Taneng 6
6
O Pipatoor a Palimo'ot
1Wawaaw, iraay ko pihosiw#6.1 pihosiw -- hosiw o no Ripon a sowal. iso to kiyam no fiyaw iso haw? Ano ^ca i, iraay ko pihosiw iso a patikol to kiyam no kafahalan iso a tamdaw haw? 2Awaay ko katahafikodan iso to nano nisowalan iso a sowal haw? Ano ^ca i, caay ka palit no niktonan iso a sowal kiso haw? 3Wawaaw, ano iraay ko matiraay a dmak i, o marpetay noya tamdaw kiso. Ano hatira i, samaanen iso a miliyas saw? Kalamkamen a tayra toya tamdaw, ngitangiten cingra to sapitdalaw toya sapalit ningra i tisowanan. 4Fafoti' aka ka saan, aka ka pahanhan. 5Pa'oripen ko tireng no niyah, matiya o 'ayam a misafirofiro a miliyas to talakal, matiya o malonem a milaliw to mi'adopay a tamdaw.
6Kamo o matokaay a tamdaw, pinengneng kamo to dmak no kakonah hna, ta citaneng kamo. 7O kakonah i, awaay ko kakridan, awaay ko tapang, awaay ko mikowanay nanira. 8Nikawrira, yo pipanayan to kacihrangan i, mipatala cangra a mina'ang to kakaenen to saki kasi^nawan. 9Kiso o matokaay a tamdaw, tahacowa ko nika foti' saw? Tahacowa ta lomowad kiso saw? 10O sowal iso i, <<Pacmetho kako a mafoti', pacna'ho kako a misa'amamokot a pahanhan,>> saan. 11Nikawrira, yo marda' ko foti' iso i, matiya o mi'afasay ko pakosiya a miri'ang i tisowanan, matiya o mitatoyay to sapilood a kokong ko cango'ot a mitkop i tisowanan.
12Tayra i cowacowa ko tatiihay a tamdaw a misamangah. 13Misaknikni' cingra to mata a misakawikawih to kamay ato wa'ay to sapisa'fitaw ningra i tisowanan. 14Mararid a misahalaka ko 'antolay a faloco' ningra to tatiihay a dmak, tayra cingra i cowacowa a palowad to sakacacolicoli a dmak. 15Onini ko saka talifahal sa ira ko pades ningra, caayto ko sasamadah ko nilayapan ningra a kari'ang.
16-19Ira ko pito a dmak to ka'osian no Tapang to caay ko mamahadidi Ningra a dmak.
O pisatakaraw no mata a minengneng,
o pisamangah no sma a somowal,
o pipatay no kamay to awaayay ko raraw a tamdaw,
o pisahalaka no faloco' to tatiihay,
o nika kanir a midmak no wa'ay to tatiihay,
o pisamangah a pawacay,
o pipalakalakalat to sowal i widawidang.
Aka ka 'Odang
20Wawaaw, ka'imeren ko limo'ot no wama iso, aka pitawal to sifana' no wina iso. 21Pakifaloco'en ko sowal nangra, ca'dongen i li'el iso. 22O mamikrid to rakat iso ko sifana' nangra, o dadaya i, dipoten nira kiso, o romi'ad i, pacafayen nira kiso. 23O limo'ot nangra i, o likat, o sifana' nangra i, o lalan no 'orip no tamdaw. 24O sakafana' iso a miliyas to ma'otitay a fafahiyan ato ko^sanay ko sowal a fafahi no tao. 25Aka ka pael no nika kapah ningra, aka ka solot no mata ningra. 26O tasalamaan a fafahiyan i, ma^dengto to ccay a 'aplad no ^pang ko sapa'aca,#6.26 O tasalamaan a fafahiyan i, ma^dengto to ccay a 'aplad no ^pang ko sapa'aca, -- ano ^ca i, nawhani, halo dengan to a 'aplad no ^pang i, o mama'afas no tasalamaan a fafahiyan. nikawrira, ano ma'odang kiso to cifa'inayayto a fafahiyan i, halopolong no 'orip iso a malasawad.
27Ma^deng ko tamdaw a miti'nec a misimed to namal a caay ka todoh ko riko' saw? 28O romasato ano romakat ko tamdaw i marengrengay a 'afel i, ma^deng a caay ka todoh ko wa'ay saw? 29Malcad tonini, ano midi'i to fafahi no tao i, o kacalemceman konini. O midi'iay i cingraan i, o mamatfoc. 30O sakapitakaw no mitakaway a tamdaw i, latek nika cahiw ningra to kakaenen, ma^dengho a sololen konini. 31Nikawrira, ano marpet cingra i, pito ko tongal to sapatikol a patodong, o lasawadto no dafong ningra a ma^min to sapatfoc. 32O ma'odangay a tamdaw i, o tadamaapaay, o miplengay cingra to tireng ningra. 33O mamapakangodo cingra a masti', caayto ko mamalasawad ko sakacingodo ningra. 34Nawhani marafraf no 'inap ko kter no fa'inay ningra, saka, caayto ko sasini'ada cingra a mico'ay. 35Caay ko mamilayap cingra to sapatfoc, ano adihadihay ko sapafli i cingraan i, caay ko mamapadeng ko kter ningra.
Currently Selected:
Taneng 6: AMIS2019
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2019
