'Olic 105
105
O Kawas ato Finawlan Ningra
(1 Rayray 16.8-22)
1Pikansiya kamo to Tapang, Palosiyangen ko nika tadamaan Ningra.
Pasowalen i kasakitakit ko nidmakan Ningra.
2Karomadiw kamo a pahmek i Cingraan,
pasowalen a ma^min ko kafahka'an a dmak Ningra.
3Kacihrang kamo to fangcalay a ngangan Ningra.
Nanay malipahak a ma^min ko milongocay to Tapang.
4Pilongoc i Tapang to pipadama Ningra,
kararid a mita'ong i Cingraan.
5-6Kamo o tloc ni Apraham o matayalay no Kawas,
kamo o tloc ni Yakop o nipili'an Ningra,
haratengen namo ko nidmakan Ningra,
haratengen ko polong no nilahcian Ningra a misawkit.
7O Tapang Cingra, o Kawas ita,
maldef i polong no hkal ko pikowan Ningra.
8Tahada'oc ko pido^do Ningra to katatlekan Ningra,
tahada'oda'oc ko niktonan Ningra a sowal.
9Do^doen Ningra ko nikatatlekan Ningra aci Apraham,
do^doen Ningra ko niktonan Ningra a sowal ci Isakan.
10O mida'ocay ko niktonan Ningra ci Yakopan a sowal,
o mida'ocay ko nikatatlekan no Tapang ato Israil.
11Sowal sa Cingra <<O papaflien Ako kiso to sra no Kanan,
to malohadafong iso,>> sanay.
12Yo caay ka 'aloman ko finawlan no Kawas i,
itira cangra i Kanan a pacarcar a maro'.
13Salinalinah sa ko aro' nangra, nai itira a pala tayra i roma a pala,
nai itira a kitakit mafolaw cangra a tayra i roma a kitakit.
14Nikawrira, caay pihayda ko Kawas to pisamsam no cimacima a tamdaw i cangraan,
o sapa'adingaw no Kawas i cangraan saka, pasowalen Ningra ko hongtingti,
15<<Aka pipakaroray to nipili'an Ako a matayalay Ako,
aka pikari'ang to pali'ayaway to sowal Ako,>> han Ningra.
16Pakdalen no Tapang ko kitakit nangra,
saka, awaayto ko kakaenen nangra.
17Nikawrira, ocoren Ningra ci Yosif a pai'ayaw a mipatala to saki cangraan,
saka, mapacakay ci Yosif a malakoli.
18Mapalit to lonayi' ko tosa a wa'ay ningra,
mapaca'dong ko li'el ningra to marad a sapalit,
19mahaenay ko pilifet no Tapang cingraan tangasa i kalahcian no nipali'ayawan Ningra a sowal.
O pahapinang no Tapang konini to nika so'lin Ningra.
20Saka, palimo'oten no hongti no Icip a papitdal a pakonira cingra,
tdal hanto no mikowanay to kasakitakit a hongti cingra.
21Maocor cingra a mapatorod a mikowan to dmak no kitakit,
saka mikowan cingra to polong no kitakit.
22Mapatorod no hongti cingra a papikowan to kasatapatapang,
paflien no hongti cingra to sakowan a mikrid to kalokalas no kitakit.
23Nanoya, tayrato ci Yakop i Icip a pacarcar a maro' itira.
24Palnaken no Tapang ko finawlan Ningra,
saka, ikakato no 'ada ko nika ci'icel nangra.
25Papi'intelen no Tapang ko Icip a tamdaw to finawlan Ningra,
papisafana'en Ningra cangra to matayalay Ningra.
26Itiya i, ocoren no Tapang ko matayalay Ningra ci Mosi,
ocoren haca Ningra ko nipili'an Ningra a tamdaw ci Aron.
27Itira cangra i Icip a pahapinang to tadamaanay a kafahka'an a dmak no Kawas.
28Sato'manen no Kawas koya pala,
nikawrira, caay pitngil ko Icip a tamdaw to limo'ot Ningra.
29Palarmesen Ningra ko nanom no 'alo no Icip,
mapatayto a ma^min ko foting.
30Papirsapen Ningra ko takora' i polong no kitakit nangra,
halokafoti'an no hongti a loma' a maldef no takora'.
31Palimo'ot han no Kawas ko lalangaw ato likes i,
safrengan sa a tayni a mildef toya pala.
32Sano'orad han Ningra a mitfad ko kasa'ika'ikay no so^da,
tfaden haca Ningra ko fitili' a papiasik to polong no kitakit.
33Pelpelen Ningra ko fadisoso' ato sokon a kilang nangra,
mapayak a ma^min ko kilang i laloma' no kitakit.
34Pasowal hanho Ningra ko riri' i, safrengan sa a tayni,
caayto ko mamasa'osi ko nika adihay nanira.
35Korac han nanira a komaen ko polong no pinaloma.
36Patayen Ningra koya katanohtohho no tireng a sofocen a fisac a wawa no lomaloma' no Icip.
37Ta, kriden Ningra ko Israil a tamdaw a papihawikid to ^kim ato tada^kim a miliyas itira,
awaay ko caay ka pakarakat a ngasaw nangra.
38Yo miliyas cangra i, salipahak sa ko Icip a tamdaw,
nawhani matalaw cangra to Israil a tamdaw.
39O romi'ad i, claken no Tapang ko to'em a mipalidong to finawlan Ningra,
o dadaya i, o likat no namal ko sapata^ngad Ningra i cangraan.
40Milongoc cangra i, pa^feren Ningra ko tikolac a patayra,
tfaden Ningra nai kakarayan ko kakaenen nangra a pafcol.
41Fohat han Ningra ko 'ongcoy i, powar sa a masadak ko nemnem,
samatiya sato o 'alo ko ma'icangay a kohkohan.
42O saka pihaen Ningra i, maharateng Ningra ko fangcalay a niktonan Ningra a sowal,
o pilahci Ningra to niktonan Ningra a sowal ci Aprahaman o matayalay Ningra.
43Saka, krid hanto Ningra ko finawlan Ningra a lipahak a miliyas,
milkal a romadiw a ma^min koya nipili'an Ningra a finawlan.
44Paflien Ningra cangra to sra no roma a finacadan,
saka, tado sato cangra to omah no tao.
45Onini i, o papi'imer Ningra i cangraan to rikec Ningra a papido^do to limo'ot Ningra a ma^min.
Haliluya!
Currently Selected:
'Olic 105: AMIS2019
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2019
