Taneng 10
10
O Saka Ccay a Lolod no Taneng ni Solomon
1Onini a matiliday i, o taneng a sowal ni Solomon.
O citanengay a wawa i, o kalipahakan no wama ningra,
o maapaay a wawa i, o kararoman no wina ningra.
2O caay ko mo^celay a nikacidafong i, awaay ko ^poc,
nikawrira, ma^deng a pa'orip to tamdaw ko mo^celay.
3Caay pacahiwen no Tapang ko mo^celay a tamdaw,
caay pihayda Cingra to kangalayan no tatiihay a tamdaw.
4O saka lapakosiya ko toka, o saka cidafong ko lalok.
5Ano maraod ko pilitodan i, militod ko citanengay a tamdaw,
ano maraod ko pilitodan i, ano fafoti' saan i, tada o kangodoan.
6Malmed ko mo^celay a tamdaw,
masimed i ngoyos no tatiihay a tamdaw ko sapiri'ang.
7Maharateng no tamdamdaw ko mo^celay a tamdaw,
matfad ko tireng a malasawad ko ngangan no tatiihay a tamdaw.
8O citanengay a tamdaw i, milayap to limo'ot,
o maapaay ko sowal i, o sakatfad ningra.
9O mo^celay a tamdaw i, tanektek ko aro' ningra,
nikawrira, o misafana'ay a tamdaw i, o sakatfad ko pahrekan ningra.
10O misimeday to so'linay a dmak i, o palowaday to sakacacolicoli,
o maapaay ko sowal i, o sakatfad ningra.
11O tatapangan no sakaci'orip ko sowal no mo^celay a tamdaw,
ira i sowal no tatiihay a tamdaw ko sapiri'ang.
12Mipalowad to sakacacolicoli ko 'intel,
nikawrira, ma^deng a mitahpo to polong no patlac ko olah.
13Citaneng ko sowal no citangalay a tamdaw,
o mamasti' ko koror no maapaay a tamdaw.
14Misoped to fana' ko citangalay a tamdaw,
yo caciyaw saho ko maapaay a tamdaw i, o sakapades ningra.
15O dafong no cipaysoay a tamdaw ko misimaway i cingraan,
o cango'ot no pakosiya a tamdaw ko mitkopay i cingraan.
16O caci'orip ko nga'ayay ko dmak a tamdaw,
o mamatongal ko raraw no tatiihay a tamdaw.
17O mama'orip ko mitngilay a tamdaw a mido^do to sifana',
o kacalemceman ko 'orip no caay ka fana' to nika ciraraw no tireng.
18O misimeday i faloco' to 'intel i, o misafana'ay,
o mipayakyakay a milikaf to tamdaw i, o tadamaapaay.
19O karacaciyaway a tamdaw i, o sakaciraraw ningra,
o paka'metay to ngoyos no tireng i, o citanengay.
20O sowal no mo^celay a tamdaw i, matiya o ^kim,
o nisafaloco'an no tatiihay a tamdaw i, sahto awaay ko ^poc.
21O sowal no mo^celay a tamdaw i, o sakalmed no tamdamdaw,
nikawrira, o sakapatay no maapaay a tamdaw ko fokil ningra.
22O nipalmedan no Tapang ko sakacidafong no tamdaw,
caay ko nika rorayan a ccay ko sakacidafong no tamdaw#10.22 caay ko ... tamdaw -- ano ^ca i, ato caay ka patongal no rawraw..
23Kalatasalamaan han no maapaay a tamdaw ko pidmak to tatiihay,
kalalipahak han no citangalay a tamdaw ko taneng.
24Malahci a ma^min ko kangalayan no mo^celay a tamdaw,
nikawrira, mararid a ira i tatiihay a tamdaw ko katalawan a dmak.
25Ano ira ko faliyos i, mafret ko tatiihay a tamdaw,
nikawrira, tanektek a tahada'oc ko mo^celay a tamdaw.
26Aka pikilim to matokaay a tamdaw a pakatayal to dmak iso,
nawhani, matiya o pakalimkimay to wadis a 'acicimay ato mikilacay to mata a 'acfel a pakaroray cingra i tisowanan.
27O mangodoay to Tapang i, o kako'daw ko 'orip ningra,
o tatiihay a tamdaw i, mamoko' ko 'orip ningra.
28O sakalipahak ko pafaloco'an no mo^celay a tamdaw,
matiya o folang ato lidong a malasawad ko pafaloco'an no tatiihay a tamdaw.
29Dipoten no Tapang ko mo^celay a tamdaw,
tkopen Ningra ko tatiihay ko dmak a tamdaw.
30Caay ko mamangiyangi ko aro' no mo^celay a tamdaw,
nikawrira, caay ko lalipahak ko aro' no tatiihay a tamdaw.
31Citaneng ko sowal no mo^celay a tamdaw,
nikawrira, o mamakton ko sma no tatiihay a tamdaw.
32O sakalipahak no tamdaw ko sowal no mo^celay a tamdaw,
nikawrira, midoka' to tamdaw ko sowal no tatiihay a tamdaw.
Currently Selected:
Taneng 10: AMIS2019
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2019
