Kalatiya 5

O Mapakoniraay ko 'Orip no Mitooray ci Kristoan

1O sapakoniraaw no 'orip ita i ka'ayaw no Kawas saka, tdalen ni Kristo kita. Orasaka, satanekteken ko faloco' namo. Akato piliyaw a mica'dong to talo'odan no koli.

2Pitngil. Pasowal kako ci Pawlo i tamowanan. Ano mitoor kamo to krit a lisin i, malomaanho namo ci Kristo. 3Liyawen ako a pahapinang a somowal ko mitooray to krit a lisin a tamdaw a ma^min. O cacitodong kamo a mido^do to Rikec a ma^min. 4Pakayni i Rikec ko sakanga'ay niyam a malayap no Kawas yasanay a misa'icel a tamdaw i, o miliyasay i ci Kristoan, maliyas ningra ko mikomi no Kawas. 5Nikawrira, kita sa i, mapadama no 'icel no Fangcalay 'Adingo ato pakayni i nipiti'er ita ci Kristoan. Saka, halamham sa ko faloco' ita a mitala to sakanga'ayaw ita a malayap no Kawas. 6Nawhani, yo malaccay kita i 'orip ni Kristo Yis i, caay ko kalimlaan ko nika krit ato nika ^ca ka krit, deng o nano pilahci ita to olah a mahapinangay a nipiti'er ko kakalimlaan.

7Manga'ay ko pitoor namo i tiyaho. Anini sato i, cima ko milalangay i tamowanan to saka^caaw ka pihaklong namo to so'lin saw? 8O matiniay a nipikayhid i, caay ko nano dmak no mitahidangay tamowanan a Kawas. 9Tinako sa, mato sowal no mato'asay, <<Pakafihahak to 'alitad no ^pang a ma^min ko mimi:ngay a tamod,>> saan. 10Nikawrira, oyananto ko pipaso'lin ako tamowanan. Nawhani malcaday kita a o i salaloma'ay no 'orip no Tapang. Saka, o mamalcad ko harateng ita sa kako. Nikawrira, ano cimato ko mirawraway i tamowanan i, o mamatfoc no Kawas koya tamdaw.

11Salikakaaw, ano patnakho kako to sapido^doaw no tamdaw to krit a lisin i, kona caay ka kari'ang kako i matini. Ano hatira i, kona awaay ko tahfikoday to ciwcika. 12Oya mirawraway i tamowanan i, mamana liti' han nangra ko tireng nangra!

13Salikakaaw, o sakapitahidang no Kawas i tamowanan i, o sakapakoniraaw i tamowanan. Nikawrira, o nika matini namo a mapakonira i, caay ko sapitoor to 'anof no tireng, ka o ciolahay ko faloco' namo a madadamadama. 14Nawhani, oya <<Samatiyaen o nika olah iso to tireng ko nika olah iso to tao,>> sanay a sowal ko mifaloday to polong no Rikec. 15Kapina'on kamo, ano matiya o 'a'adopen kamo a makakalakalat ato marari'ari'ang i, o mamatkop kamo.

O Tayal no Fangcalay 'Adingo ato Dmak no Tireng

16Pa'icel kako i tamowanan a pasowal, ka o makriday no Fangcalay 'Adingo ko dmak namo, ta caay ka toor namo ko 'anof no tireng. 17Nawhani liyangen no tireng ko kangalayan no Fangcalay 'Adingo. Liyangen no Fangcalay 'Adingo ko kangalayan no tireng. Masasi'ada konini a tosaay. Orasaka, caay pakalahci kamo to kangalayan namo. 18Ano makrid no Fangcalay 'Adingo kamo i, caayto ka kowan no Rikec kamo.

19Mahapinang ko 'anof no tireng ita, o ma'odangay o kaackan ato ma'amlasay a dmak, 20o mita'ongay to samiyay, o cikawasay, o misa'adaay, o macacoliay, o ma'inapay, o makteray, o misatkeday, o palacinowasay ato micidekay, 21o mapodohay, o malasangay, o haliacangay to no hkal ato matiniay a romaroma a dmak. Mato nika palimo'ot ako i 'ayaw ko nika palimo'ot ako i tamowanan i matini. O matiniay ko dmak a tamdaw i, caay ko mamalafinawlan no Kitakit no Kawas.

22Nikawrira, o hci no nipikrid no Fangcalay 'Adingo i, o olah, o lipahak, o rihaday, o kodait, o sini'ada, o nga'ayay, o so'linay a faloco', 23o damsayay, o paka'metay to tireng. O matiniay a dmak i, awaay ko milalangay a Rikec. 24O ni Yis Kristo a tamdaw i, o mipacekayto i ciwcika a mipatay to pinangan no tireng ato 'anof no tireng ato 'anof no faloco'. 25O nano Fangcalay 'Adingo ko sakaci'orip ita. Saka, o tatooren ita ko pikrid no Fangcalay 'Adingo. 26Aka ka lata'ang. Aka ka sasitlii. Aka ka sasi'inap.

Currently Selected:

Kalatiya 5: AMIS2019

Highlight

Copy