Taneng 5
5
Aka ka 'Odang
1Wawaaw, salimlaen ko taneng a sowal ako, tengilen ko pasifana' ako. 2Ta mafana' kiso a mana'on to dmak, ta mahapinang i caciyaw iso ko nika o citanengay kiso. 3Matiya o waneng no 'odal ko ngoyos no fafahi no tao, matiya o nika kamleng no simal no olif ko nipicocop ningra. 4Nikawrira, i ikor no pikalona iso cingraan i, dengto o rarom ato pades ko iraay i tisowanan. 5Kriden ningra kiso a patayra i kaitiraan no mapatayay, o sakapatay ko dmak ningra. 6Mici'iwi cingra to sakaci'orip a lalan, caay ka hapinang ningra ko nika moraraw ningra.
7Wawaaw, pitngil to sowal ako, aka pitawal kamo. 8Piliyas to matiniay a fafahiyan, aka piraod to fawahan no loma' ningra. 9Nawhani ano caay piliyas kiso i, o mama'afas no tao ko nika tadamaan iso, o papatayen no awaay ko sini'ada a tamdaw kiso i nika tala'ayawho no 'orip iso. 10O mama'afas no tao ko dafong iso, o mamalo no taoto ko nano nikarorayan iso a ma^min. 11O mamilaling kiso a tomangic i kafoti'an yo mamapatay kiso, halohci ato fanges no tireng iso a malasawad. 12<<Nawiro ma'osi kako a sowalen no tao? Nawiro caay ka kahi kako a salofen no tao ko patlac ako? 13Caay pitngil kako to sowal no singsi ako, caay ka limla kako to pipasifana' nangra. 14Talifahal sa kako a mapakangodo i ka'ayaw no finawlan,>> wa saan kiso a maksem.
15Ka o so'linay ko faloco' iso a maolah to fafahi iso, ka o cingra a ccay ko aolahen iso. 16Awaay ko sakaci^poc iso to focod a wawa iso to nano nihofocan no fafahi no tao. 17O tadawawa iso ko mafana'ay a midipot i tisowanan, caay ko mamidipot ko wawa iso to tao. 18Orasaka, karahker kiso to fafahi iso, oya ckah a fafahi iso ko sakalipahak iso. 19Matiya o malonem cingra a makapah, salongan, nanay marahker kiso to pitakec ningra, marnec kiso to tadaolah ningra. 20Orasaka, wawaaw, nawiro maolah kiso to fafahi no tao saw? Nawiro masolot no fafahi no tao kiso saw? 21Mahapinang no Tapang ko dmak iso, minengneng Cingra to kahaccaccay no dmak iso. 22O tatiihay a tamdaw i, o raraw no tireng ko sakatilo ningra, matalakal no raraw ningra cingra. 23O nika ^ca paka'met ningra to tireng ato nika tadaapa ningra ko sakapatay ningra.
Currently Selected:
Taneng 5: AMIS2019
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2019
