Taneng 4
4
O Sakaci^poc ko Taneng
1Wawaaw, pitngil to sifana' no wama namo, sarocoden ko faloco' a milayap, ta mafana' kamo. 2O nga'ayay a ma^min ko nipatorodan ako a sifana' i tamowanan, pakifaloco'en a ma^min. 3Yo ka^mangho kako, o kaolahan a dengan a wawa no wama ato wina ako kako. 4Pasowal sa ko wama ako a pasifana' i takowanan. <<Pakifaloco'en ko sowal ako, aka tawalen, do^doen ko sifana' ako, ta kadofah ko 'orip iso. 5Pikilim to taneng ato fana', aka pitawal, aka pisakahmaw to sowal ako. 6Aka pifalah to taneng, ta dipoten nira kiso, ano maolah kiso to taneng i, dipoten nira kiso a parihaday. 7O pilongoc to taneng ko sakakaay a dmak, ka o polong no dafong iso ko sapifalic a miala to fana'. 8Ano maolah kiso to taneng i, palahcien no taneng ko dmak iso, salimlaen ko taneng ta palatadamaanen no taneng kiso. 9O mamaloma'dilay a tamohong i fongoh iso ko taneng,>> saan.
10Wawaaw, pitngil to sowal ako, ano ma'imer kiso to sowal ako i, o kako'daw ko mihcaan iso a ma'orip. 11Mahrekto kako a pasifana' i tisowanan to lalan no taneng, o mamikrid i tisowanan a romakat i mo^celay a lalan no 'orip no tamdaw. 12Ano mafana' kiso a mido^do i, caay ka polin ko rakat ato cikay iso. 13Pakifaloco'en a mararid ko minanaman iso, o nilayapan iso a sifana' i, o sakaci'orip iso. 14Aka ka romakat to lalan no tatiihay a tamdaw, aka pinanam to pinangan no tatiihay a tamdaw. 15Liyasen ko tatiihay, aka pitoor i cangraan, deng o no miso a lalan ko do^doen, aka pikihatiya a mikapot to kaackan. 16Ano caay pidmak to tatiihay a dmak ko mari'angay i caay ka ala ko fafoti'en nangra. 17Kala kakaenen han nangra ko tatiihay a dmak, kala ^pah han nangra ko piforifor.
18O lalan no mo^celay a tamdaw i, matiya o ta^ngad to kaniharan, ta^ngad a ta^ngad a matdi tangasa i kalahokan. 19O lalan no tatiihay a tamdaw i, sato'man#4.19 sato'man -- o roma i, mato'em (ka'amis). sa a matiya o rawdengan, mapolin cangra i, caay ka fana' to nika o maan ko katahafikodan nangra.
20Wawaaw, pina'on a mitngil to sowal ako, do^doen ko sifana' ako. 21Aka ka palasaken ko sowal ako, pakifaloco'en a mitilid i faloco' iso. 22Nawhani ano marpet iso konini i, o saka ci'orip ato saka tanektek no tireng iso. 23Pina'on to niharatengan ato nisafaloco'an iso, nawhani nai nisafaloco'an iso a masadak ko pinangan no 'orip iso. 24Aka pasowal to caay ko so'linay a sowal, aka pasowal to mangah a sowal. 25Songila'en ko pinengneng a pasi'ayaw, aka pici'koy a matoled. 26Parayasen ko rarakaten a lalan iso, ta tanektek ko polong no rakat iso. 27Falahen ko tatiihay, pamo^cel han a pasi'ayaw a romakat, aka piliyas to mo^celay a lalan.
Currently Selected:
Taneng 4: AMIS2019
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2019
