Taneng 9
9
O Taneng ato Apa
1Mipatireng to loma' ningra ko taneng, pito ko hcek nira. 2Mipacok cingra to kolong ato siri, misanga' cingra to nga'ayay a ^pah a patahka. 3Ocoren ningra ko fafahiyan a koli ningra a mitahidang to tamdaw, tayra cingra i satakaraway no niyaro' a milkal. 4<<O mafokilay a tamdaw, katayni,>> saan. O romasato pasayra i maapaay a tamdaw a somowal. 5<<Katayni a komaen to nipatahkaan ako a kakaenen, katayni a mita'owak to nisanga'an ako a nga'ayay a ^pah. 6Piliyas to mafokilay a tamdaw, do^doen ko lalan no taneng, ta ma'orip kiso,>> saan.
7Ano misalof kiso to patlac no malata'angay a tamdaw i, kiso ko mapakangodoay, ano mikapo'i kiso to tatiihay a tamdaw i, kiso ko makari'angay. 8Saka, aka pitoro' to patlac no malata'angay a tamdaw, nawhani o mami'intel cingra i tisowanan, ano pasifana'en iso ko citanengay a tamdaw i, o kakaolahen ningra kiso. 9Ano pasifana'en ko citanengay a tamdaw i, matongal ko nika citaneng ningra, ano pasifana'en ko mo^celay a tamdaw i, matongal ko nika citangal ningra.
10O tatapangan no sakacitaneng ko nika ngodo to Tapang, o mafana'ay to Fangcalay a Kawas i, o citanengay. 11O taneng ko sakakakaya' no mihcaan iso a ma'orip. 12Ano ira ko taneng iso i, kiso ko ci^pocay, ano mana'ay kiso to taneng i, kiso ko masiponay.
13O maapaay a fafahiyan i, kafangafangan, caay ka fana' to maan aca, caay ka fana' to ngodo. 14Maro' cingra i fawahan no loma' ningra, ano ^ca i, maro' cingra i satakaraway no niyaro'. 15Milkal cingra toya macalohay ko rakat a tamdaw. 16Sowal sa, <<Kamo o mafokilay a tamdaw, katayni,>> saan. Pasayra cingra i maapaay a tamdaw a somowal. 17<<O nitakawan a nanom i, ko^sanay, o nitakawan a ^pang i, manga'ayay,>> saan. 18Nikawrira, caay ka fana' ko tayraay a tamdaw to nika o kapatayan cingra, o tayraay a tamdaw i, o matfadayto i talolongay a kaitiraan no mapatayay.
Currently Selected:
Taneng 9: AMIS2019
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2019
