'Olic 103
103
O Sini'ada no Kawas
O 'olic ni Tafiti.
1'Adingoaw ako, pipahmek to Tapang,
sarocodaw ako ko faloco' ato tireng a pahmek to fangcalay a ngangan Ningra.
2'Adingoaw ako, pipahmek to Tapang,
aka ka pawan to sida'it Ningra.
3O mihpolay Cingra to raraw ako a ma^min,
o miadahay Cingra to adada ako a ma^min.
4Pa'oripen Ningra kako a paliyas nai patay,
o adayay ato sini'ada Ningra ko sapatamohong i takowanan.
5Pakaynien Ningra i masamaamaanay a makapahay a maamaan ko saparahker Ningra i takowanan,
saka, sako^ngel sa ko tireng ako a tanektek a matiya o 'alilis.
6Mipa'ading ko Tapang to masamsamay a tamdaw,
patalahkalen Ningra ko mo^celay a dmak to saki cangraan.
7Pahapinangen Ningra ci Mosi to nisahalakaan Ningra,
saka, ma'araw no Israil a tamdaw ko tadamaanay a dmak Ningra.
8O matomesay no sini'ada ato mikomi ko Tapang,
o caay ka narikay a makter Cingra, o matomesay ko olah Ningra.
9Caay ka halafin ko kapo'i Ningra, caay pitafo Cingra a tahada'oc to kter.
10Caay pido^do Cingra to raraw ita a mitfoc i titaanan,
caay ko nano patlac ita ko sapico'ay Ningra i titaanan.
11Ano hakowaay ko takaraw no kakarayan a miliyas to sra i,
hatiraay ko kakahad no sini'ada Ningra to mangodoay i Cingraan.
12Ano hakowaay ko kararaay no kawali ato ka^tip i,
hatiraay ko pipaliyas Ningra to raraw ita i titaanan.
13Ano masamaanay ko nika olah no wama to wawa ningra i,
hatiraay ko nika olah no Tapang to mangodoay i Cingraan.
14Mafana' Cingra to tireng ita,
maharateng Ningra ko nika o nano sra kita.
15Matiya o lahad no talod ko 'orip ita,
matiya o lahad no hana no pala ko 'orip ita.
16Fiyok han no fali i, lahdaw sato,
awaayto a ma'araw no tamdaw cinira.
17Nikawrira, mida'oc ko nika olah no Tapang to mangodoay i Cingraan,
mararid ko mo^cel Ningra tangasa i kasarayray no hkal.
18Mido^do Cingra to katatlekan Ningra i so'linay a mido^do to limo'ot Ningra a tamdaw.
19Patirengen no Tapang i kakarayan ko tadamaanay a kamaro'an Ningra,
malahongti Cingra a mikowan to kalomaamaan.
20Kamo o ki^melay ci'icelay a coyoh, o mihaklongay to limo'ot Ningra,
o mido^doay to nafaloco'an Ningra a coyoh, pipahmek kamo a ma^min to Tapang.
21Kamo o cisakowanay i kakarayan a ma^min, o maolahay a mido^do to nafaloco'an Ningra a tapatapang,
pipahmek kamo a ma^min to Tapang.
22Kamo o polong no masanga'ay Ningra a maamaan, pipahmek to Tapang.
Kaitira i makowanay Ningra a kasaco'eco'ed a pahmek i Cingraan.
'Adingoaw ako, pipahmek to Tapang.
Currently Selected:
'Olic 103: AMIS2019
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2019
