
ma'osi Cingra i cangraan.
41Falah hanto Ningra cangra a patorod i roma a finacadan,
saka, makowanto no 'ada cangra.
42Masamsam no 'ada cangra,
caayto ka pakonira cangra.
43Kinapinapi:nato ko Tapang a pa'orip to finawlan Ningra i,
paci^ci sa cangra a pacoli to Tapang,
saka, matfad cangra i talolongay a raraw.
44Nikawrira, yo mingitangit cangra a mitahidang to Tapang i, tngilen Ningra,
sikolen Ningra ko pades nangra.
45Nawhani maharateng no Tapang ko nikatatlekan Ningra,
o nano sini'ada Ningra saka, masasiyor ko faloco' Ningra.
46Saka, papisaadayayen Ningra ko mirofoay i cangraan a 'ada.
47 Tapang a Kawas niyam, nanay pa'oripenho Iso kami,
nanay panokayen Iso kami nai kasakitakit,
ta manga'ay kami a pahmek to fangcalay a ngangan Iso,
ta o saka cihrang niyam ko pikansiya i Tisowanan.
48Nanay mapahmek ko Tapang a Kawas no Israil a tahada'oc.
Nanay malcad ko kasafinawlan a pangiha' a somowal to, <<Amin!>> sanay.
Haliluya!
Currently Selected:
'Olic 106: AMIS2019
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2019
