Taneng 3

O Sapalimo'ot to Kapah

1Wawaaw, aka pitawal to sifana' ako, pakifaloco'en ko sifana' ako. 2O sakarihaday iso to romi'ami'ad ko sifana' ako ato sakako'daw no 'orip iso. 3Aka piliyas kiso to mo^celay so'linay a dmak, ca'dongen i li'el iso, tiliden i faloco' iso konini. 4Ano haenen iso i, o kaolahan no Kawas ato tamdaw kiso.

5Sarocoden ko faloco' a miti'er to Tapang. Aka piti'er to fana' iso. 6I masamaamaanay a dmak iso i, pasayraen i Tapang ko faloco' iso. Ta pasifana'en Ningra kiso to mo^celay a lalan iso. 7O citanengay kako aka ka saan kiso, deng o pita'ong to Tapang a ccay ko nga'ay, liyasen ko tatiihay. 8Ano haenen iso i, matiya o mialaay kiso to nga'ayay a sapaiyo. O sakaadah no doka' iso, o saka^caaw pisemsem iso konini. 9Alaen ko safangcalay a kinaira no omah iso a pacakat to sapahmek to Tapang. 10Ano haenen iso i, o mamatomes ko 'ariri iso to panay. Caay ko mama^deng ko koreng iso to piparoan to fa^lohay a ^pah.

11Wawaaw, aka pisakahmaw to nipipalatamdamdaw no Tapang i tisowanan ato aka pisakatalifokil to pipakmel ningra. 12Nawhani toro'en no Tapang ko raraw no kaolahan Ningra a tamdaw, matiya o pitoro' no mama to raraw no kaolahan ningra a wawa. 13O pakakilimay to taneng ato pakatamaay to fana' a tamdaw i, o malmeday. 14Ikaka no ^kim ato tada^kim ko nika ci^poc no taneng. 15Ikaka no odo' ko nika ci^poc no taneng. Ano o maamaanto a kangalayan iso a dafong i, awaay ko mama^deng a sapasasotiri' tonini. 16O sakakakaya' no 'orip iso ko nika citaneng iso. O romasato, o sakacidafong iso a malatadamaanay. 17O sakalipahak ato sakarihaday no 'orip iso ko nika citaneng iso. 18O mido^doay to taneng a tamdaw i, o malmeday. O mamalosakaci'orip a kilang ningra kona taneng.

19Pakaynien no Tapang i taneng Ningra ko nipisanga' to hkal, pakaynien Ningra i fana' Ningra ko pipatli a patireng to kakarayan. 20Pakaynien Ningra i fana' Ningra ko sakaromakat no nanom i 'alo, tfaden Ningra ko 'o'ol nai kiftolay a to'em.

21Wawaaw, ka'imeren ko taneng ato fana' iso, aka papilaliwen cinira. 22Ta o mamalosaka^res no li'el iso, o sakarihaday ato sakalipahak no 'orip iso canira. 23Rihaday ko rakat iso i lalan, caay ka tahastol a mapolin kiso. 24Marihaday ko kati'nang iso i kafoti'an awaay ko katalawan, foti' saho kiso, tangasa i kata^ngadan. 25Aka ka talaw to talifahal sanay a ira a pades, oya matiyaay o faliyos a miforifor a tayni a tatiihay a tamdaw. 26Nawhani, o dadipoten no Tapang kiso a parihaday, caay ko tatfaden Ningra kiso i talakal.

27Sa'icelen a midmak to nga'ayay, padamaen ko papadamaen a tamdaw. 28Ano ira ko 'icel iso i matini a mipadama to fiyaw i, aka tahacilaen a papitala cingra. 29Aka piri'ang kiso to fiyaw iso, paso'lin cingra i tisowanan saka, i ngata iso cingra a maro'. 30Ano caay pikari'ang ko tao i tisowanan i, padteng aka ka saan a macacoli ato cingra. 31Aka ka 'inal to mari'angay a tamdaw, aka pitodong to dmak ningra. 32Nawhani ma'osi ko Tapang to tatiihay a tamdaw, ingiden Ningra ko mo^celay a tamdaw. 33'Kaken no Tapang ko loma' no tatiihay a tamdaw, palmeden Ningra ko loma' no mo^celay a tamdaw. 34Kahmaw ko pinengneng Ningra to misatakarakaraway a tamdaw, kasini'adaen Ningra ko misapo^neray a tamdaw. 35O mamalatadamaanay ko citanengay a tamdaw, nikawrira, o mamapakangodo to adihayay ko maapaay a tamdaw.

Currently Selected:

Taneng 3: AMIS2019

Highlight

Copy